kondapochamma sagar: తెలంగాణ కల సాకారం.. కొండపోచమ్మ సాగర్ విశేషాలివే! – kaleshwaram project: all you need to know about kondapochamma sagar reservoir


గోదావరి జలాలు కొండపోచమ్మను అభిషేకించే అద్భుత ఘట్టం తెలంగాణలో ఆవిష్కారం అవుతోంది. కాళేశ్వరం జలాలు సముద్ర మట్టానికి 618 మీటర్ల ఎత్తున ఉన్న కొండపోచమ్మ సాగర్ జలాశయాన్ని చేరుతున్నాయి. గోదావరి జలాలు ఇంత ఎత్తుకు చేరుతుండటం అరుదైన విషయం. సీఎం కేసీఆర్ చేతుల మీదుగా కొండపోచమ్మ సాగర్ రిజర్వాయర్ ప్రారంభం అవుతోంది. 15 టీఎంసీల సామర్థ్యం ఉన్న ఈ రిజర్వాయర్ ద్వారా ఐదు జిల్లాల్లోని 2.85 లక్షల ఎకరాల వర్షాధార భూములకు సాగునీరు అందనుంది.

కాళేశ్వర ప్రాజెక్టులో భాగంగా నిర్మించిన రెండో అతిపెద్ద జలాశయం కొండపోచమ్మ సాగర్ కాగా.. తెలంగాణలో అత్యంత ఎత్తులో నిర్మించిన జలాశయం ఇదే కావడం విశేషం. మేడిగడ్డ వద్ద 100 మీటర్ల ఎత్తుకు కాళేశ్వరం జలాలు చేరగా.. అక్కడి నుంచి మరో 518 మీటర్ల ఎత్తులో ఉన్న కొండపోచమ్మ జలాశయంలోకి నీటిని ఎత్తిపోస్తారు. ఈ జలాశయం నుంచి గ్రావిటీ ద్వారా పంట చేలకు నీటిని అందిచొచ్చు. చెరువులను నింపొచ్చు.

కొండపోచమ్మ రిజర్వాయర్‌ హైదరాబాద్‌ నగరానికి 50 కిలోమీటర్ల దూరంలో ఉంది. సీఎం కేసీఆర్ ప్రాతినిధ్యం వహించే గజ్వేల్ నియోజకవర్గంలోని అత్యధిక శాతం ఆయకట్టుకు ఈ రిజర్వాయర్ నుంచి నీరు అందుతుంది. కొండపోచమ్మ జలాశయం పనులను 2018 జనవరిలో ప్రారంభించి ఏడాదిలోగా పూర్తి చేశారు. ఈ రిజర్వాయర్ కోసం 4 ఊళ్లను ఖాళీ చేయించారు.

కాళేశ్వరం ప్రాజెక్టులో భాగంగా మేడిగడ్డ నుంచి జలాలను ఎల్లంపల్లికి తరలిస్తున్నారు. అక్కడి నుంచి మిడ్ మానేర్‌కు, రంగనాయక సాగర్‌కు మళ్లిస్తున్నారు. కాళేశ్వరం ప్రాజెక్టులో అతిపెద్ద రిజర్వాయర్ మల్లన్న సాగర్. 50 టీఎంసీల సామర్థ్యం ఉన్న ఈ రిజర్వాయర్ నిర్మాణం ఇంకా పూర్తి కాలేదు. దీంతో మల్లన్నసాగర్‌ నుంచి 18 కిలోమీటర్ల మేర కాలువ తవ్వి కొండపోచమ్మకు నీటిని తీసుకెళ్లే కాలువకు అనుసంధానించారు.

0.65 టీఎంసీల నీటిని ఎత్తిపోసేలా ఆరు పంపులతో రెండు లిప్టులు నిర్మించారు. ఈ లిఫ్టుల కోసం రూ.2100 కోట్లు ఖర్చుపెట్టారు. 1,250 క్యూసెక్కులు సామర్థ్యం ఉన్న పంపులు 24 గంటలు పని చేస్తే.. 25 రోజుల్లో ఈ కొండపోచమ్మ సాగర్ నిండుతుంది.



Source link

Leave a Reply

Your email address will not be published. Required fields are marked *