ipl 2020 suspended: ఐపీఎల్ 2020 సీజన్‌పై బీసీసీఐ కీలక ప్రకటన – bcci officially suspends ipl 2020 due to coronavirus pandemic


క్రికెట్ అభిమానులు ఎంతో ఆసక్తిగా ఎదురుచూస్తున్న ఐపీఎల్ 2020 సీజన్‌‌ మళ్లీ సందిగ్ధంలో పడిపోయింది. దేశంలో కరోనా వైరస్ వ్యాప్తి పతాక స్థాయికి చేరుకోవడంతో ఈ ఏడాది ఐపీఎల్ సీజన్‌ని నిరవధికంగా వాయిదా వేస్తున్నట్లు భారత క్రికెట్ నియంత్రణ మండలి (బీసీసీఐ) అధికారికంగా గురువారం ప్రకటించింది.

షెడ్యూల్ ప్రకారం మార్చి 29 నుంచి ఐపీఎల్ 2020 సీజన్ ప్రారంభంకావాల్సి ఉండగా.. కరోనా వైరస్ కారణంగా తొలుత ఏప్రిల్ 15 వరకూ బీసీసీఐ వాయిదా వేసింది. కానీ.. గత మంగళవారం మీడియాతో మాట్లాడిన ప్రధాని నరేంద్ర మోడీ.. దేశంలో కరోనా వైరస్ ఇంకా అదుపులోకి రాకపోవడంతో లాక్‌డౌన్‌ని మే 3 వరకూ పొడిగించారు. దీంతో.. ఐపీఎల్‌ని మళ్లీ వాయిదా వేయడం మినహా బీసీసీఐ ముందు మరో ప్రత్యామ్నాయ మార్గం లేకపోయింది.

లాక్‌డౌన్ పొడిగింపు నిర్ణయం తర్వాత ఐపీఎల్‌లోని ఎనిమిది ఫ్రాంఛైజీలు, టోర్నీ బ్రాడ్‌కాస్టర్, స్పాన్సర్స్‌తో సుదీర్ఘంగా చర్చలు జరిగిన బీసీసీఐ పెద్దలు.. అందరి ఆమోదంతోనే ఐపీఎల్ 2020 సీజన్‌ని నిరవధికంగా వాయిదా వేసింది. ఒకవేళ ఈ ఏడాది ఐపీఎల్ రద్దయితే.. బీసీసీఐ సుమారు రూ.3869.5 కోట్లు నష్టపోనుందని ఓ అంచనా. ఆస్ట్రేలియా వేదికగా ఈ ఏడాది అక్టోబరులో టీ20 వరల్డ్‌కప్ జరగనుండగా.. ఒకవేళ ఈ టోర్నీని ఐసీసీ రద్దు చేస్తే..? ఆ సమయంలో ఐపీఎల్ 2020 సీజన్‌ని నిర్వహించే వీలున్నట్లు వార్తలు వస్తున్నాయి.



Source link

Leave a Reply

Your email address will not be published. Required fields are marked *