LIC: ఎల్ఐసీ దూకుడు: 6 ఏళ్లలో అత్యధికం.. అందులో కొత్త రికార్డ్! – life insurance corporation sells over 2.19 crore policies in fy20, highest in six years


ప్రధానాంశాలు:

  • దూసుకెళ్తున్న ఎల్‌ఐసీ
  • పాలసీ అమ్మకాలు పైపైకి
  • తొలి ఏడాది ప్రీమియంలో భారీ జంప్

దిగ్గజ ప్రభుత్వ రంగ బీమా కంపెనీ లైఫ్ ఇన్సూరెన్స్ కార్పొరేషన్ ఆఫ్ ఇండియా (ఎల్‌ఐసీ) గత ఆర్థిక సంవత్సరాన్ని ఘనంగానే ముగించింది. ప్రత్యర్థి ప్రైవేట్ కంపెనీల కన్నా ఎక్కువ వృద్ధిని సాధించింది. తొలి ఏడాది ప్రీమియం వసూళ్లలో 25 శాతం వృద్ధి రేటును నమోదు చేసింది. ప్రైవేట్ రంగ కంపెనీ తొలి ఏడాది ప్రీమియం వసూళ్లు వృద్ధి 11.64 శాతంగా ఉండటం గమనార్హం.

2019-20 ఆర్థిక సంవత్సరంలో ఎల్‌ఐసీ పాలసీ విక్రయాల్లో కూడా మంచి పెరుగుదల నమోదైంది. గత ఆరేళ్లలో లేనివిధంగా ఎక్కువ పాలసీలను విక్రయించింది. ఇన్సూరెన్స్ రెగ్యులేటర్ ఐఆర్‌డీఏఐ గణాంకాల ప్రకారం.. ఎల్‌ఐసీ గత ఆర్థిక సంవత్సరంలో ఏకంగా 2.19 కోట్ల పాలసీలను విక్రయించింది.

‘కోవిడ్ 19 వల్ల తీవ్ర ప్రతికూల పరిస్థితులు నెలకొన్నాయి. వ్యాపారాలపై ఒత్తిడి నెలకొంది. అయినా కూడా మేం మంచి పనితీరు కనబరిచాం. 2019-20 ఆర్థిక సంవత్సరంలో ఆరేళ్లలోనే లేనివిధంగా ఎక్కువ పాలసీలను విక్రయించాం’ అని ఎల్‌ఐసీ తెలిపింది.

Also Read: భారీగా తగ్గిన బంగారం ధర.. హైదరాబాద్‌లో రేట్లు ఇలా!

ఐఆర్‌డీఏఐ డేటా ప్రకారం.. 2019-20లో ఎల్‌ఐసీ కొత్త పాలసీల ప్రీమియం వసూళ్లు రూ.1.77 లక్షల కోట్లుగా ఉన్నాయి. 2018-19లో ఈ వసూళ్లు రూ.1.42 లక్షల కోట్లు. అంటే 25 శాతానికి పైగా పెరుగుదల నమోదైంది. అదేసమయంలో ప్రైవేట్ సంస్థల తొలి ఏడాది ప్రీమియం వసూళ్లు రూ.80,919 కోట్లుగా ఉన్నాయి. వార్షిక ప్రాతిపదికన చూస్తే 11.64 శాతం వృద్ధి నమోదైంది.

ఎల్‌ఐసీ పాలసీల విక్రయాలు, ప్రీమియం వసూళ్లు రెండూ పెరుగుతూ వచ్చాయి. అలాగే ఎల్‌ఐసీ పెన్షన్ అండ్ గ్రూప్ స్కీమ్స్ విభాగం కొత్త రికార్డ్‌ను క్రియేట్ చేసిందని చెప్పుకోవచ్చు. దీని ద్వారా సంస్థకు ఏకంగా రూ.లక్ష కోట్లకు పైగా ప్రీమియం ఆదాయం లభించింది. రూ.1.26 లక్షల కోట్ల కొత్త ప్రీమియం ఆదాయం వచ్చింది. 2018-19లో ప్రీమియం వసూళ్లు రూ.91,179 కోట్లుగా ఉన్నాయి.

ఇకపోతే ఎల్‌ఐసీ మార్కెట్ వాటాను గమనిస్తే.. 2020 మార్చి 31 నాటికి పాలసీల పరంగా చూస్తే ఎల్‌ఐసీ 75.9 శాతం వాటాను కలిగి ఉంది. అదే తొలి ఏడాది ప్రీమియం వసూళ్ల పరంగా చూస్తే ఎల్‌ఐసీ 68.74 శాతం మార్కెట్ వాటాను ఆక్రమించింది. పాలసీ వాటా 1.19 శాతం, తొలి ఏడాది ప్రీమియం వాటా 2.5 శాతం పెరిగింది. ఇకపోతే ఎల్‌ఐసీ కంపెనీ వ్యాల్యూ రూ.11.5 లక్షల కోట్లుగా ఉండొచ్చనే అంచనాలున్నాయి.



Source link

Leave a Reply

Your email address will not be published. Required fields are marked *