india nepal tensions: చైనా వైరస్ కంటే భారత వైరస్ చాలా డేంజర్.. నేపాల్ ప్రధాని వివాదాస్పద వ్యాఖ్యలు – indian virus looks more lethal than chinese, italian: nepal pm kp oli


నేపాల్ ప్రభుత్వం చైనా అండ చూసుకొని భారత్‌పై అక్కసు ప్రదర్శిస్తోంది. కాలాపానీతో కూడిన మ్యాప్‌ను ఆమోదించిన నేపాల్.. మరోసారి దుండుకు వైఖరి కనబర్చింది. తమ దేశంలో కోవిడ్ వ్యాప్తికి భారత్‌ను తప్పుబట్టిన నేపాల్ ప్రధాని కేపీ ఓలీ.. భారత్ నుంచి వస్తోన్న వైరస్.. చైనా, ఇటలీ వైరస్‌ల కంటే ప్రమాదకరమంటూ తీవ్ర వ్యాఖ్యలు చేశారు. అక్రమ మార్గాల ద్వారా భారత్ నుంచి వస్తోన్న వారు.. తమ దేశంలో కరోనాను వ్యాప్తి చేస్తున్నారని ఓలీ వ్యాఖ్యానించారు.

సరిగా టెస్టులు చేయకుండానే భారత్ నుంచి జనాలను తీసుకొస్తున్నారన్న ఓలీ.. కొందరు స్థానిక ప్రజా ప్రతినిధులు, పార్టీ నాయకులే దీనికి బాధ్యత వహించాలని పార్లమెంట్‌లో వ్యాఖ్యానించడం గమనార్హం. ‘బయటి నుంచి వస్తోన్న వారితో కరోనాను కట్టడి చేయడం ఇబ్బందిగా మారింది. చైనీస్, ఇటలీ వైరస్‌లతో పోలిస్తే.. ఇండియన్ వైరస్ మరింత ప్రమాదకరంగా ఉంది’ అని నేపాల్ ప్రధాని భారత్‌పై తీవ్ర వ్యాఖ్యలు చేశారు.

ఎట్టి పరిస్థితుల్లోనూ కాలాపానీ – లింపియాధురా – లిపులేఖ్ ప్రాంతాలను భారత్ నుంచి తిరిగి స్వాధీనం చేసుకుంటామని నేపాల్ ప్రధాని పార్లమెంట్‌లో వ్యాఖ్యానించారు. మనదేశానికి చెందిన ఈ ప్రాంతాలను నేపాల్ తన మ్యాప్‌లో భాగంగా చూపించింది. భారత్, నేపాల్ మధ్య 1800 కి.మీ. సరిహద్దు ఉంది. కాగా 1816లో బ్రిటిష్ పాలకులతో కూడిన సుగౌలీ ఒప్పందం మేరకు లిపులేఖ్ ప్రాంతం తమదేనని నేపాల్ వాదిస్తోంది. 1962లో చైనాతో యుద్ధం జరిగిన నాటి నుంచి వ్యూహాత్మక కాలాపానీ, లింపియాధుర ప్రాంతాల్లో భారత సైన్యం మోహరించి ఉంటుండగా.. ఈ ప్రాంతాలు తమవేనని నేపాల్ వాదిస్తోంది.

కైలాస్ మానస సరోవర్‌ మార్గం కోసం లిపులేఖ్ పాస్‌ను అనుసంధానిస్తూ.. రోడ్డు మార్గాన్ని నిర్మించిన భారత్ మే 8న దాన్ని ప్రారంభించింది. కాగా ఇక్కడ సెక్యూరిటీ చెక్ పోస్టు ఏర్పాటు చేసిన నేపాల్ నిరసన వ్యక్తం చేసింది. కాగా ఈ మార్గం ఉత్తరాఖండ్‌లోని పితోర్‌గఢ్ జిల్లా గుండా వెళ్తోందని.. పూర్తిగా భారత భూభాగంలోనే ఈ రహదారిని నిర్మించినట్లు విదేశాంగ శాఖ ప్రకటించింది.



Source link

Leave a Reply

Your email address will not be published. Required fields are marked *