ms dhoni vs pakistan: పాక్‌కి ముచ్చెమటలు పట్టించిన ధోనీ.. హిట్టర్‌గా వెలుగులోకి – ms dhoni best innings: msd slammed his maiden odi century against pakistan in vizag in 2005


భారత మాజీ కెప్టెన్ మహేంద్రసింగ్ ధోనీ అంతర్జాతీయ క్రికెట్ ప్రయాణం అంత సాఫీగా మొదలవలేదు. దేశవాళీ క్రికెట్‌‌లో భారీ సిక్సర్లు బాది భారత సెలక్టర్ల దృష్టిలో పడిన ధోనీ.. టీమిండియా తరఫున ఆడిన తొలి నాలుగు మ్యాచ్‌ల్లోనూ ఘోరంగా విఫలమయ్యాడు. ఫస్ట్ మ్యాచ్‌లోనే లేని పరుగు కోసం ప్రయత్నించి డకౌటైన ధోనీ.. మొత్తంగా తొలి నాలుగు మ్యాచ్‌ల్లో చేసిన పరుగులు 22 మాత్రమే. దాంతో.. ధోనీ కెరీర్ ముగిసిపోయిందనే వాదనలు కూడా అప్పట్లో వినిపించాయి. కానీ.. ఒక్క ఇన్నింగ్స్‌ అతని కెరీర్‌ని మార్చేసి.. క్రికెట్‌ ప్రపంచానికి ఓ తిరుగులేని హిట్టర్‌ని పరిచయం చేసింది.

2005, ఏప్రిల్ 5న విశాఖపట్నం వేదికగా పాకిస్థాన్‌తో జరిగిన వన్డే మ్యాచ్‌లో మహేంద్రసింగ్ ధోనీ (148: 123 బంతుల్లో 15×4, 4×6) ఆకాశమే హద్దుగా చెలరేగాడు. అప్పటి వరకూ మిడిలార్డర్‌లో ఆడిన ధోనీని ఫస్ట్ డౌన్‌లో అప్పటి కెప్టెన్ సౌరవ్ గంగూలీ పంపగా.. పాకిస్థాన్ బౌలర్లని నిశ్చేష్టుల్ని చేస్తూ ధోనీ ఆడిన ఇన్నింగ్స్‌ భారత క్రికెట్‌లో చిరస్థాయిగా మిగిలిపోయింది. ముఖ్యంగా.. అఫ్రిది బౌలింగ్‌లో ఆఫ్ స్టంప్‌కి వెలుపలగా పడిన బంతిని కళ్లుచెదిరే రీతిలో ధోనీ కొట్టిన సిక్స్ మ్యాచ్‌కే హైలైట్‌గా నిలిచింది. ఈ క్రమంలో 49 బంతుల్లో 50 పరుగులు చేసిన ధోనీ.. ఆ తర్వాత దూకుడు పెంచి 88 బంతుల్లోనే సెంచరీ మార్క్‌ని అందుకోవడం విశేషం. ధోనీని అడ్డుకునేందుకు అప్పటి పాక్ కెప్టెన్ ఇంజిమామ్ ఉల్ హక్.. ఆరుగురు బౌలర్లని మార్చి మార్చి ప్రయోగించినా.. ఫలితం లేకపోయింది. తొలుత డ్రైవ్‌లు, స్వీప్ షాట్లతో బ్యాటింగ్ కొనసాగించిన ధోనీ.. ఆఖర్లో హిట్టింగ్‌కి దిగడంతో పాక్ బౌలర్లకి ముచ్చెమటలు పోసేశాయి. ఆ జట్టు కెప్టెన్ ఇంజిమామ్ అయితే ధోనీ సిక్స్ కొట్టిన తీరుతో మైదానంలోనే దిగాలుగా కూర్చుండిపోయాడు.

ఆ మ్యాచ్‌లో ధోనీ భారీ శతకం బాదడంతో తొలుత బ్యాటింగ్ చేసిన భారత్ జట్టు 9 వికెట్ల నష్టానికి 356 పరుగులు చేయగా.. ఛేదనలో తేలిపోయిన పాకిస్థాన్ 298 పరుగులకే ఆలౌటైంది. దీంతో.. 58 పరుగుల తేడాతో టీమిండియా గెలుపొందగా.. ధోనీకి మ్యాన్ ఆఫ్ ద మ్యాచ్ అవార్డు లభించింది. ఆ తర్వాత కూడా పాకిస్థాన్‌పై అదే తరహాలో ఆధిపత్యం చెలాయించిన ధోనీ.. కెప్టెన్‌గా భారత్‌కి 2007 టీ20 ప్రపంచకప్, 2011 వన్డే ప్రపంచకప్‌, 2013లో ఛాంపియన్స్‌ ట్రోఫీ అందించాడు. క్రికెట్ ప్రపంచంలో ఈ మూడు ఐసీసీ టోర్నీలు గెలిచిన ఏకైక‌ కెప్టెన్‌‌గా ధోనీ ఇప్పటికీ కొనసాగుతున్నాడు.



Source link

Leave a Reply

Your email address will not be published. Required fields are marked *