ms dhoni: ధోనీ నుంచి ఆ విధ్వంసం ఊహించలేదు.. పాక్ కుదేలైంది: కైఫ్ – former team india cricketer mohammad kaif recalls ms dhoni’s vizag masterclass


భారత మాజీ కెప్టెన్ మహేంద్రసింగ్ ధోనీ నుంచి కెరీర్ ఆరంభంలోనే ఓ విధ్వంసక ఇన్నింగ్స్‌ని అప్పట్లో ఎవరూ ఊహించలేదని మాజీ క్రికెటర్ మహ్మద్ కైఫ్ వెల్లడించాడు. బంగ్లాదేశ్‌తో 2004లో జరిగిన వన్డే మ్యాచ్‌తో అంతర్జాతీయ క్రికెట్‌లోకి అరంగేట్రం చేసిన ధోనీ.. మహ్మద్ కైఫ్ కారణంగానే ఆ మ్యాచ్‌లో రనౌట్‌గా.. అదీ డకౌట్‌గా వెనుదిరిగాడు. ఆ తర్వాత ఆడిన మూడు మ్యాచ్‌ల్లోనూ ఫెయిల్. దాంతో.. ధోనీ కెరీర్ ఇక ముగిసిపోయిందని కొందరు మాజీ క్రికెటర్లు పెదవి విరిచారు.

దేశవాళీ క్రికెట్‌లో భారీ సిక్సర్లు బాది హిట్టర్‌గా వెలుగులోకి వచ్చిన ధోనీ.. అంతర్జాతీయ క్రికెట్‌లో ఫస్ట్ మెరిసింది మాత్రం విశాఖపట్నంలోనే. పాకిస్థాన్‌తో జరిగిన ఆ మ్యాచ్‌లో ధోనీ 123 బంతుల్లోనే 15×4, 4×6 సాయంతో ఏకంగా 148 పరుగులు చేశాడు. ముఖ్యంగా.. ఆ మ్యాచ్‌లో ధోనీ బాదిన సిక్సర్లు స్టేడియం పైకప్పుని తాకేలా కనిపించాయి. అప్పటి పాక్ కెప్టెన్ ఇంజిమామ్ ఉల్ హక్.. ధోనీని అడ్డుకునేందుకు వరుసగా బౌలర్లని మార్చినా ప్రయోజనం లేకపోయింది. మిడిల్ ఓవర్లలో బౌలింగ్ చేసిన అఫ్రిదికి కూడా శిక్ష తప్పలేదు. ఎంతలా అంటే..? ఆ మ్యాచ్‌లో అత్యధిక పరుగులిచ్చిన బౌలర్‌గా అఫ్రిది నిలిచాడు. ధోనీ దె బ్బకి అఫ్రిది వేసిన 9 ఓవర్లలోనే 9.11 ఎకానమీతో 82 పరుగులు సమర్పించుకున్నాడు. ఇక ఆ మ్యాచ్‌‌‌లో భారత్ 58 పరుగుల తేడాతో గెలుపొందగా.. ధోనీ వెనుదిరిగి చూసుకోవాల్సిన అవసరం లేకపోయింది.

ధోనీ ఇన్నింగ్స్‌ గురించి తాజాగా మహ్మద్ కైఫ్ మాట్లాడుతూ ‘‘ధోనీ బ్యాటింగ్‌ని నేను చాలా దగ్గర నుంచి చూశాను. అప్పుడే నాకు అర్థమైంది.. ఇతను సుదీర్ఘకాలం టీమిండియా తరఫున ఆడగలడని. కెరీర్‌ ఆరంభంలోనే ఓ బ్యాట్స్‌మెన్ నుంచి అలాంటి విధ్వంసక ఇన్నింగ్స్‌ నమ్మశక్యంకానిదే. ధోనీ దెబ్బకి పాక్ బౌలింగ్ కకావికలమైంది. ముఖ్యంగా.. అతను బంతిని బాదిన తీరు అమోఘం. ఆరోజు నుంచి ఇప్పటి వరకూ ఆ తరహాలో ఎవరూ హిట్టింగ్ చేయలేదు. ఆ మ్యాచ్‌లో ధోనీని మూడో స్థానంలో అప్పటి కెప్టెన్ గంగూలీ పంపడం తెలివైన నిర్ణయం’’ అని కైఫ్ వెల్లడించాడు.



Source link

Leave a Reply

Your email address will not be published. Required fields are marked *