mi vs kxip super over: ముంబయిపై రెండో సూపర్ ఓవర్‌లో గెలిచిన పంజాబ్ – pl 2020: kings xi punjab beat mumbai indians in 2nd super over


ఐపీఎల్ 2020 సీజన్‌లో ఒకే రోజు మూడు సూపర్ ఓవర్‌లు జరిగాయి. దుబాయ్ వేదికగా ఆదివారం సాయంత్రం సన్‌రైజర్స్ హైదరాబాద్, కోల్‌కతా నైట్‌రైడర్స్ మధ్య జరిగిన ఫస్ట్ మ్యాచ్‌‌లో సూపర్ ఓవర్ జరగగా.. కోల్‌కతా విజయాన్ని అందుకుంది. ఆ వెంటనే దుబాయ్ వేదికగా ముంబయి ఇండియన్స్, కింగ్స్ ఎలెవన్ పంజాబ్ మధ్య మ్యాచ్ జరగగా.. ఇది కూడా సూపర్ ఓవర్‌కి దారితీసింది. అనూహ్యంగా.. తొలి సూపర్ ఓవర్‌లోనూ స్కోర్లు సమమవడంతో రెండో సూపర్ ఓవర్‌ని నిర్వహించారు. రెండో సూపర్‌లో మొదట బ్యాటింగ్ చేసిన ముంబయి వికెట్ నష్టానికి 11 పరుగులు చేయగా.. లక్ష్యాన్ని మరో రెండు బంతులు మిగిలి ఉండగానే పంజాబ్ ఛేదించేసింది. ట్రెంట్ బౌల్ట్ వేసిన ఓవర్‌లో తొలి బంతినే పంజాబ్ హిట్టర్ క్రిస్‌గేల్ సిక్స్‌గా మలచగా.. తర్వాత బంతికి సింగిల్ వచ్చింది. ఆ తర్వాత రెండు బంతుల్నీ మయాంక్ అగర్వాల్ ఫోర్‌గా మలిచేశాడు. మొత్తంగా 13 ఏళ్ల ఐపీఎల్ చరిత్రలో ఇలా ఒకే రోజు బ్యాక్ టు బ్యాక్ అదీ.. ఒకే మ్యాచ్‌లో రెండు సూపర్ ఓవర్‌లు జరగడం ఇదే తొలిసారి.

మ్యాచ్‌లో టాస్ గెలిచి మొదట బ్యాటింగ్ చేసిన ముంబయి టీమ్.. డికాక్ (53: 43 బంతుల్లో 3×4, 3×6), కీరన్ పొలార్డ్ (34 నాటౌట్: 12 బంతుల్లో 1×4, 4×6), కౌల్టర్ నైల్ (24 నాటౌట్: 12 బంతుల్లో 4×4) నిలకడగా ఆడటంతో 6 వికెట్ల నష్టానికి 176 పరుగులు చేసింది. అనంతరం ఛేదనలో కెప్టెన్ కేఎల్ రాహుల్ (77: 51 బంతుల్లో 7×4, 3×6), క్రిస్‌గేల్ (24), నికోలస్ పూరన్ (24), దీపక్ హుడా (23) సమయోచితంగా ఆడటంతో పంజాబ్ కూడా సరిగ్గా 20 ఓవర్లలో 6 వికెట్ల నష్టానికి 176 పరుగులే చేసింది. దాంతో.. సూపర్ ఓవర్ అనివార్యమైంది.

మొదటి సూపర్‌ ఓవర్‌లో కేఎల్ రాహుల్, నికోలస్ పూరన్ బ్యాటింగ్‌కిరాగా.. జస్‌ప్రీత్ బుమ్రా బౌలింగ్ చేశాడు. తొలి బంతికి రాహుల్ సింగిల్ తీసివ్వగా.. రెండో బంతికి పూరన్ ఔటైపోయాడు. ఆ తర్వాత క్రీజులోకి దీపక్ హుడారాగా.. మూడో బంతికి మళ్లీ రాహుల్ సింగిల్, నాలుగో బంతికి హుడా సింగిల్ తీశారు. ఆ తర్వాత ఐదో బంతికి డబుల్ తీసిన రాహుల్.. ఆఖరి బంతికి ఔటైపోయాడు. దాంతో.. ముంబయి లక్ష్యం 6 పరుగులుగా నిలిచింది. రోహిత్ శర్మ, డికాక్ బ్యాటింగ్‌కి రాగా.. మహ్మద్ షమీ బౌలింగ్ చేశాడు. ఈ ఓవర్‌లో షమీ వరుస యార్కర్లు సంధించడంతో ముంబయి కూడా ఐదు పరుగులే చేయగలిగింది. ఆఖరి బంతికి డికాక్ రెండో పరుగు తీసేందుకు ప్రయత్నిస్తూ రనౌటయ్యాడు. దాంతో.. మళ్లీ స్కోర్లు సమమవడంతో రెండో సూపర్ ఓవర్ నిర్వహించారు.

రెండో సూపర్ ఓవర్‌లో ఈసారి ముంబయి ఫస్ట్ బ్యాటింగ్ చేయగా.. హార్దిక్ పాండ్య, కీరన్ పొలార్డ్ క్రీజులోకి వచ్చారు. దాంతో.. క్రిస్‌జోర్దాన్ బౌలింగ్ చేశాడు. ఈ ఓవర్‌లో తొలి బంతికి పొలార్డ్ సింగిల్.. ఆ తర్వాత వైడ్.. రెండో బంతికి మళ్లీ పాండ్యా సింగిల్.. మూడో బంతికి పొలార్డ్ ఫోర్.. మళ్లీ వైడ్.. నాలుగో బంతి డాట్.. ఐదో బంతికి పాండ్యా డబుల్ తీసే ప్రయత్నంలో రనౌట్.. ఆఖరి బంతికి రెండు పరుగులు వచ్చాయి. వాస్తవానికి ఆఖరి బంతిని పొలార్డ్ సిక్స్‌గా కొట్టినట్లు కనిపించింది. కానీ.. బౌండరీ లైన్ వద్ద గాల్లోకి ఎగిరిన మయాంక్ అగర్వాల్ బంతిని అందుకుని మైదానంలోకి విసిరి బౌండరీ లైన్ అవల పడిపోయాడు. దాంతో.. రెండు పరుగులే వచ్చాయి. మొత్తంగా.. 12 పరుగుల టార్గెట్ పంజాబ్ ముందు నిలిచింది. అనంతరం ఛేదనలో క్రిస్‌గేల్, మయాంక్ అగర్వాల్ బ్యాటింగ్‌కిరాగా.. ఈసారి ట్రెంట్ బౌల్ట్ బౌలింగ్‌కి వచ్చాడు. కానీ.. తొలి బంతికే సిక్స్ కొట్టిన గేల్.. రెండో బంతికి సింగిల్ తీయగా.. మూడు, నాలుగు బంతుల్ని బౌండరీకి తరలించిన మయాంక్.. పంజాబ్‌ని గెలుపు సంబరాల్లో ముంచెత్తాడు.



Source link

Leave a Reply

Your email address will not be published. Required fields are marked *