kothagudem cyber police: శభాష్ కొత్తగూడెం పోలీస్.. సైబర్ కేటుగాళ్లకు షాక్, బాధితుడి డబ్బులు వెనక్కి – kothagudem police prompt action helps cyber fraud victim to get money back


సైబర్ నేరాల పట్ల జనంలో అవగాహన పెరగడంతో కేటుగాళ్లు రూట్ మార్చారు. ఓటీపీ చెప్పకున్నా.. డెబిట్ కార్డు వివరాలు ఇతరులకు తెలియకుండా జాగ్రత్త పడినా.. చిన్న చిన్న లొసుగుల ఆధారంగా సైబర్ నేరగాళ్లు తెలివిగా బ్యాంక్ ఖాతా నుంచి డబ్బులు మాయం చేస్తున్నారు. ఇటీవలే భద్రాద్రి కొత్తగూడెం జిల్లాకు చెందిన ఓ యువకుడి బ్యాంక్ అకౌంట్ ఖాతాకు రూపాయి ఎర వేసి.. వేలాది రూపాయలు కాజేశారు. ముందుగా డెబిట్ కార్డు ద్వారా రూపాయి అకౌంట్లోకి ట్రాన్స్‌ఫర్ చేసి.. తర్వాత రూపాయి కట్ చేసి.. ఇలా ముందుగా చిన్న మొత్తంలో ట్రాన్సాక్షన్లు చేసి రాత్రి సమయంలో పలు దఫాల్లో ఏడు వేల రూపాయలకుపైగా కొట్టేశారు.

అర్ధరాత్రి సమయంలో మరోసారి డబ్బులు కాజేయడానికి ప్రయత్నించగా.. బ్యాంకు నుంచి ఫ్రాడ్ అలర్ట్ ఫోన్ రావడంతో అప్రమత్తమయ్యాడు. వెంటనే నెట్ బ్యాంకింగ్ ద్వారా చూడగా బ్యాలెన్స్ నుంచి రూ.7160 మాయమైనట్లు గుర్తించాడు. ఫోన్‌కు ఓటీపీ రాకున్నా ఖాతాలో నుంచి డబ్బులు మాయం కావడంతో బాధితుడు అవాక్కయ్యాడు. వెంటనే తేరుకొని బ్యాంక్ టోల్ ఫ్రీ నంబర్‌కు కాల్ చేసి ఫిర్యాదు చేసి డెబిట్ కార్డు బ్లాక్ చేయించాడు.

మరుసటి రోజు ఉదయం అశ్వాపురం పోలీసు స్టేషన్‌కు వెళ్లి జరిగిందంతా పోలీసులకు పూసగుచ్చినట్లు వివరించాడు. వెంటనే స్పందించిన సీఐ సట్ల రాజు ఈ విషయాన్ని కొత్తగూడెం ఎస్పీ ఆఫీసులో ఉన్న సైబర్ సెల్ దృష్టికి తీసుకెళ్లారు. ఎస్పీ సునీల్ దత్ ఆధ్వరంలో చురుగ్గా పని చేస్తున్న సైబర్ సెల్ నుంచి గోపీనాథ్ అనే కానిస్టేబుల్ ఈ కేసుకు సంబంధించిన పూర్తి వివరాలను బాధితుడికి ఫోన్ చేసి అడిగి తెలుసుకున్నారు. డబ్బులు ఎలా కట్ అయ్యాయనే విషయమై ఓ అవగాహనకు రాగానే.. డబ్బులు వెనక్కి తెప్పించే ప్రయత్నం ప్రారంభించారు. పోయింది కొద్ది మొత్తమే కదా అని నిర్లక్ష్యం ప్రదర్శించకుండా.. సైబర్ నేరగాళ్లకు షాకిచ్చే లక్ష్యంతో అందుబాటులో ఉన్న తక్కువ వనరులతోనే పని చేశారు. దీంతో ఫిర్యాదు చేసిన నాలుగు రోజుల్లోనే బాధితుడి ఖాతాలోకి డబ్బులు వచ్చి చేరాయి.

ఎస్పీ సునీల్ దత్ ఆధ్వర్యంలోని పోలీసులు అంకితభావంతో పని చేయడం వల్లే తన డబ్బులు వెనక్కి వచ్చాయంటూ బాధితుడు ఆనందం వ్యక్తం చేశాడు. ఎస్పీకి, చొరవ తీసుకొని కేసు వివరాలను సైబర్‌ సెల్‌కు అందజేసిన సీఐ సట్ల రాజు, కేసును హ్యాండిల్ చేసిన కానిస్టేబుల్ గోపీనాథ్‌కు ధన్యవాదాలు తెలిపాడు. సైబర్ నేరాల బారిన పడొద్దంటే.. నెట్ బ్యాంకింగ్ విషయంలో జాగ్రత్తగా ఉండాలని, ఓటీపీ ఎవరికీ చెప్పొద్దని, డెబిట్ కార్డు పిన్‌ను తరచుగా మార్చుకోవడంతోపాటు.. ఎవరికీ పిన్ చెప్పొద్దని పోలీసులు సూచిస్తున్నారు. సైబర్ నేరాల బారిన పడిన వారు వెంటనే తమను సంప్రదించాలని సూచిస్తున్నారు.



Source link

Leave a Reply

Your email address will not be published. Required fields are marked *