karnataka pregnant woman: గర్భిణీని అనుమతించని అపార్ట్‌మెంట్.. కడుపులో బిడ్డ మృతి, కోటి ఆశలతో స్వదేశం వస్తే..! – covid-19 negative pregnant woman denied entry by apartment in mangaluru, child dies in womb


లాక్‌డౌన్‌తో దుబాయ్‌లో చిక్కుకున్న ఆ గర్భిణి కోటి ఆశలతో స్వదేశీ గడ్డపై అడుగుపెట్టారు. పుట్టబోయే బిడ్డ గురించి ఎన్నో కలలు కన్నారు. మాతృభూమిపై మాతృత్వాన్ని మరింత మధురం చేసుకుందామని అనుకున్నారు. కానీ, తానొకటి తలిస్తే.. విధి మరొకటి తలిచింది. పొరుగింటివారి అమానుషం ఆమె పాలిట శాపమైంది. ఎన్నో కష్టాలకోర్చి విదేశాల నుంచి వచ్చిన ఆమెను తన ఇంట్లోకి వెళ్లనీయకుండా అపార్ట్‌మెంట్‌వాసులు అడ్డుకున్నారు. చేసేదేంలేక స్థానిక ఆస్పత్రుల్లో ప్రయత్నించగా అక్కడ కూడా ఎవరూ చేర్చుకోలేదు. ఊహించని ఈ పరిణామంతో ఆమె తీవ్ర ఒత్తిడికి, మానసిక వేదనకు గురయ్యారు. దీంతో కడుపులో పెరుగుతున్న బిడ్డ కడుపులోనే కన్నుమూసింది. ఈ హృదయవిదారక ఘటన కర్ణాటకలోని మంగళూరులో చోటు చేసుకుంది.

ఆరు నెలల గర్భిణి అయిన ఆ మహిళ.. భారత ప్రభుత్వం చేపట్టిన ‘వందే భారత్‌ మిషన్’లో భాగంగా దుబాయ్‌ నుంచి మే 12న విమానంలో బెంగళూరు చేరుకున్నారు. అనంతరం అధికారులు ఆమెను మంగుళూరులో ఓ క్వారంటైన్‌ కేంద్రానికి తరలించారు. ఆమె మూడు రోజుల పాటు అక్కడే ఉన్నారు. వైద్య సిబ్బంది ఆమెకు కరోనా పరీక్షలు నిర్వహించగా.. నెగటివ్‌‌గా తేలింది. దీంతో హోమ్‌ క్వారెంటైన్‌ ముద్ర వేసి ఇంటికి వెళ్లాల్సిందిగా సూచించారు.

క్వారంటైన్ కేంద్రం నుంచి తన ఇంటి వద్దకు చేరుకున్న ఆ మహిళను అపార్ట్‌మెంట్‌ వాసులు లోనికి అనుమతించలేదు. ఆ తర్వాత స్థానిక ఆస్పత్రుల్లోనూ ఎవరూ చేర్చుకోలేదు. చివరికి బాధితురాలిని ఓ హోటల్‌కు తరలించగా.. అక్కడ ఆమె హైపర్‌ టెన్షన్‌కు గురయ్యారు. దీంతో ఆమె ప్రాణాలకు ప్రమాదం ఏర్పడిందని బంధువులు తెలిపారు. తర్వాత చికిత్స నిమిత్తం ఓ ప్రైవేట్ ఆస్పత్రిలో చేర్పించగా.. కడుపులో బిడ్డ అప్పటికే మరణించినట్లు వైద్యులు చెప్పారని వెల్లడించారు. ఆమె పరిస్థితి విషమంగా ఉందని వైద్యులు తెలిపినట్లు వారు చెప్పారు.

ఈ ఘటనపై మంగళూరు కమిషనర్‌ స్పందించారు. గర్భిణి నివాసం ఉన్న అపార్ట్‌మెంట్‌ అసోసియేషన్‌ సభ్యులకు నోటీసులు జారీ చేశామని.. ఆ గర్భిణీని ఎందుకు అనుమతించలేదో వివరణ ఇవ్వాలని కోరినట్లు తెలిపారు. బాధిత మహిళ తన ఇంట్లోకి వెళ్లాలని భావిస్తే.. అందుకు ఎవరూ అడ్డుకోలేరని కమిషనర్‌ స్పష్టం చేశారు.

Don’t Miss:లాక్‌డౌన్ 5.0 తప్పదా? పొడిగిస్తే ఎలా ఉండబోతుంది?

Also Read:అది సిగ్గుపడాల్సిన విషయం కాదు, అబ్బాయిలు కూడా తెలుసుకోవాలి: స్మృతి ఇరానీ



Source link

Leave a Reply

Your email address will not be published. Required fields are marked *