IPL 2020: దుబాయ్‌లో సన్‌రైజర్స్ విధ్వంసం.. ఢిల్లీ టార్గెట్ 220



ఐపీఎల్ 2020 సీజన్‌ ప్లేఆఫ్ రేసులో నిలవాలంటే తప్పక గెలవాల్సిన మ్యాచ్‌లో సన్‌రైజర్స్ హైదరాబాద్ టాప్ ఆర్డర్ చెలరేగిపోయింది. ఢిల్లీ క్యాపిటల్స్‌తో దుబాయ్ వేదికగా మంగళవారం రాత్రి జరుగుతున్న మ్యాచ్‌లో ఓపెనర్లు సాహా (87: 45 బంతుల్లో 12×4, 2×6), డేవిడ్ వార్నర్ (66: 34 బంతుల్లో 8×4, 2×6) ఆకాశమే హద్దుగా షాట్లు ఆడేయడంతో టాస్ ఓడి మొదట బ్యాటింగ్ చేసిన హైదరాబాద్ 2 వికెట్ల నష్టానికి 219 పరుగుల భారీ స్కోరు చేసింది. వార్నర్- సాహా దెబ్బకి ఢిల్లీ అగ్రశ్రేణి ఫాస్ట్ బౌలర్ కగిసో రబాడ 4 ఓవర్లలో ఏకంగా 54 పరుగులు సమర్పించుకున్నాడు.

మ్యాచ్‌లో టాస్ గెలిచిన ఢిల్లీ కెప్టెన్ శ్రేయాస్ అయ్యర్ ఫీల్డింగ్ ఎంచుకున్నాడు. దాంతో.. హైదరాబాద్ ఇన్నింగ్స్ ప్రారంభించిన డేవిడ్ వార్నర్- సాహా జోడీ తొలి ఓవర్‌ నుంచే బాదుడు మొదలెట్టింది. ఈ క్రమంలో రబాడాని కూడా వదల్లేదు.. అతను వేసిన ఓ ఓవర్‌లో వార్నర్ నాలుగు ఫోర్లు, ఒక సిక్స్ కొట్టడంతో ఏకంగా 22 పరుగుల్ని హైదరాబాద్ పిండుకుంది. అదే దూకుడులో కేవలం 25 బంతుల్లోనే వార్నర్ హాఫ్ సెంచరీ పూర్తి చేసుకోగా.. జట్టు స్కోరు 107 వద్ద వార్నర్‌ని అశ్విన్ ఔట్ చేసేశాడు. అయినప్పటికీ సాహా వెనక్కి తగ్గలేదు. స్పిన్నర్లు అశ్విన్, అక్షర్ పటేల్ బౌలింగ్‌లో క్రీజు వెలుపలికి వచ్చి మరీ భారీ షాట్లు ఆడేశాడు. అదే ఊపులో సెంచరీ చేసేలా కనిపించిన సాహాని నోర్తేజ్ ఔట్ చేయగా.. స్లాగ్ ఓవర్లలో మనీశ్ పాండే (44 నాటౌట్: 31 బంతుల్లో 4×4, 1×6), విలియమ్సన్ (11 నాటౌట్: 10 బంతుల్లో 1×4) నెమ్మదిగా ఆడారు.



Source link

Leave a Reply

Your email address will not be published. Required fields are marked *