Kurasala Kannababu: ఆన్‌లైన్‌లో తాజా పండ్లు, కూరగాయలు.. వెబ్‌సైట్ ప్రారంభించిన జగన్ సర్కార్ – ap government starts andhragreens.com website for e-marketing over fruits and vegitables


ఆంధ్రప్రదేశ్‌లోని రైతన్నలు ఎట్టిపరిస్థితుల్లోనూ నష్టపోకుండా చూస్తామని రాష్ట్ర వ్యవసాయ శాఖ మంత్రి కురసాల కన్నబాబు స్పష్టం చేశారు. రాష్ట్రవ్యాప్తంగా రైతుల నుంచి వ్యవసాయ, ఉద్యాన ఉత్పత్తుల మార్కెటింగ్‌కు ఆంధ్రా గ్రీన్స్‌ (https://andhragreens.com/) వెబ్‌సైట్‌ను బుధవారం ఆయన ప్రారంభించారు. ఈ సందర్భంగా మంత్రి మాట్లాడుతూ.. ఈ వెబ్‌సైట్‌లో రైతులు తమ ఉత్పత్తులకు సంబంధించిన సమాచారాన్ని ఉంచటంతో పాటు వినియోగదారులు కూడా ఆన్‌లైన్‌ ద్వారా ఆర్డర్లు నమోదు చేసుకునే విధంగా దీన్ని రూపొందించినట్లు తెలిపారు. కోవిడ్‌ 19 కారణంగా రైతు ఉత్పత్తుల విక్రయాలకు ఇబ్బంది కలిగిందన్నారు. ఈ సమస్యను పరిష్కరించాలనే ఉద్దేశంతో ఈ తరహా ఆన్‌లైన్‌ మార్కెటింగ్‌ వ్యవస్థలను ప్రోత్సహిస్తున్నట్లు మంత్రి వెల్లడించారు. ఇప్పటికే స్విగ్గీ, జొమాటో ద్వారా రాష్ట్రంలో పండ్లు, కూరగాయల విక్రయాలు జరుగుతున్నాయని చెప్పారు. ఇక నుంచి రాష్ట్రంలో ఆంధ్రా గ్రీన్స్‌ కూడా ఈ తరహా సేవలు అందిస్తుందని మంత్రి వెల్లడించారు.

రాష్ట్రవ్యాప్తంగా 43 లక్షల హెక్టార్లలో ఉద్యాన పంటలు ఉంటే 305 లక్షల మెట్రిక్‌ టన్నుల పండ్లు, కూరగాయల ఉత్పత్తి వచ్చిందని మంత్రి కన్నబాబు వెల్లడించారు. కోవిడ్‌ సంక్షోభంలో రాష్ట్రవ్యాప్తంగా 8.12 లక్షల పండ్ల కిట్లను పంపిణీ చేసినట్లు ఆయన తెలిపారు. అలాగే రాష్ట్రం నుంచి 18 లక్షల మెట్రిక్‌ టన్నుల పండ్లు, కూరగాయల మార్కెటింగ్‌ జరిగిందన్నారు. ఈ నెల 30న రైతు భరోసా కేంద్రాలను ముఖ్యమంత్రి వైఎస్ జగన్మోహన్‌‌రెడ్డి ప్రారంభిస్తారని మంత్రి వెల్లడించారు.

ఉద్యాన పంటలకు సరైన గిట్టుబాటు ధర లభించడం లేదంటూ ప్రతిపక్షాలు చేస్తున్న ఆరోపణల్లో నిజం లేదని మంత్రి కన్నబాబు స్పష్టం చేశారు. లేనిపోని అవాస్తవాలతో రైతులను చంద్రబాబు గందరగోళానికి గురిచేస్తున్నారని మండిపడ్డారు. టీడీపీ హయాంలో ఏ ఒక్క పంటకు సరైన మద్దతు ధర దక్కలేదని ఆయన ఆరోపించారు. అలాగే గతంలో రైతుల గురించి పట్టించుకోని చంద్రబాబు ఇప్పుడు వారి గురించి మాట్లాడటం శోచనీయమన్నారు.



Source link

Leave a Reply

Your email address will not be published. Required fields are marked *