Jessica Lal murder case: మోడల్ జెస్సికా లాల్‌ హంతకుడు మనుశర్మ విడుదల – jessica lal’s killer manu sharma freed from tihar jail in delhi


ప్రముఖ మోడల్, పబ్ టెండర్ జెస్సికా లాల్ హంతకుడు మనుశర్మకు గొప్ప ఊరట లభించింది. సంచలనం సృష్టించిన ఈ హత్య కేసులో దోషిగా శిక్ష అనుభవిస్తున్న మనుశర్మ అలియాస్‌ సిద్ధార్థ్‌‌ వశిష్ట.. తీహార్‌ జైలు నుంచి విడుదలయ్యాడు. సెంటెన్స్‌ రివ్యూ బోర్డు (ఎస్సార్బీ) సిఫార్సు మేరకు.. వివిధ నేరాల్లో శిక్ష అనుభవిస్తున్న దోషులను విడుదల చేసేందుకు ఢిల్లీ లెఫ్టినెంట్‌ గవర్నర్‌ అనుమతి ఇచ్చారు. దీంతో మను శర్మతో పాటు మరో 18 మంది విడుదలయ్యారు.

కరోనా వ్యాప్తి నేపథ్యంలో మనుశర్మ ఇప్పటికే పెరోల్‌ మీద బయటకు వచ్చాడు. ఈ నేపథ్యంలో అతడికి పూర్తి స్థాయిలో జైలు నుంచి విముక్తి లభించింది. కాంగ్రెస్‌ నేత వినోద్‌ శర్మ కుమారుడే మనుశర్మ.

మద్యం సర్వ్ చేయలేదనే కోపంతో..
ఓ ప్రైవేట్ బార్‌లో పనిచేస్తున్న జెస్సికా లాల్‌ను 1999లో మను శర్మ అత్యంత దారుణంగా హత్య చేశాడు. సమయం మించిపోయిన కారణంగా మద్యం సర్వ్‌ చేయడానికి ఆమె నిరాకరించింది. దీంతో ఆగ్రహానికి గురైన మనుశర్మ ఆమెను పాయింట్‌ బ్లాంక్‌లో తుపాకీతో కాల్చి చంపాడు. పోలీసులు మను శర్మ మీద కేసు నమోదు చేసి అరెస్ట్‌ చేశారు.

2006లో మనుశర్మ నేరం నిరూపితం కావడంతో న్యాయస్థానం అతడికి యావజ్జీవ కారాగార శిక్ష విధించింది. దీంతో అతడు సుప్రీంకోర్టును ఆశ్రయించాడు. 2010లో సుప్రీంకోర్టు.. దిగువ కోర్టు ఇచ్చిన తీర్పును సమర్థిస్తూ తీర్పు చెప్పడంతో అతడిని తీహార్ జైలుకు తరలించారు. నాటి నుంచి అతడు అక్కడే శిక్ష అనుభవిస్తున్నాడు.

గత రెండేళ్లుగా సత్ప్రవర్తనతో మెలుగుతున్న కారణంగా ఉదయం 8 నుంచి సాయంత్రం 6 వరకు బయటకు వెళ్లి పని చేసేందుకు మను శర్మకు అవకాశం కల్పించారు. ఖైదీల పునరావాస కేంద్రంలో అతడు పనిచేస్తున్నాడు. మను శర్మలో మార్పు వచ్చిందని భావించిన జెస్సికా సోదరి సబ్రినా లాల్‌ కూడా అతడిని విడుదల చేస్తే తమకెలాంటి అభ్యంతరం లేదని 2018లో జైళ్ల శాఖకు లేఖ రాశారు.

అయితే.. ముందస్తుగా తనను విడుదల చేయాలంటూ రెండేళ్ల కిందట మను శర్మ చేసిన అభ్యర్థనను ఢిల్లీ ప్రభుత్వం తిరస్కరించింది. అత్యంత హేయమైన నేరం చేసిన మను శర్మకు ఆ అవకాశం ఇవ్వబోమని స్పష్టం చేసింది. అనేక పరిణామాల అనంతరం మను శర్మను విడుదల చేయాల్సిందిగా ఎస్సార్బీ సూచించింది. దీంతో అతడు మూడేళ్ల ముందుగానే జైలు నుంచి విడుదలయ్యాడు. విచారణ ఖైదీగా, దోషిగా సుమారు 23 ఏళ్లు అతడు జైల్లోనే ఉన్నాడు.

Also Read:దేశంలో 2 లక్షలు దాటిన కరోనా కేసులు.. 15 రోజుల్లోనే రెట్టింపు



Source link

Leave a Reply

Your email address will not be published. Required fields are marked *