Mashrafe Mortaza Retirement: నాపై ఎందుకు కక్ష..? డబ్బు కోసం మ్యాచ్‌లాడలేదు: బంగ్లా మాజీ కెప్టెన్ – former bangladesh captain mashrafe mortaza disappointed with bcb rushing him towards retirement


బంగ్లాదేశ్‌పై పసికూన ముద్రని చెరిపేయడంలో ఆ జట్టు మాజీ కెప్టెన్ ముష్రఫె మొర్తజా క్రియాశీలక పాత్ర పోషించాడు. 18 ఏళ్ల వయసులో బంగ్లాదేశ్ జట్టులోకి ఎంట్రీ ఇచ్చిన మొర్తజా.. కెప్టెన్‌గా సుదీర్ఘకాలం సేవలందించాడు. అతని కెప్టెన్సీలో బంగ్లాదేశ్ జట్టు వరల్డ్‌కప్‌ క్వార్టర్‌ ఫైనల్, ఛాంపియన్స్ ట్రోఫీలో సెమీ ఫైనల్స్, ఆసియా కప్‌‌లో రెండు సార్లు ఫైనల్‌కి చేరింది. ఈ క్రమంలో అగ్రశ్రేణి జట్లకి సైతం చెమటలు పట్టించిన బంగ్లాదేశ్.. అన్ని విభాగాల్లో తన కంటే మెరుగైన టాప్ జట్లకి కూడా ఓటమి రుచి చూపింది.

2019 వన్డే ప్రపంచకప్‌లో గాయాలు ఆ జట్టుని దెబ్బతీయగా.. అగ్రశ్రేణి బౌలర్‌గా ఉన్న మొర్తజా 8 మ్యాచ్‌లాడి కేవలం ఒక వికెట్ మాత్రమే పడగొట్టగలిగాడు. దాంతో 36 ఏళ్ల మొర్తజాని అంతర్జాతీయ క్రికెట్‌కి రిటైర్మెంట్ ఇవ్వాలని సూచించిన బంగ్లాదేశ్ క్రికెట్ బోర్డు (బీసీబీ).. జింబాబ్వేతో వీడ్కోలు మ్యాచ్‌ని కూడా ఆడించింది. కానీ.. ఆ మ్యాచ్ తర్వాత కెప్టెన్సీ బాధ్యతల నుంచి మాత్రం తప్పుకున్న మొర్తజా.. ఆటగాడిగా జట్టులో కొనసాగుతానని భీష్మించుకుని కూర్చున్నాడు. దాంతో.. కేవలం డబ్బు కోసమే అతను బంగ్లాదేశ్ తరఫున ఆడాలని అనుకుంటున్నట్లు బీసీబీ పెద్దలు విమర్శలు గుప్పించారు.

డబ్బు కోసం మ్యాచ్‌లు ఆడుతున్నాడనే విమర్శలపై మొర్తజా స్పందించాడు. ‘‘వాళ్లు నా జీతం గురించి మాట్లాడుతున్నారు. నేను ఇప్పటికే 18 ఏళ్లు ఇంటర్నేషనల్ క్రికెట్ ఆడాను.. ఇంకా డబ్బు గురించి ఆలోచిస్తానా..? ఒకవేళ నాకు డబ్బే కావాలనుకుంటే చాలా అవకాశాలు ఎదురుచూస్తున్నాయి. కానీ.. నేను ఎప్పుడూ డబ్బు కోసం క్రికెట్ ఆడలేదు. వరల్డ్‌కప్ ముగిసినప్పటి నుంచి నాపై వెటకారంగా రూమర్స్‌ని వ్యాప్తి చేస్తున్నారు. నిజమే బీసీబీ నాకు మంచి వీడ్కోలు మ్యాచ్ ఇచ్చింది. కానీ.. నా ఫీలింగ్స్‌ని కూడా అర్థం చేసుకోవాలి కదా..? ఇకపై కూడా నేను బంగ్లాదేశ్ తరఫున మ్యాచ్‌లు ఆడతాను’’ అని మొర్తజా స్పష్టం చేశాడు. టెస్టులు, టీ20లకి రిటైర్మెంట్ ప్రకటించిన మొర్తజా.. వన్డేల్లో మాత్రమే ఆడుతున్నాడు. ఇప్పటి వరకూ 220 వన్డేలాడిన అతను 270 వికెట్లు పడగొట్టాడు.



Source link

Leave a Reply

Your email address will not be published. Required fields are marked *