medak boy in borewell: మెదక్: బోరుబావిలో బాలుడు.. ఘటనలో సంక్లిష్టతలు, కీలక వివరాలు – 3 years old boy falls into borewell in medak, ndrf team continues rescue operations


మెదక్ జిల్లాలో బోరుబావిలో మూడేళ్ల బాలుడు పడిపోయిన ఘటనలో ఆందోళన కొనసాగుతోంది. రెస్క్యూ సిబ్బంది సహాయ కార్యక్రమాలు కొనసాగిస్తున్నారు. హైదరాబాద్ నుంచి రెండు ఎన్డీఆర్‌ఎఫ్ బృందాలు ఘటనా స్థలికి చేరుకున్నాయి. చీకటి పడటం సహాయ చర్యలకు ఇబ్బందిగా మారింది. ఎన్డీఆర్‌ఎఫ్ బృందాలు చేరుకోక ముందు నుంచే బోరుబావికి సమాంతరంగా గొయ్యి తవ్వుతున్నారు. జేసీబీలతో పనులు కొనసాగిస్తున్నారు. బాబు కోసం అతడి తల్లి ఏడుస్తున్న తీరు అక్కడున్న వారిని కంటతడి పెట్టిస్తోంది.

మెదక్ జిల్లా పాపన్నపేట మండలం పోడ్చన్‌పల్లి గ్రామంలో బుధవారం (మే 27) మధ్యాహ్నం ఈ ఘటన చోటు చేసుకుంది. మూడేళ్ల బాలుడు సాయివర్ధన్ ఆడుకుంటూ వెళ్లి బోరుబావిలో పడ్డాడు. తల్లిదండ్రుల కళ్ల ముందే ఈ ఘటన జరిగింది. బాలుడు పడిపోయిన బోరుబావి బుధవారం ఉదయమే తవ్వించారు. వ్యవసాయ క్షేత్రంలో రెండు రోజులుగా బోర్లు వేయిస్తున్నారు. మొత్తం మూడు బోర్లు వేసినా.. నీళ్లు పడకపోవడంతో వాటిని అలాగే వదిలేశారు.

కీలక వివరాలు..
* బోరుబావి లోతు 120 నుంచి 150 అడుగుల లోతు ఉన్నట్లు అంచనా వేస్తున్నారు.
* బాలుడు 25 నుంచి 30 అడుగుల లోతులో ఉన్నట్లు భావిస్తున్నారు. బోరుబావిలోకి ఆక్సిజన్ పైపు పంపించగా 25 అడుగుల లోతు వరకు వెళ్లి ఆగిపోయింది. 30 అడుగుల వరకు ఎల్ ఆకారంలో గొయ్యి తవ్వుతున్నారు.
* బోరుబావికి కేసింగ్ లేకపోవడం మరింత ప్రమాదకరంగా మారింది. బాలుడు బోరుబావిలో పడిన వెంటనే తాడు సాయంతో వెలికితీయడానికి ప్రయత్నించగా.. బోరులో మట్టి పడింది. ఆ తర్వాత పిల్లవాడి అరుపులు కూడా వినిపించకపోవడం ఆందోళనకరంగా మారింది.
* బోరుబావుల్లో నుంచి పిల్లలను తీసే నైపుణ్యం ఉన్న వెల్దుర్తి శ్రీనివాస్ అనే వ్యక్తిని అధికారులు పిలిపించారు. చేవెళ్ల, భీమదేవరపల్లి బోరుబావుల ఘటనలో శ్రీనివాస్ సాయం అందించారు. ఘటనా స్థలిని పరిశీలించిన శ్రీనివాస్.. బాలుడిపై మట్టి పేరుకుపోయే అవకాశం ఉందని తెలిపారు.
* మూడు జేసీబీలు, రెండు క్రేన్లు, రెండు ఫైరింజన్లను సహాయ కార్యక్రమాల్లో వినియోగిస్తున్నారు. రెండు అంబులెన్స్‌లను సిద్ధంగా ఉంచారు.
* ఉమ్మడి మెదక్ జిల్లాలో ఇది నాలుగో ప్రమాదం. గతంలో 2008, 2011, 2015లో బోరుబావిలో ప్రమాదవశాత్తూ చిన్నారులు పడిపోయారు. ఈ మూడు సందర్భాల్లోనూ ఎంత శ్రమించినా చిన్నారులను కాపాడలేకపోయారు. ఈ ఘటనల నేపథ్యంలో మరింత ఆందోళన నెలకొంది.
* సాధారణంగా మెదక్, రంగారెడ్డి, నల్గొండ ప్రాంతాల్లో భూగర్భ జలాలు బాగా లోతులో ఉంటాయి. నీటి కోసం వందల అడుగు లోతు వరకు బోర్లు తవ్వుతుంటారు. ఇలాంటి బోరుబావుల్లో ఎవరైనా పడితే ప్రాణాలతో తిరిగొచ్చే అవకాశాలు చాలా తక్కువ.
* పనికిరాకుండా ఉన్న బోరు బావులను పూడ్చేయాలని ప్రభుత్వం పదే పదే హెచ్చరిస్తోంది. పల్లె ప్రగతి కార్యక్రమంలో ప్రత్యేకంగా.. ఖాళీగా ఉన్న బోరు బావులను పూడ్చివేసి కార్యక్రమాన్ని ఎంచుకున్నారు. వేలాది బోరుబావులను పూడ్చివేయించారు. అయినప్పటికీ ప్రజల్లో అవగాహన రాకపోవడం, ఇలాంటి ఘటనలు చోటు చేసుకుంటుండటం దురదృష్టకరం.
* మే నెలలోనే పోడ్చన్‌పల్లిలో ఇప్పటివరకు 19 బోర్లు వేసినట్లు తెలుస్తోంది. వేటికీ అనుమతులు తీసుకోలేదని అధికారుల దర్యాప్తులో తేలింది.

సెలవుల్లో అమ్మమ్మ ఇంటికని వెళ్లి..
బోరుబావిలో పడిపోయిన బాలుడు.. మంగలి గోవర్ధన్ నవీన దంపతులు మూడో కుమారుడు సాయివర్ధన్‌. ఈ దంపతులు సంగారెడ్డి జిల్లా పటాన్‌చెరువులో నివాసం ఉంటున్నారు. బాలుడు 3 నెలల కిందటే తన అమ్మమ్మ ఊరైన పోడ్చనపల్లి గ్రామానికి వచ్చాడు. నాటి నుంచి అక్కడే ఉంటున్నాడు. బాలుడి తల్లిదండ్రులు కూడా కొద్ది రోజులుగా అక్కడే ఉంటున్నారు.

గోవర్ధన్ మామ (బాలుడి తాత) మంగలి బిక్షపతి తన రెండకరాల వ్యవసాయ భూమిలో రెండు రోజులుగా బోర్లు వేయిస్తున్నాడు. గోవర్ధన్ కుటుంబ సమేతంగా వ్యవసాయ క్షేత్రానికి వెళ్లాడు. 150 అడుగుల వరకు బోరువేసి నీరు పడకపోవడంతో బోరుబండిని తిరిగి పంపించేసి.. వాళ్లందరూ పొలం పనుల్లో నిమగ్నమయ్యారు. ఈ సమయంలో బాలుడు ఆడుకుంటూ ప్రమాదవశాత్తూ నీరులేని బోరు బావిలో పడిపోయాడు.

samayam telugu

Boy In Borewell

మెదక్ కలెక్టర్ ధర్మారెడ్డి, ఎస్పీ చందనా దీప్తి ఘటనా స్థలికి చేరుకొని సహాయక చర్యల్ని పర్యవేక్షిస్తున్నారు. ప్రమాదం జరిగిన గంట తర్వాత అధికారులకు సమాచారం అందింది. మెదక్‌ రూరల్‌ ఎస్‌ఐ రాజశేఖర్‌, మరో ఎస్ఐ ఆంజనేయులు, స్థానిక అధికారులు ఘటనా స్థలానికి చేరకున్నారు. జిల్లా పోలీసు యంత్రాంగం, రెవెన్యూ అధికారులు సహాయక చర్యల్లో నిమగ్నమయ్యాయి. ఎన్డీఆర్‌ఎఫ్ సిబ్బంది సహాయక చర్యలు ప్రారంభించారు. బాలుడు క్షేమంగా తిరిగి రావాలని గ్రామస్థులందరూ ప్రార్థిస్తున్నారు.

Also Read:మరణించిన అమ్మను లేపేందుకు చిన్నారి ప్రయత్నం.. కంటతడి పెట్టిస్తున్న దృశ్యం

Must Read:ఇండియా Vs చైనా.. ఎంట్రీ ఇచ్చిన అమెరికా



Source link

Leave a Reply

Your email address will not be published. Required fields are marked *