Kim Jong Un: అంతుచిక్కని కిమ్ వ్యవహారశైలి.. ఉత్తర కొరియా అధికారిక మీడియా సంచలన ప్రకటన – north korea president kim jong un wants to increase nuclear war deterrence:state media reports


వివాదాలతో సావాసం చేసే ఉత్తర కొరియా అధ్యక్షుడు కిమ్ జోంగ్ ఉన్ వ్యవహారశైలి మరోసాారి చర్చనీయాంశమవుతోంది. నిరంతం అణు పరీక్షలతో ప్రపంచ దేశాలను కలవరానికి గురిచేయడం ఆయనకు ఫ్యాషన్‌గా మారిపోయింది. ఊరందరిదీ ఒకదారి ఉలిపిరి కట్టది మరోదారి అన్నట్టు ఉంది ఆయన వ్యవహారశైలి. ప్రపంచం మొత్తం కంటికి కనిపించని ఉమ్మడి శత్రువు కరోనా వైరస్‌తో పోరాటం చేస్తుంటే.. అణ్వాయుధ సామర్ధ్యాన్ని మరింత పెంచుకోడానికి సిద్ధమైనట్టు తెలుస్తోంది. ఇందుకు విధానాలను కిమ్ జోంగ్ ఉన్ రూపొందిస్తున్నట్టు ఉత్తర కొరియా అధికారిక మీడియా ‘కేసీఎన్‌ఏ’ వెల్లడించింది.

ఈ అంశంపై గత కొన్ని రోజులుగా సెంట్రల్‌ మిలిటరీ కమిషన్‌తో విస్తృత మంతనాలు జరిపినట్లు పేర్కొంది. అయితే, దీని గురించి పూర్తి వివరాలను మాత్రం వెల్లడించకపోవడం గమనార్హం. అలాగే సైనిక బలగాల్ని మరింత పటిష్ఠం చేసేందుకు తీసుకోవాల్సిన చర్యలపైనా చర్చలు జరిగినట్లు తెలిపింది. అంతేకాదు, మొత్తం ఏడు ముఖ్యమైన నిర్ణయాలపై కిమ్ సంతకాలు చేసినట్టు వెల్లడించింది. ఇందులో ప్రధానంగా సైనిక విద్యాసంస్థల బాధ్యతలు, పాత్రను పెంచాలని, రక్షణ వ్యవస్థల మధ్య లక్ష్యాల్ని చేరుకునేలా మిలిటరీ కమాండ్‌ వ్యవస్థని పునర్‌వ్యవస్థీకరించాలని నిర్ణయించినట్లు తెలిపింది.

రక్షణ వ్యవస్థలోని రాజకీయ, సైనికపరమైన లోపాలపై చర్చించి వాటిని అధిగమించేందుకు తీసుకోవాల్సిన చర్యలపై చర్చించారని పేర్కొంది. సాయుధ దళాల సామర్థ్యాలలో విప్లవాత్మక మార్పులకు ప్రాముఖ్యత కలిగిన చారిత్రాత్మక మలుపుగా ఈ సమావేశం పనిచేస్తుందని అధికారిక మీడియా వ్యాఖ్యానించింది.

ఇప్పటికే పలు శక్తిమంతమైన అణ్వాయుధాల్ని పరీక్షించి ప్రపంచదేశాల ఆందోళనకు గురిచేస్తున్న కిమ్‌ తాజా చర్యలతో ఎలాంటి వ్యూహాలు రచిస్తున్నారోననే దానిపై చర్చ జరుగుతోంది. 28 ఏళ్ల తర్వాత తొలిసారి అణు పరీక్షలకు అమెరికా సిద్ధమవుతోందంటూ ‘వాషింగ్టన్‌ పోస్ట్‌’ఇటీవల ఓ కథనం ప్రచురించింది. ఈ నేపథ్యంలో కిమ్‌ వ్యూహాలు బయటకు రావడం ప్రాధాన్యత సంతరించుకుంది. చైనా, రష్యా నుంచి ఎదురవుతున్న సవాళ్లకు హెచ్చరికగా అణుపరీక్షలకు అమెరికా సిద్ధమవుతున్నట్లు సమాచారం.

కిమ్‌ ఆరోగ్యంపై గత నెలలో ముమ్మర ప్రచారం జరిగింది. ఆయన ఆరోగ్యం బాగా క్షీణించిందని, గుండెకు సంబంధించి శస్త్రచికిత్స జరిగిన సమయంలో కోమాలోకి వెళ్లారనే ఊహాగానాలు జోరుగా కొనసాగాయి. అయితే, వాటన్నింటికీ తెరదించుతూ మూడు వారాల తర్వాత ఓ అధికారిక కార్యక్రమంలో ఆయన పాల్గొన్నారు. దీంతో ఆయన పూర్తి ఆరోగ్యంగా ఉన్నారని నిర్ధారణ అయ్యింది. అప్పటి నుంచి తిరిగి ఓ అధికారిక కార్యక్రమంలో కిమ్‌ పాల్గొనడం ఇదే తొలిసారని కేసీఎన్‌ఏ తెలిపింది.

ఈ ఏడాది మార్చి ప్రారంభంలో గుర్తుతెలియని ఓ క్షిపణిని జపాన్ తీరానికి దగ్గరగా ప్రయోగించింది. నెల రోజుల వ్యవధిలోనే ఆరు క్షిపణులకు ఉత్తర కొరియా పరీక్షించడం విశేషం. అణు నిరాయుధీకరణకు సంబంధించి ఉత్తర కొరియా, అమెరికాల మధ్య చర్చలు అర్ధాంతరంగా నిలిచిపోయాయి. ఈ నేపథ్యంలో చర్చలను ప్రారంభానికి ఈ ఏడాది చివరి వరకు మాత్రమే గడువు ఉందని అమెరికాను కిమ్ హెచ్చరించాడు. ఆ గడువులోగా అమెరికా చర్చలను ప్రారంభించకపోతే అణ్వాయుధ ప్రయోగాలు మొదలుపెడతామని నూతన సంవత్సర వేడుకల్లో కిమ్ వ్యాఖ్యానించాడు.



Source link

Leave a Reply

Your email address will not be published. Required fields are marked *