mangalagiri mother: గుంటూరు: తల్లి శవాన్ని ఇంట్లోకి రానివ్వని కొడుకు.. కరోనా భయం కాదు కొవ్వెక్కి! – son not allowed his mother dead body into house and refused to conduct funeral in mangalagiri


కన్నతల్లి చనిపోతే భౌతిక కాయాన్ని ఇంట్లోకి రాకుండా అడ్డుకున్నాడో ప్రబుద్ధుడు. ఆస్తి రాసివ్వలేదనే కోపంతో దారుణంగా ప్రవర్తించాడు. నవమాసాలు మోసి జన్మనిచ్చిందనే కనికరం కూడా చూపలేదు. ఆమె బతికున్న సమయంలోనూ ఇంట్లో బంధించి చిత్రహింసలకు గురి చేశాడు. గుంటూరు జిల్లా మంగళగిరిలో ఈ ఘటన జరిగింది.

స్థానిక ఇందిరానగర్‌కు చెందిన సత్యనారాయణ, ధనలక్ష్మి దంపతులకు కొడుకు, కూతురు ఉన్నారు.. ఇద్దరికీ వివాహాలు అయ్యాయి. కొడుకు మల్లేశ్వరరావు మాత్రం మద్యానికి బానిసై ఆస్తికోసం తల్లిదండ్రులతో గొడవకు దిగేవాడు. ఆస్తి తన పేరు మీద రాయాలని వారిపై ఒత్తిడి తెచ్చేవాడు. ఏం చేయాలో తెలియని ఆ తల్లిదండ్రులు కుమారుడి నుంచి ప్రాణహాని ఉందని రెండేళ్ల కిందటే పోలీసులకు ఫిర్యాదు చేయగా కేసు నమోదయ్యింది.. తర్వాత కొద్దిరోజులు ఆ గొడవ సద్ధుమణిగింది.

జనవరిలో నాగమల్లేశ్వరరావు తండ్రి అనారోగ్యంతో చనిపోయాడు. తండ్రి చనిపోయాడనే బాధ కూడా లేకుండా ఆస్తి కోసం పంచాయితీ పెట్టాడు. కానీ బతికున్న సమయంలో తండ్రిని సరిగా చూసుకోలేదని.. అలాంటి వ్యక్తికి ఆస్తి ఎందుకని అతడి సోదరి ప్రశ్నించింది. ఆస్తి విషయంలో మళ్లీ గొడవలు చెలరేగాయి. బంధువులు అందరికి సర్థిచెప్పి పంపించడంతో వివాదం మళ్లీ ముగిసింది. ఆస్తిపై ఆశ చంపుకోని మల్లేశ్వరరావు తల్లి అడ్డు లేకుంటే ఆస్తి తనకే దక్కుతుందని భావించాడు. తల్లి ధనలక్ష్మిని వేధించాడు. ఓ రోజు మద్యం సేవించి ఇంటికి వచ్చిన మల్లేశ్వరరావు తల్లిని ఇంట్లోనే ఉంచి తలుపులు వేసి నిర్బంధించాడు. పొలం, ఇల్లు తన పేరుతో రాయకపోతే చంపేస్తానని బెదిరించాడు.

కొడుకు వేధింపులు భరించలేని ఆమె వెనుక తలుపు ద్వారా తప్పించుకుంది. నేరుగా పోలీస్ స్టేషన్‌కు వెళ్లి తన కొడుకుపై ఫిర్యాదు చేసింది. అప్పటి నుంచి కొడుకు దగ్గరకు వెళ్లకుండా బాపట్లలో ఉంటున్న కూతురి వద్ద ఉంటోంది. ధనలక్ష్మి అనారోగ్యంతో బాధపడుతూ సోమవారం మధ్యాహ్నం బాపట్ల ప్రభుత్వ ఆస్పత్రిలో చికిత్స పొందుతూ చనిపోయింది. కూతురి భర్త లాక్‌డౌన్‌తో విజయనగరంలో ఉండిపోయాడు. దీంతో తల్లి మృతదేహంతో మంగళగిరిలోని ఇంటికి వెళ్లింది. అక్కడ కొడుకు తల్లి శవాన్ని ఇంట్లోకి రానిచ్చేందుకు అంగీకరించలేదు. బంధువులు, స్థానికులు నచ్చజెప్పినా వినలేదు. విషయం పోలీసుల దగ్గరకు వెళ్లడంతో.. అతడ్ని అదుపులోకి తీసుకొని అంత్యక్రియలు నిర్వహించారు.



Source link

Leave a Reply

Your email address will not be published. Required fields are marked *