lockdown 4.0: మే 31 వరకు లాక్‌డౌన్ పొడిగింపు.. నేడు కేంద్రం ప్రకటన! – lockdown 3.0 end today and center likely to extendend lockdown 4.0 till may 31st


కరోనా కట్టడికి విధించిన మూడో దశ లాక్ డౌన్ నేటితో ముగియనుండగా, మరోసారి పొడిగింపునకు రంగం సిద్ధమైంది. లాక్‌డౌన్ 4.0 ఉంటుందని ప్రధాని నరేంద్ర మోదీ ఇప్పటికే స్పష్టం చేశారు. ఈ నేపథ్యంలో కనీసం మరో రెండు వారాల పాటు లాక్ డౌన్ ను పొడిగిస్తూ, ఈ నెల 31 వరకూ కొనసాగించే అవకాశాలున్నాయని తెలుస్తోంది. లాక్ డౌన్ పొడిగింపుపై నేడు కేంద్రం స్పష్టమైన ప్రకటన చేయనుంది. ఇదే సమయంలో ప్రస్తుతం అమలవుతున్న ఆంక్షల్లో మరిన్ని సడలింపులు కూడా ఉంటాయని సమాచారం. రెస్టారెంట్లు, షాపింగ్ మాల్స్ తిరిగి తెరచుకునే అవకాశాలున్నాయని కేంద్ర వర్గాలు వెల్లడించాయి. కొన్ని నిబంధనలను పాటిస్తూ, ప్రజా రవాణాకు కూడా అనుమతించవచ్చని తెలుస్తోంది.

దేశీయ విమాన ప్రయాణాలకు కూడా పచ్చజెండా ఊపవచ్చని, అయితే, విమానం బయలుదేరే ప్రాంతం, గమ్యస్థానం ఉన్న ప్రభుత్వాల మధ్య కుదిరే అంగీకారం మేరకే టేకాఫ్‌లు ఉండాలని నిబంధన విధించే అవకాశాలు ఉన్నాయి. నగరాల్లో కేసుల సంఖ్య అధికంగా ఉన్నందున మెట్రో రైల్ సేవలను పునఃప్రారంభించే విషయమై ఇప్పట్లో నిర్ణయించే వీలు కనిపించడం లేదు.

రాష్ట్రాల ముఖ్యమంత్రుల నుంచి వచ్చిన సూచనలు, నివేదికల మేరకు ఇప్పటికే హోమ్ శాఖ లాక్ డౌన్ 4.0పై విధివిధానాలను సిద్ధం చేసినట్టు సమాచారం. గ్రీన్, ఆరెంజ్ జోన్లలో ఆటో లు, క్యాబ్ సర్వీసులు, ఈ-కామర్స్ సంస్థల ద్వారా అత్యవసరం కాని వస్తువుల డెలివరీకి అంగీకరించాలని ప్రభుత్వం నిశ్చయించినట్టు ఇప్పటికే మీడియాలో వార్తలు వచ్చాయి.

కాగా, మార్చి 25న తొలి విడత లాక్‌డౌన్‌ను ప్రకటించగా, ఆపై దాన్ని ఏప్రిల్ 15న ఒకసారి, మే 4న రెండోసారి పొడిగించిన సంగతి తెలిసిందే. మే 17తో ఆ సమయం ముగియగా, కేసుల సంఖ్య ఇంకా అదుపులోకి రాకపోవడంతో మరోసారి లాక్‌డౌన్‌ను రెండు వారాల పాటు పొడిగించాలని పలు రాష్ట్రాలు కేంద్రానికి విజ్ఞప్తి చేశాయి. ఇదే సమయంలో ఆర్థికవృద్ధి కుంటుపడిన నేపథ్యంలో సడలింపులనూ పెంచాలని కోరాయి. లాక్‌డౌన్ 4.0 మరింత సరళంగా ఉంటుందని ప్రధాని విస్పష్ట సంకేతాలు ఇచ్చారు. ఈసారి నిర్ణయాధికారం రాష్ట్రాలకు వదిలివేయనున్నట్టు తెలుస్తోంది.



Source link

Leave a Reply

Your email address will not be published. Required fields are marked *