lockdown extended: మే 3 తర్వాత లాక్‌డౌన్ పొడిగింపు.. ఢిల్లీ బాటలో మరో ఐదు రాష్ట్రాలు – after delhi, five more states want lockdown extended beyond may 3


ఢిల్లీలో మే 16 వరకు లాక్‌డౌన్ కొనసాగించాల్సి ఉంటుందని ముఖ్యమంత్రి అరవింద్ కేజ్రీవాల్ ప్రకటించిన మర్నాడే పలు రాష్ట్రాల నుంచి కూడా ఇదే అభిప్రాయం వ్యక్తమవుతోంది. మహారాష్ట్ర, మధ్యప్రదేశ్, పశ్చిమ్ బెంగాల్, పంజాబ్, ఒడిశా రాష్ట్రాలు మే 3 తర్వాత కూడా హాట్‌స్పాట్‌లలో లాక్‌డౌన్ కొనసాగించాలని భావిస్తున్నాయి. అలాగే, గుజరాత్, ఆంధ్రప్రదేశ్, తమిళనాడు, హర్యానా, హిమాచల్ ప్రదేశ్, కర్ణాటకలు సైతం కేంద్రం ఆదేశాలను పాటిస్తామని స్పష్టం చేశాయి. తెలంగాణలో మే 7 వరకు లాక్‌డౌన్ కొనసాగుతుంది.

ముంబై, పుణేలోని కంటెయిన్‌మెంట్ జోన్‌లలో మే 18 వరకు లాక్‌డౌన్ పొడిగించే ఆలోచనలో ఉన్నామని మహారాష్ట్ర ఆరోగ్య శాఖ మంత్రి రాజేశ్ తోపే అన్నారు. దీనిపై ప్రధానితో సోమవారం జరిగే వీడియో కాన్ఫరెన్స్‌లో చర్చించనున్నామని తెలిపారు. అవసరమైతే కేవలం కంటెయిన్‌మెంట్ జోన్‌లలోనే మరో 15 రోజులు లాక్‌డౌన్ పొడిగించనున్నామని పేర్కొన్నారు. దేశంలోనే అత్యధికంగా మహారాష్ట్రలోనే కరోనా పాజిటివ్ కేసులు నమోదవుతున్నాయి. మున్సిపాల్టీల వెలుపల దుకాణాలను తెరవాలనే కేంద్ర హోం శాఖ ఇచ్చిన ఆదేశాలను తమ రాష్ట్రంలో అమలుచేయబోమని మహరాష్ట్ర మంత్రి రాజేశ్ తోపే అన్నారు. మే 3 వరకు లాక్‌డౌన్‌లో ఎలాంటి సడలింపు ఇవ్వబోమని ఆయన అన్నారు.

యూపీ ప్రభుత్వం సైతం షాప్‌ల తెరవడంపై వేచిచూసే ధోరణిలో ఉంది. అక్కడ పాజిటివ్ కేసుల సంఖ్య పెరుగుతుండటంతో కేంద్ర హోం శాఖ ఆదేశాలపై నిర్ణయం తీసుకోనుంది. నిత్యావసరాలు, ఔషధాల దుకాణాలకు ప్రభుత్వం ఇప్పటికే అనుమతులు ఇచ్చిందని, ఇంకా ఎలాంటి వాటికి అనుమతులు ఇవ్వబోమని ఓ సీనియర్ అధికారి వ్యాఖ్యానించారు. పశ్చిమ్ బెంగాల్, ఒడిశా, పంజాబ్ సైతం లాక్‌డౌన్‌‌ను మే 3 తర్వాత పొడిగించాలని కోరుతున్నాయి.

కోల్‌కతా, హౌరా, ఉత్తర 24 పరగణాలు, హూగ్లీ, తూర్పు మిడ్నాపూర్, తూర్పు బురద్వాన్, నాడియా జిల్లాలోలోని రెడ్ జోన్స్‌లో మే 3 తర్వాత కూడా లాక్‌డౌన్ కొనసాగించే ఆలోచనలో ఉన్నట్టు ప్రభుత్వ వర్గాలు తెలిపాయి. అయితే, రాష్ట్రవ్యాప్త లాక్‌డౌన్‌కు సీఎం మమత బెనర్జీ సముఖంగా లేరని అన్నాయి.

రాష్ట్రంలో పూర్తిగా లాక్‌డౌన్‌ను ఎత్తివేయడం సాధ్యం కాదని పంజాబ్ ముఖ్యమంత్రి అమరీందర్ సింగ్ అన్నారు. గత 40 రోజుల్లో వైరస్ కేసులు భారీగా పెరుగుతున్నాయని అన్నారు. ఒడిశా సైతం ఇదే అభిప్రాయం వ్యక్తం చేస్తోంది. దశలవారీగా లాక్‌డౌన్‌ను ఎత్తివేయాలని సూచిస్తోంది. పాజిటివ్ కేసులు నమోదుకాని ప్రాంతాల్లోనే ఆంక్షలు సడలించి, రెడ్ జోన్‌లలో కొనసాగించాలని ఒడిశా రాష్ట్ర మంత్రి నబా కిశోర్ దాస్ వ్యాఖ్యానించారు.

ఇండోర్, భోపాల్, ఉజ్జయిని, ఖర్‌గోన్‌లో మే 3 తర్వాత కూడా ఆంక్షలు కొనసాగుతాయని మధ్యప్రదేశ్ ముఖ్యమంత్రి శివరాజ్ సింగ్ చౌహన్ అన్నారు. ఈ జాబితాలో జబల్‌పూర్ సైతం చేరనుంది. గత మూడు రోజుల నుంచి అక్కడ పాజిటివ్ కేసులు పెరుగుతూ వస్తున్నాయి. ఈ ప్రదేశాలు మినహా రాష్ట్రవ్యాప్తంగా దశలవారీగా ఆంక్షలను సడలించాలని సీఎం భావిస్తున్నారు. కేంద్ర హోం శాఖ ఆదేశాలను పాటిస్తామని కర్ణాటక తెలిపింది. దీనికి సంబంధించిన ఆదేశాలను నేడో, రేపో వెలువరించనుంది.



Source link

Leave a Reply

Your email address will not be published. Required fields are marked *