Kiren Rijiju : కరోనాతో ఫైట్‌కి క్రీడల మంత్రి రూ. కోటి విరాళం – union sports minister kiren rijiju donates rs 1 crore from mplad fund


దేశంలో కరోనా వైరస్ కట్టడి కోసం ప్రభుత్వానికి సాయం అందించేందుకు సెలెబ్రిటీలు పెద్ద ఎత్తున ముందుకు వస్తున్నారు. ఇప్పటికే మాజీ క్రికెటర్లు గౌతమ్ గంభీర్, సచిన్ టెండూల్కర్ రూ. 50 లక్షల చొప్పున విరాళాలు ప్రకటించగా.. టీమిండియా మిడిలార్డర్ బ్యాట్స్‌మెన్ సురేశ్ రైనా రూ. 52 లక్షలు అందజేశాడు. ఇక భారత క్రికెట్ నియంత్రణ మండలి (బీసీసీఐ) అధ్యక్షుడు సౌరవ్ గంగూలీ రూ .50లక్షల విలువైన బియ్యాన్ని పేదలకి పంచుతున్నాడు. తాజాగా కేంద్ర క్రీడల మంత్రి కిరణ్ రిజిజు రూ. కోటి విరాళాన్ని ప్రకటించాడు.


కరోనా వైరస్‌తో పోరాటానికి బీజేపీ ఎంపీలు తమ వంతుగా సాయపడాలని ప్రధాని నరేంద్ర మోడీ పిలుపునివ్వడంతో స్పందించిన కిరణ్ రిజిజు.. తన ఎంపీల్యాడ్ ఫండ్ నుంచి రూ. కోటిని విరాళంగా అందజేస్తున్నట్లు ప్రకటించారు. ఈ మొత్తాన్ని ప్రధాని నేషనల్ రిలీఫ్ ఫండ్‌‌లో డిపాజిట్ చేసినట్లు మంత్రి తెలియజేశారు. కరోనా వైరస్ వ్యాప్తి ప్రమాదాన్ని ముందే పసిగట్టిన కిరణ్ రిజిజు.. ఐపీఎల్ వాయిదా విషయంలో బీసీసీఐని మొదటి నుంచే అప్రమత్తం చేస్తూ వచ్చాడు. మార్చి 29 నుంచి ఐపీఎల్ 2020 సీజన్ ప్రారంభంకావాల్సి ఉండగా.. కరోనా వైరస్ కారణంగా ఏప్రిల్ 15కి వాయిదా పడిన విషయం తెలిసిందే.

భారత్‌లో శనివారం రాత్రికి కరోనా వైరస్ పాజిటివ్ కేసులు సుమారు వెయ్యికి చేరువకాగా.. ఇప్పటికే అధికారికంగా 21 మంది చనిపోయారు. దీంతో.. ఇప్పటికే 21 రోజుల పాటు లాక్‌డౌన్ విధించిన కేంద్ర ప్రభుత్వం మరింత అప్రమత్తమవుతోంది. ముఖ్యంగా.. విదేశాల నుంచి వచ్చిన వారిపై ప్రత్యేక శ్రద్ధ పెట్టాలని రాష్ట్ర ప్రభుత్వాలని ఆదేశిస్తోంది.





Source link

Leave a Reply

Your email address will not be published. Required fields are marked *