namaste trump: ‘నమస్తే ట్రంప్’ కార్యక్రమంతోనే ఆ నగరాల్లో కరోనా విజృంభణ.. శివసేన ఎంపీ వ్యాఖ్యలు – shiv sena leader sanjay raut blames ‘namaste trump’ event for coronavirus spread


మిత్రపక్షంలో ఉన్నప్పుడు వీలు చిక్కినప్పుడల్లా బీజేపీపై విమర్శలు గుప్పించిన శివసేన.. వైరిపక్షంలో చేరిన తర్వాత మరింత దూకుడు పెంచింది. తాజాగా, కరోనా వైరస్ వ్యాప్తి విషయంలో బీజేపీపై శివసేన సీనియర్ నేత సంజయ్ రౌత్ సంచలన వ్యాఖ్యలు చేశారు. గుజరాత్, ముంబయి, ఢిల్లీలో కరోనా వైరస్ ఇంత పెద్ద సంఖ్యలో వ్యాప్తిచెందడానికి ఫిబ్రవరి చివరిన నిర్వహించిన నమస్తే ట్రంప్ కార్యక్రమమే కారణమని ఆయన దుయ్యబట్టారు. ఈ మూడు నగరాల్లో అమెరికాకు చెందిన ప్రతినిధులు పర్యటించారని, వారి నుంచే కరోనా వ్యాప్తి జరిగిందని ఆరోపించారు. ఈ మేరకు శివసేన అధికార పత్రిక సామ్నాలో ప్రత్యేక కథనం రాసిన సంజయ్ రౌత్.. బీజేపీని తూర్పారబట్టారు.

అంతేకాదు, ఎలాంటి ముందస్తు ప్రణాళిక లేకుండా కరోనా వైరస్ కట్టడికి లాక్‌డౌన్ విధించింది.. కానీ, ప్రస్తుతం ఆంక్షల సడలింపు బాధ్యతలను రాష్ట్రాల నెత్తిన పడేసిందని మండిపడ్డారు. అలాగే, మహారాష్ట్రలో తమ ప్రభుత్వాన్ని ఎప్పుడు కూల్చేదామా? అని కాచుకు కూర్చుందని, అయితే ఆ అవకాశం బీజేపీకి ఇవ్వబోమని అన్నారు. మహావికాస్ అఘాడీ మనుగడ తప్పనిసరి కాబట్టి.. బీజేపీ ప్రయత్నాలు చెల్లవని అన్నారు.

‘అమెరికా అధ్యక్షుడు డొనాల్డ్ ట్రంప్‌ పర్యటన సందర్భంగా ఘన స్వాగతం పలకడానికి పెద్ద సంఖ్యలో జనాలను పోగేశారు.. ట్రంప్‌తో వచ్చిన కొంత మంది ప్రతినిధులు ముంబయి, ఢిల్లీలోనూ పర్యటించి కరోనా వైరస్ వ్యాప్తికి కారణమయ్యారు’ అని వ్యాఖ్యానించారు. కరోనా వైరస్‌ను నియంత్రించడంలో విఫలమయ్యారనే సాకుతో ఉద్ధవ్ సర్కారు పడగొట్టి రాష్ట్రపతి పాలన తీసుకురావాలని ప్రయత్నిస్తే అది ఆత్మహత్యాసదృశ్యమవుతుందని హెచ్చరించారు. ఆరు నెలల కిందట రాష్ట్రపతి పాలన విధించి, తర్వాత దానిని ఎలా ఎత్తేశారని తెలుసంటూ అసెంబ్లీ ఎన్నికల ఫలితాల అనంతరం జరిగిన పరిణామాలను పరోక్షంగా ప్రస్తావించారు.

ఒకవేళ.. కరోనా వైరస్ సాకుతో రాష్ట్రపతి పాలన విధించాలనుకుంటే బీజేపీ అధికారంలో ఉన్నవాటితో సహా 17 రాష్ట్రాల్లో అమలుచేయాలని సవాల్ విసిరారు. కరోనా వైరస్‌ను కట్టడిచేయడంలో కేంద్రం పూర్తిగా వైఫల్యం చెందిందని, మహమ్మారిపై పోరుకు ఓ ప్రణాళికే లేకుండా పోయిందని సంజయ్ దుమ్మెత్తిపోశారు. ఇదే సమయంలో కాంగ్రెస్ నేత రాహుల్ గాంధీపై రౌత్ ప్రశంసలు కురిపించారు. లాక్‌డౌన్ ఎలా విఫలమయ్యిందో రాహుల్ గాంధీ చాలా చక్కగా విశ్లేషణ చేశారన్నారు.

రాష్ట్రంలో కరోనా వైరస్ కేసులు పెరుగుతున్నాయని, కట్టడి చేయాలంటే రాష్ట్రపతి పాలన విధించాలని కొంత మంది నీచ రాజకీయాలు చేస్తున్నారని దుయ్యబట్టారు. ఇటీవల మహారాష్ట్ర గవర్నర్‌ భగత్ సింగ్ కోష్యారీని కలిసిన బీజేపీ ఎంపీ నారాయణ్ రాణే.. రాష్ట్రంలో కరోనా కట్టడిలో మహా వికాస్ అఘాడీ ప్రభుత్వం విఫలమైందని, కాబట్టి రాష్ట్రపతి పాలన విధించాలని కోరారు. ఈ వ్యాఖ్యలకు సంజయ్ కౌంటర్ ఇవ్వడం గమనార్హం.



Source link

Leave a Reply

Your email address will not be published. Required fields are marked *