Kane Williamson: SRH vs KKR: నొప్పిని భరిస్తూనే ఓపెనర్‌గా.. విలియమ్సన్‌ అంకితభావం.. ఫ్యాన్స్ ఫిదా! – ipl 2020: twitter heaps praise on kane williamson as opens against kkr despite hamstring injury


కోల్‌కతా నైట్ రైడర్స్‌తో జరిగిన మ్యాచ్‌లో సన్‌రైజర్స్ హైదరాబాద్ సూపర్ ఓవర్లో ఓడింది. ఈ మ్యాచ్‌లో విజయం ఖాయం అనుకున్న దశలో మ్యాచ్ టై కావడం.. సూపర్ ఓవర్లో ఫెర్గ్యూసన్ బౌలింగ్‌లో సన్‌రైజర్స్ బ్యాట్స్‌మెన్ నిలువలేకపోవడం బాధాకరమే. కానీ ఛేజింగ్‌లో సన్‌రైజర్స్ బ్యాటింగ్ ఆర్డర్‌లో చేసిన మార్పులు ఆసక్తి రేపాయి. ఈ మ్యాచ్‌లో వార్నర్ బదులు కేన్ విలియమ్సన్ ఓపెనర్‌గా బరిలో దిగడం అందర్నీ ఆశ్చర్యపరిచింది.

కానీ ఆరెంజ్ ఆర్మీ బ్యాటింగ్ మొదలుపెట్టిన కాసేపటికే ఫ్యాన్స్‌కు అసలు విషయం అర్థమైంది. తొడ కండరాల గాయంతో ఇబ్బందిపడుతున్న విలియమ్సన్.. వికెట్ల మధ్య పరిగెత్తాల్సిన అవసరం తగ్గించడం కోసమే ఈ మార్పు చేశారని స్పష్టమైంది. వికెట్ల మధ్య పరిగెత్తే సమయంలో అసౌకర్యంగా ఫీలయిన విలియమ్సన్.. పవర్ ప్లే నిబంధనలను సద్వినియోగం చేసుకొని 4 ఫోర్లు, ఒక సిక్స్ సాయంతో 19 బంతుల్లోనే 29 రన్స్ చేసి ఔటయ్యాడు.
సన్‌రైజర్స్ ఫీల్డింగ్ చేస్తుండగా.. విజయ్ శంకర్ వేసిన ఇన్నింగ్స్ 11వ ఓవర్లో పాయింట్‌లో ఉన్న విలియమ్సన్ బౌండరీ ఆపేందుకు డైవ్ చేశాడు. కానీ విలియమ్సన్‌కు అందకుండా ఫోర్‌గా వెళ్లగా.. విలియమ్సన్ మాత్రం గాయపడ్డాడు. సన్‌రైజర్స్ బ్యాటింగ్ ప్రారంభానికి ముందు ఫిజియో సమక్షంలో కొద్ది దూరం పరిగెత్తుతూ కనిపించాడు.

గాయం వేధిస్తున్నా.. జట్టు అవసరాల కోసం కేన్ విలియమ్సన్ ఓపెనింగ్ చేసి శక్తిమేరా ఆడిన తీరు అభిమానులను కట్టి పడేసింది. దీంతో విలియమ్సన్‌ను ప్రశంసలతో ముంచెత్తుతున్నారు.
‘‘కెప్టెన్‌ (వార్నర్)పై నిషేధం వేటు పడింది. నువ్వు జట్టును నడిపిస్తావా..? మనీష్ పాండే రాణించడం లేదు.. నువ్వు మూడోస్థానంలో ఆడతావా? మిడిలార్డర్ బలహీనంగా ఉంది.. నువ్వు ఫినిషర్ రోల్‌‌లో ఆడతావా..? అదనపు స్పిన్నర్ కావాలి.. నువ్వు బౌలింగ్ చేస్తావా..? వార్నర్ లోయర్ ఆర్డర్‌లో ఆడాలనుకుంటున్నాడు.. నువ్వు ఓపెనర్‌గా బరిలో దిగుతావా..? ఈ ప్రశ్నలన్నింటికి అవుననే విలియమ్సన్ సమాధానం ఇచ్చాడు’’ అంటూ సోషల్ మీడియాలో ఫ్యాన్స్ పోస్టులు చేస్తున్నారు.
2019 వరల్డ్ కప్‌లో న్యూజిలాండ్ జట్టును అన్నీ తానై నడిపించిన విలియమ్సన్.. 2018లో వార్నర్ ఐపీఎల్‌కు దూరం కాగా.. సన్‌రైజర్స్‌ను ముందుండి నడిపించాడు. విలియమ్సన్ టీ20 బ్యాట్స్‌మెన్ కాదన్న వారి అభిప్రాయం తప్పని రుజువు చేస్తూ.. ఆ సీజన్లో 17 ఇన్నింగ్స్‌ల్లో 142.44 స్ట్రైక్ రేట్, 52.50 సగటుతో 735 రన్స్ చేసి ఆరెంజ్ క్యాప్ దక్కించుకున్నాడు.



Source link

Leave a Reply

Your email address will not be published. Required fields are marked *