ipl 2020: టీ20 వరల్డ్‌కప్ డౌట్.. ఐపీఎల్‌ 2020పై అప్పుడే క్లారిటీ: గైక్వాడ్ – ipl 2020 can happen only if t20 world cup gets cancelled: anshuman gaekwad


ఆస్ట్రేలియా వేదికగా ఈ ఏడాది అక్టోబరులో టీ20 వరల్డ్‌కప్ జరగడం అనుమానమేనని బీసీసీఐ అపెక్స్ కౌన్సిల్ మెంబర్ అన్షుమాన్ గైక్వాడ్ అభిప్రాయపడ్డాడు. కరోనా వైరస్ కారణంగా పర్యాటక వీసాలపై ఆరు నెలల పాటు ఆస్ట్రేలియా ప్రభుత్వం నిషేధం విధించగా.. ఆ గడువు సెప్టెంబరు వరకూ ఉండనుంది. దాంతో వరల్డ్‌కప్‌‌లో పోటీపడే జట్లు అక్టోబరులోపు అక్కడికి చేరుకునే సూచనలు కనిపించడం లేదు. దానికితోడు ఖాళీ స్టేడియాల్లో టోర్నీ నిర్వహించాలని ఆస్ట్రేలియా ప్రభుత్వం సూచిస్తుండటంతో.. రూ. కోట్లలో ఆదాయం చేజారనుంది. ఈ నేపథ్యంలో.. టోర్నీని వాయిదా వేయాలని అంతర్జాతీయ క్రికెట్ కౌన్సిల్ (ఐసీసీ), క్రికెట్ ఆస్ట్రేలియా (సీఏ) యోచిస్తున్నాయి.

షెడ్యూల్ ప్రకారం అక్టోబరు 18 నుంచి నవంబరు 15 వరకూ టీ20 వరల్డ్‌కప్ జరగాల్సి ఉండగా.. ఒకవేళ ఈ టోర్నీ వాయిదా లేదా రద్దయితే ఆ విండోలో ఐపీఎల్ 2020 సీజన్‌ని నిర్వహించాలని భారత క్రికెట్ నియంత్రణ మండలి (బీసీసీఐ) యోచిస్తోంది. షెడ్యూల్ ప్రకారం మార్చి 29 నుంచి ప్రారంభంకావాల్సిన ఐపీఎల్ 2020 సీజన్.. కరోనా వైరస్ కారణంగా నిరవధికంగా వాయిదాపడిన విషయం తెలిసిందే. ఒకవేళ ఐపీఎల్ 2020 సీజన్ రద్దయితే సుమారు రూ. 4000 కోట్లని బీసీసీఐ నష్టపోనుంది .

‘‘ఈ ఏడాది టీ20 వరల్డ్‌కప్ జరగడంపై నాకు సందేహాలున్నాయి. ఇక ఐపీఎల్ గురించి ఇప్పుడే ఏం చెప్పలేం. భారత్‌లో పరిస్థితులు అదుపులోకి వచ్చి.. టీ20 వరల్డ్ ‌కప్ వాయిదా పడితే..? అప్పుడు అక్టోబరు -నవంబరు విండోలో ఐపీఎల్‌ని నిర్వహించుకోవచ్చు’’ అని గైక్వాడ్ వెల్లడించాడు.



Source link

Leave a Reply

Your email address will not be published. Required fields are marked *