ipl 2020: ఐపీఎల్‌ కోసం టీ20 వరల్డ్‌కప్ వాయిదా తగదు: అలెన్ బోర్డర్ – t20 world cup 2020 should take precedence over ipl 2020, says allan border


ఐపీఎల్ 2020 సీజన్‌ కోసం టీ20 వరల్డ్‌కప్‌ని వాయిదా వేయడం సమంజసంకాదని ఆస్ట్రేలియా మాజీ క్రికెటర్ అలెన్ బోర్డర్ సూచించాడు. ఆస్ట్రేలియా వేదికగా అక్టోబరు- నవంబరులో టీ20 వరల్డ్‌కప్ జరిగేలా షెడ్యూల్ రూపొందించగా.. కరోనా వైరస్ కారణంగా ఆ టోర్నీపై సందిగ్ధత నెలకొంది. కరోనా వైరస్ నియంత్రణ కోసం ఇప్పటికే ఆస్ట్రేలియా ప్రభుత్వం పర్యాటక వీసాలపై ఆరు నెలల నిషేధం విధించగా.. ఆ గడువు సెప్టెంబరు వరకూ ఉండనుంది. ఈ నేపథ్యంలో.. అక్కడికి టీమ్స్‌ చేరుకోవడం.. ఆ తర్వాత 14 రోజులు క్వారంటైన్.. ఖాళీ స్టేడియాల్లో మ్యాచ్‌లు నిర్వహణ కష్టమని క్రికెట్ ఆస్ట్రేలియా (సీఏ) భావిస్తుండగా.. ఆదాయం కూడా పెద్ద ఎత్తున చేజారుతుందని అంతర్జాతీయ క్రికెట్ కౌన్సిల్ (ఐసీసీ) కంగారుపడుతోంది. దాంతో.. ఆ టోర్నీని వచ్చే ఏడాదికి వాయిదా వేయాలని ఐసీసీ యోచిస్తున్నట్లు వార్తలు వస్తున్నాయి.

టీ20 వరల్డ్‌కప్ వాయిదా పడితే..? ఆ అక్టోబరు – నవంబరు విండోలో ఐపీఎల్ 2020 సీజన్‌ని నిర్వహించాలని భారత క్రికెట్ నియంత్రణ మండలి (బీసీసీఐ) ప్లాన్ చేస్తోంది. ఈ మేరకు తెర వెనుక అన్ని దేశాల క్రికెట్ బోర్డుల మద్దతుని బీసీసీఐ కూడగడుతోంది. అయితే.. ఐపీఎల్ కేవలం డబ్బులు సంపాదించడానికేనని విమర్శించిన అలెన్ బోర్డర్.. ఆ టోర్నీ కోసం టీ20 వరల్డ్‌కప్‌ని వాయిదా వేయడాన్ని తాను సమర్థించనని స్పష్టం చేశాడు.

‘‘టీ20 వరల్డ్‌కప్ కంటే ఓ దేశంలో జరిగే లోకల్ టీ20 టోర్నమెంట్‌కి ప్రాధాన్యమివ్వడం సమంజసం కాదు. ఒకవేళ టీ20 వరల్డ్‌కప్ వాయిదాపడినా.. ఆ విండోలో ఐపీఎల్ జరుగుతుందని నేను అనుకోవట్లేదు. ఐపీఎల్ కేవలం డబ్బులు సంపాదించడానికే మాత్రమే ఉపయోగపడుతుంది. కానీ.. టీ20 వరల్డ్‌కప్ అలా కాదు.. కాబట్టి.. నేను తప్పకుండా ప్రశ్నిస్తాను. ఒకవేళ టీ20 వరల్డ్‌కప్ వాయిదాపడి.. ఆ టైమ్‌లో ఐపీఎల్ జరిగితే అన్ని దేశాల క్రికెట్ బోర్డులు తమ ఆటగాళ్లని ఆ టోర్నీలో ఆడకుండా నియంత్రించాలి’’ అని అలెన్ బోర్డర్ సూచించాడు.



Source link

Leave a Reply

Your email address will not be published. Required fields are marked *