ivermectin for coronavirus : ఈ ఔషధం కరోనా వైరస్‌ను 48 గంటల్లోనే చంపేస్తుందట! – anti-parasitic drug ivermectin kills coronavirus within 48 hours in lab grown cells: australian study


కరోనా వైరస్ మహమ్మారికి ఇప్పటి వరకూ ఎలాంటి చికిత్సగానీ, టీకాగానీ అందుబాటులోకి రాలేదు. దీనిపై ప్రపంచవ్యాప్తంగా పరిశోధనలు కొనసాగుతున్నాయి. ఇప్పటికే పలు సంస్థలు క్లినికల్ ట్రయల్స్ ప్రారంభించాయి. అయితే, ఇవి మార్కెట్‌లోకి అందుబాటులోకి రావడానికి కొన్ని నెలలు పడుతుంది. ఈ నేపథ్యంలో, ఇప్పటికే అందుబాటులో ఉన్న ఒక యాంటీ వైరల్‌ ఔషధం.. కరోనా వైరస్‌ను సమర్ధంగా ఎదుర్కొంటుందని పరిశోధకులు గుర్తించారు. దీంతో, కరోనా వైరస్‌కు కొత్త చికిత్సలను అభివృద్ధి చేయడానికి ఇది వీలు కల్పిస్తుందని భావిస్తున్నారు.


‘ఐవెర్‌మెక్టిన్‌’ అనే ఈ ఔషధాన్ని ఇప్పటికే పలు రకాల ఇన్‌ఫెక్షన్లకు చికిత్స కోసం వాడుతున్నారు. హెచ్‌ఐవీ, డెంగీ, ఇన్‌ఫ్లూయెంజా, జికా వైరస్‌ సహా అనేక రకాల సూక్ష్మజీవులపై ఇది సమర్థంగా పనిచేస్తుందని వెల్లడయ్యింది. ఆస్ట్రేలియాలోని మోనాష్‌ యూనివర్సిటీకి చెందిన కైలీ వాగ్‌స్టాఫ్‌ నేతృత్వంలోని బృందం ఈ ఔషధాన్ని కరోనా వైరస్‌పై ప్రయోగించింది. ప్రయోగశాలలో అభివృద్ధి చేసిన వైరస్‌ను ఇది రెండు రోజుల్లోనే నిర్వీర్యం చేసినట్టు శాస్త్రవేత్తలు వెల్లడించారు. ‘ఒక డోస్‌తో వైరస్‌కు సంబంధించిన ఆర్‌ఎన్‌ఏను 48 గంటల్లో పూర్తిగా నిర్మూలించొచ్చని గుర్తించాం. 24 గంటల్లోనే గణనీయ స్థాయిలో వైరస్‌ తగ్గిపోయింది’ అని కైలీ వెల్లడించారు. ఈ ప్రయోగాలను ల్యాబ్‌లోనే చేశామని, మానవులపై ఇంకా పరీక్షించాల్సి ఉందని ఆయన పేర్కొన్నారు.

ఈ పరిశోధన వివరాలను యాంటీవైరల్ రిసెర్చ్ జర్నల్‌లో ప్రచురించారు. ఐవర్‌మెక్టిన్‌ చాలా సురక్షితమైందని, విస్తృతంగా వినియోగించి మానవులపై ఎంత ప్రభావం చూపుతుందో గుర్తించాలన్నారు. అయితే, ప్రపంచానికి పెను ముప్పుగా పరిణమించిన మహమ్మారికి అడ్డుకోడానికి ఎలాంటి చికిత్స లేని ప్రస్తుత తరుణంలో అందుబాటులో ఉన్న ఈ ఔషదం ఎంతో ఉపయోగపడుతుందని ఆమె తెలిపారు.

కోవిడ్-19పై ఐవర్‌మెక్టిన్ ఎంత వరకు పనిచేస్తుందో తెలియకపోయినా, ఇతర వైరస్‌లపై దాని చర్య ఆధారంగా కరోనాను నియంత్రించాడానికి ఉపకరిస్తుందని శాస్త్రవేత్తలు చెప్పారు. కరోనా వైరస్‌కు విరుగుడుగా ఐవెర్‌మెక్టిన్ ఉపయోగిస్తే ఫలితం ఉంటుందని పరిశోధనలో తేలడం శుభపరిణామమని రాయల్ మెల్‌బోర్న్ హాస్పిటల్ వైరాలజిస్ట్ డాక్టర్ లియోన్ కాలై వ్యాఖ్యానించారు. చైనా వెలుపల ఈ ఏడాది జనవరిలో సార్స్-కోవి2 జన్యువులను వేరుచేసిన బృందంలో ఈయన కీలక పాత్ర పోషించారు.





Source link

Leave a Reply

Your email address will not be published. Required fields are marked *