mumbai corona patients death: ఆక్సిజన్ అందక 19 మంది కరోనా రోగుల మృతి.. ముంబైలో ఘోరం – 19 coronavirus patients killed lack of oxygen supply in mumbai’s jogeshwari hospital


హారాష్ట్ర రాజధాని, దేశ ఆర్థిక రాజధాని ముంబైలో కరోనా వైరస్ వ్యాప్తి భయానక స్థితికి చేరుకుంది. అక్కడ కేసులు అంతకంతకూ పెరుగుతున్నా్యి. దీంతో ఆస్పత్రులన్నీ కిక్కిరిసిపోతున్నాయి. రోగులకు బెడ్లు, వసతులు సరిపోకపోవడం మరింత తలనొప్పిగా మారింది. తాజాగా దిగ్భ్రాంతికర ఘటన చోటు చేసుకుంది. ఆక్సిజన్‌ సదుపాయంలేక కేవలం గంటన్నర వ్యవధిలో ఏడుగురు కరోనా బాధితులు మృత్యువాతపడ్డారు. బృహన్ ముంబై కార్పొరేషన్ నడుపుతున్న జోగేశ్వరి ఆస్పత్రి ఈ విషాదానికి వేదికవడం గమనార్హం. తాజా మరణాలతో ఇదే ఆస్పత్రిలో ఆక్సిజన్ కొరత కారణంగా చనిపోయిన కరోనా రోగుల సంఖ్య 19కి చేరడం ఆందోళన కలిగించే అంశం.

జోగేశ్వరి ఆస్పత్రిలో ఆక్సిజక్‌ కొరత కారణంగా గత రెండు వారాలుగా 12 మంది ప్రాణాలు కోల్పోయారు. ఆదివారం ఉదయం (మే 30) మరో ఏడుగురు మరణించారు. వీరిలో కరోనా నుంచి కోలుకుంటున్న వారు కూడా ఉండటం మరింత విషాదకర అంశం. 200 పడకల సదుపాయం ఉన్న ఈ ఆస్పత్రిలో ఐసీయూలో 25 పడకలు ఉన్నాయి. కానీ, ఆక్సిజన్ సరఫరా ఏర్పాటు 15 పడకలకు మాత్రమే ఉంది. దీనికి తోడు వెంటిలేటర్ల కొరత తీవ్రంగా ఉంది. ఆస్పత్రికి కరోనా రోగులు పోటెత్తుతుండటంతో వైద్య సిబ్బంది చేతులెత్తేస్తున్నారు.

జోగేశ్వరి ఆస్పత్రికి కరోనా రోగులు పోటెత్తుతున్నారు. అరకొరగా ఉన్న పడకలు రోగులకు ఏమాత్రం సరిపోవడం లేదు. పైగా వైద్య సిబ్బంది కొరత తీవ్రంగా ఉంది. శనివారం రాత్రి ఐసీయూలో కేవలం నలుగురు సిబ్బందే విధుల్లో ఉన్నారు. వీరిలో ఇద్దరు ఈ ఏడాదే ఎంబీబీఎస్ పూర్తి చేసిన విద్యార్థులు కాగా.. మరో ఇద్దరు నర్సులు. ఘటన జరిగిన సమయంలో ఐసీయూ వార్దులో సీనియర్ డాక్టర్లు ఎవరూ లేరని ఆస్పత్రికి చెందిన ఓ నర్సు తెలిపారు.

డాక్టర్ వచ్చే సరికే గాల్లో కలిసిన ప్రాణాలు..
శనివారం రాత్రి ఐసీయూలో చికిత్స పొందుతున్న రోగుల్లో ఏడుగురు శ్వాస తీసుకోవడంలో ఇబ్బంది పడుతున్నట్లు వారి వద్ద అమర్చిన యంత్రాలు సంకేతం ఇచ్చాయి. ఇంతలోనే వారు శ్వాస అందక ఉక్కిరిబిక్కిరయ్యారు. ఐసీయూలో విధుల్లో ఉన్న ఓ నర్సు పరుగు పరుగున ఆస్పత్రి పదో అంతస్తుల్లో ఐసోలేషన్ వార్డులో విధుల్లో ఉన్న రెసిడెంట్ డాక్టర్ వద్దకు వెళ్లి పరిస్థితిని వివరించింది. ఆయన ఓ టెక్నీషియన్ వెంటబెట్టుకొని వచ్చేసరికి ఆ ఏడుగురి ప్రాణాలు గాల్లో కలిశాయి.

ఆక్సిజన్ సరఫరా, వెంటిలేటర్ల కోసం అధికారులకు పదే పదే విజ్ఞప్తి చేసినా స్పందన లేకపోవడంతో విసుగుచెందిన డాక్టర్లు.. ఐసీయూలో రోగుల మరణానికి తాము బాధ్యులం కాదంటూ సంచలన లేఖ రాశారు. కరోనా రోగులు వరుసబెట్టి మరణిస్తుంటే.. మానసికంగా తాము తీవ్ర ఒత్తిడికి గురవుతున్నామని.. అక్కడ పని చేయలేకపోతున్నామని ఆవేదన వ్యక్తం చేశారు.

తాజాగా మరణించిన ఏడుగురు రోగుల్లో ఇమ్రాన్ అనే 51 ఏళ్ల రోగి మరణించడం పట్ల ఆస్పత్రికి చెందిన సీనియర్ డాక్టర్ ఆగ్రహం వ్యక్తం చేశారు. నాలుగు రోజులుగా అతడి పరిస్థితి చాలా మెరుగైందని.. కరోనా నుంచి కోలుకుంటాడని భావిస్తున్న తరుణంలో ఆక్సిజన్ కొరత కారణంగా అతడు చనిపోవడం తనను తీవ్రంగా కలచివేసిందని ఆయన ఆవేదన వ్యక్తం చేశారు.

దేశంలో 40% కేసులు అక్కడ నుంచే..
మహారాష్ట్రలో కరోనా వైరస్‌ విజృంభణ ఆందోళనకర స్థాయిలో ఉంది. దేశంలో నమోదవుతున్న కేసుల్లో 40 శాతానికి పైగా మహారాష్ట్రలోనే నమోదవుతున్నాయి. అందులోనూ ముంబై నగరంలోనే ఎక్కువగా ఉన్నాయి. ఆదివారం ఉదయం అందిన వివరాల మేరకు రాష్ట్రంలో కరోనా కేసుల సంఖ్య 65,168కు చేరింది. కరోనాతో శనివారం ఒక్క రోజే 54 మంది మరణించారు. దీంతో మహారాష్ట్రలో కరోనా మరణాల సంఖ్య 2197కు ఎగబాకింది.

శనివారం ఒక్క రోజే 2940 కొత్త కేసులు నమోదవడం మహారాష్ట్రలో పరిస్థితి తీవ్రతకు అద్దం పడుతోంది. కరోనా బాధితుల సంఖ్య అంతకంతకూ పెరుగుతుండటంతో ముంబైలో ఆస్పత్రులన్నీ కిక్కిరిసిపోతున్నాయి. విధిలేని పరిస్థితుల్లో కొన్ని ఆస్పత్రుల్లో ఒకే బెడ్‌పై ఒకరి కంటే ఎక్కువ మంది పేషంట్లను ఉంచి చికిత్స అందిస్తున్నారు. ఈ నేపథ్యంలో ఉద్ధవ్ థాక్రే ప్రభుత్వం వాంఖడే క్రికెట్ మైదానాన్ని తాత్కాలిక ఆస్పత్రిగా మార్చాలని భావించింది. వివిధ కారణాల నేపథ్యంలో ఆ నిర్ణయాన్ని మార్చుకుంది.

Also Read: పాక్ పావురం గుట్టు రట్టు.. విడుదల చేసిన భారత్

Must Read:కరోనా శాంపిల్స్ ఎత్తుకెళ్లిన కోతి.. స్థానికుల్లో వణుకు!



Source link

Leave a Reply

Your email address will not be published. Required fields are marked *