Kesineni Nani: టీడీపీ ఎంపీపై కేసు నమోదు.. ఆపేది లేదంటూ కేశినేని నాని సవాల్ – vijayawada police filed a case against tdp mp kesineni nani due to lockdown violation


లాక్ డౌన్ విధించినప్పటి నుంచి ఎప్పటికప్పుడు ప్రజలకు సేవాకార్యక్రమాలు నిర్వహిస్తూ, సోషల్ మీడియాలో యాక్టివ్‌గా ఉండే తెలుగు దేశం పార్టీ ఎంపీ కేశినేని నానిపై నిబంధనలు ఉల్లంఘించారంటూ పోలీసులు కేసు నమోదు చేశారు. ఈ మేరకు విజయవాడ సిటీ వెస్ట్ జోన్ ఏసీపీ శనివారం ఓ ప్రకటన విడుదల చేశారు. ఈ నెల 1వ తేదీన ఉదయం విజయవాడ నగరంలోని 2వ పట్టణ పోలీస్ స్టేషన్ పరిధిలో 47వ డివిజన్‌లోని గుజ్జారి యల్లారావు కూరగాయల మార్కెట్ సముదాయం ఎదురుగా టీడీపీకి చెందిన విజయవాడ పార్లమెంటు సభ్యుడు కేశినేని నాని, నాగుల మీరా, నాగోతి రామారావు, గుర్రం కొండా, పోతినేడి లోకేష్, కూరాకుల మల్లేశ్వరరావు సహా పలువురు ప్రభుత్వ లాక్ డౌన్ నిబంధనలకు విరుద్ధంగా ప్రవర్తించారన్నారు.

కనీస సామాజిక దూరం పాటించకుండా పెద్ద ఎత్తున్న ప్రజలను జమచేసి ప్రాణాంతక కరోనా వ్యాధి వ్యాప్తి చెందే విధంగా ప్రవర్తించి కూరగాయల పంపిణీ చేశారని ఏసీపీ పేర్కొన్నారు. కాబట్టి, ప్రభుత్వ ఉత్తర్వులు ఉల్లంఘించి కరోనా వ్యాప్తి చెందేందుకు కారణమైన వారందరిపై విజయవాడ రెండో పట్టణ పోలీస్ స్టేషన్ నుందు పలు సెక్షన్ల కింద కేసు నమోదు చేసినట్లు వెల్లడించారు.

అయితే విజయవాడ సిటి పోలీసులకు ఎంపీ కేశినేని నాని ధీటుగా సమాధానమిచ్చారు. ఈ మేరకు ఎంపీ నాని శనివారం ట్వీట్ చేశారు. కరోనా విపత్తు సమయంలో తిండి లేక అలమటిస్తున్న పేదలకు సహాయం చేస్తునందుకు దొంగ కేసులు బనాయించిన విజయవాడ నగర పోలీసులకు ధన్యవాదాలు అంటూ సెటైర్లు వేశారు. పోలీసులు ఎన్ని దొంగ కేసులు పెట్టినా భయపడేది లేదని, ఆకలితో అలమటిస్తున్న వారిని ఆదుకోవడాన్ని ఆపేది లేదని తేల్చి చెప్పారు. ప్రజలు ఎన్నుకుంది వారు ఆపదలో ఉన్నపుడు ఇంట్లో కూర్చోవడానికి కాదని స్పష్టం చేశారు.



Source link

Leave a Reply

Your email address will not be published. Required fields are marked *