kcr: మన రైతులు ప్రపంచంతో పోటీ పడడమే నా లక్ష్యం: కేసీఆర్ – cm kcr reviews with official on controlled agriculture policy in pragathi bhavan


తెలంగాణలో రైతులు నియంత్రిత విధానంలో పంటలు సాగు చేసి వందశాతం రైతుబంధు సాయం, చక్కని ధర పొందాలని ముఖ్యమంత్రి కేసీఆర్ ఆకాంక్షించారు. మార్కెట్‌లో మంచి డిమాండ్‌, నాణ్యమైన పంటలు పండించడం ద్వారానే రైతులు మంచి ధర పొందగలుగుతారని సీఎం కేసీఆర్‌ అన్నారు. ఏ పంట వేయడం ద్వారా మేలు కలుగుతుందనే విషయంలో వ్యవసాయశాఖ, వ్యవసాయ యూనివర్సిటీ తగిన సూచనలు చేస్తుందని తెలిపారు. నియంత్రిత పద్దతిలో పంటలు సాగు చేసే విధానంపై ప్రగతిభవన్‌‌లో ముఖ్యమంత్రి కేసీఆర్‌ గురువారం సమీక్ష నిర్వహించారు. ఈ సమావేశంలో జిల్లాల వ్యవసాయ అధికారులు, రైతు బంధు సమితి అధ్యక్షులతో సీఎం ముఖాముఖి నిర్వహించారు. వారి అభిప్రాయాలు తెలుసుకుని పలు సూచనలు చేశారు.

సమావేశంలో సీఎం కేసీఆర్‌ మాట్లాడుతూ.. రైతులంతా ఒకే పంట వేయడం ద్వారా డిమాండ్‌ పడిపోయి నష్టపోతున్నారని గుర్తు చేశారు. ఈ పరిస్థితిని నివారించడానికి ప్రభుత్వం ఎన్నో విధాలుగా ఆలోచించి, నియంత్రిత పద్ధతిని అందుబాటులోకి తెస్తోందని అన్నారు. ఇందులో భాగంగా ఏ పంటలు సాగు చేయాలో ప్రభుత్వమే సూచిస్తుందని అన్నారు. ఏ సీజన్‌లో ఏ పంట.. ఎక్కడ.. ఏ రకం.. సాగు చేయాలి.. అనే విషయాలను వ్యవసాయ శాస్త్రవేత్తలు నిర్ణయించారని సీఎం చెప్పారు. ఏ పంటకు మార్కెట్‌లో డిమాండ్‌ ఉందో ఆగ్రో బిజినెస్‌ విభాగం వారు తేల్చారని చెప్పారు. దాని ప్రకారం ప్రభుత్వం రైతులకు తగిన సూచనలు చేస్తుందని, ప్రభుత్వం చెప్పినట్లు పంటలు వేస్తే రైతులు నస్టపోయే అవకాశం ఉండదని సీఎం కేసీఆర్‌ నిర్దేశించారు.

పంట సాగు చేస్తే రైతులకు ఏ ఇబ్బంది ఉండదని సీఎం భరోసా ఇచ్చారు. తెలంగాణ రైతులు ప్రపంచంతో పోటీ పడే రైతాంగంలా మారాలని ఆకాంక్షించారు. రాష్ట్రంలో వ్యవసాయం ప్రధాన భాగమని.. వ్యవసాయ భవిత మెరుగ్గా ఉండాలని అన్నారు. ప్రపంచానికి నాణ్యమైన ఉత్పత్తులు అందించి లాభాలు గడించాలని కేసీఆర్ సూచించారు.

వలస కార్మికులపై సీఎస్‌కు ఆదేశం
తెలంగాణ రాష్ట్రం నుంచి ఏ ఒక్క వలస కార్మికుడు కాలినడకన తన సొంత రాష్ట్రానికి వెళ్లాల్సిన దుస్థితి రాకుండా చూడాలని ముఖ్యమంత్రి కేసీఆర్ అధికారులను అదేశించారు. వలస కార్మికులు తమ సొంత ప్రాంతానికి పోవడానికి అవసరమైన రైళ్లు సమకూర్చాలని సీఎస్ ను ఆదేశించారు. రైళ్లు లేని ప్రాంతాల నుంచి అవసరమైతే బస్సుల ద్వారా తరలించాలని సూచించారు. తమ సొంత ప్రాంతానికి వెళ్లాలని కోరుకునే వలస కార్మికులెవరు నడిచి పోవాలనే ఆలోచన చేయవద్దని, తెలంగాణ ప్రభుత్వం పూర్తి బాధ్యత తీసుకుని తమ సొంత ప్రాంతాలకు తరలిస్తుందని ముఖ్యమంత్రి చెప్పారు.



Source link

Leave a Reply

Your email address will not be published. Required fields are marked *