nepal new map: నేపాల్ ప్రధానికి బిగ్ షాక్.. కొత్త మ్యాప్‌కు బ్రేక్, భారత్ ప్రమేయం లేకుండానే! – nepal pm k p oli proposal to validate new map with lipulekh, kalapani delayed


భారత్‌లోని భూభాగాలను కలుపుకుంటూ నేపాల్ రూపొందించిన కొత్త మ్యాప్‌కు బ్రేక్ పడింది. గత కొన్ని రోజులుగా భారత్‌తో కయ్యానికి కాలు దువ్వుతున్న నేపాల్‌ ప్రధాని కేపీ ఓలికి స్వదేశంలో గట్టి ఎదురుదెబ్బ తగిలింది. కొత్త మ్యాప్ ఆమోదానికి అవసరమైన రాజ్యాంగ సవరణకు పార్లమెంట్‌ సభ్యుల అంగీకారం పొందడంలో కేపీ ఓలీ విఫలమయ్యారు. దీంతో రాజ్యాంగ సవరణ ప్రక్రియ అనివార్యంగా వాయిదా పడింది. నేపాల్‌ పార్లమెంట్‌లో విపక్ష సభ్యుల నుంచి తీవ్ర అభ్యంతరాలు ఎదురవుతున్న నేపథ్యంలో ఈ కొత్త మ్యాప్ ఆమోదం పొందే అవకాశాలు తక్కువగానే ఉన్నాయి.

భారత్‌లోని లిపులేఖ్, కాలాపానీ, లింపియాధురా ప్రాంతాలను తమ దేశ అంతర్గత భూభాగాలుగా చూపుతూ నేపాల్ ఇటీవల కొత్త మ్యాప్‌ రూపొందించింది. దీనిపై భారత్ తీవ్ర అభ్యంతరం తెలిపింది. నేపాల్ మంత్రిమండలి ఆమోదం పొందిన ఈ కొత్త మ్యాప్‌కు రాజ్యాంగ సవరణ తప్పనిసరి. ఇందుకోసం పార్లమెంట్‌లో బిల్లు పెట్టేందుకు నేపాల్‌లోని వివిధ పార్టీల ఏకాభిప్రాయ సాధనలో ప్రధాని కేపీ శర్మ ఓలీ విఫలమయ్యారు.

ప్రధాన ప్రతిపక్షమైన నేపాల్‌ కాంగ్రెస్‌.. కేంద్ర వర్కింగ్‌ కమిటీలో చర్చించిన తర్వాతే తమ నిర్ణయం చెబుతామని స్పష్టం చేసింది. దీంతో రాజ్యాంగ సవరణ చేయాలనే ప్రభుత్వ ప్రయత్నాలు వాయిదా పడ్డాయి. గోర్ఖా జాతీయ వాదాన్ని తెరపైకి తెచ్చి లబ్ధి పొందాలని ప్రధాని భావిస్తున్నారని.. ఇందులో ఆయన వ్యక్తిగత ప్రయోజనాలు దాగి ఉన్నాయని విపక్షాలు విమర్శిస్తున్నాయి.

నేపాల్ కృత్రిమంగా చేపట్టిన సరిహద్దు మార్పులను ఎట్టి పరిస్థితుల్లోనూ అంగీకరించబోమని భారత్‌ స్పష్టం చేసింది. నేపాల్ రూపొందించిన మ్యాప్‌కు ఎలాంటి చారిత్రక ఆధారాలు లేవని పేర్కొంది. సరిహద్దు సమస్యను ద్వైపాక్షిక చర్చల ద్వారా పరిష్కరించుకోవాలనే భావనకు విరుద్ధంగా నేపాల్ చర్యలు ఉన్నాయని భారత్‌ ఆక్షేపించింది. భారత దేశ సార్వభౌమాధికారాన్ని, ప్రాదేశిక సమగ్రతను గౌరవించి.. న్యాయ విరుద్ధమైన కార్టోగ్రాఫిక్‌ ప్రకటనను ఉపసంహరించుకోవాలని నేపాల్ ప్రభుత్వాన్ని కోరుతున్నాం అని విదేశాంగ శాఖ అధికార ప్రతినిధి అనురాగ్ శ్రీవాస్తవ పేర్కొన్నారు.

భారత్‌పై అక్కసు ప్రదర్శించడానికి నేపాల్‌ను చైనా పావుగా వాడుకుంటోంది. నేపాల్‌లో 2019 అక్టోబర్‌లో చైనా అధ్యక్షుడు జీ జిన్‌పింగ్‌ పర్యటన ముగిసిన కొద్ది రోజుల్లోనే భారత్‌ – నేపాల్‌ మధ్య కాలాపానీ వివాదం భగ్గుమంది. నాటి నుంచి ఇరు దేశాల మధ్య సంబంధాలు క్షీణించడం మొదలుపెట్టాయి. మే 8న టిబెట్‌లోని మానససరోవర్‌ యాత్ర కోసం ఉత్తరాఖండ్‌ నుంచి లిపులేక్‌ పాస్‌ వరకు భారత్‌ నిర్మించిన రహదారిని రక్షణ మంత్రి రాజ్‌నాథ్‌ సింగ్‌ ప్రారంభించడంపై నేపాల్‌ అభ్యంతరాలు లేవనెత్తింది. దీంతో వివాదం ముదిరింది.

తమ దేశంలో వైరస్‌ వ్యాప్తికి భారతే కారణమంటూ నేపాల్ పార్లమెంట్‌లో ప్రసంగిస్తూ ఆ దేశ ప్రధాని కేపీ ఓలీ తీవ్రమైన వ్యాఖ్యలు చేశారు. చైనా కంటే భారత్ వైరస్ ప్రమాదకరమని వ్యాఖ్యానించారు. ‘నేపాల్‌ మరెవరి కోసమో సమస్యలు సృష్టిస్తోంది’ అని భారత సైనికాధిపతి జనరల్‌ నరవణే ఇటీవల కీలక వ్యాఖ్యలు చేసిన విషయం తెలిసిందే.

Also Read:ఇరుకైన కాలాపానీ స్థావరం భారత్‌కు ఎందుకంత కీలకం?

Must Read:మెదక్: బోరుబావిలో బాలుడు.. ఘటనలో సంక్లిష్టతలు, కీలక వివరాలు



Source link

Leave a Reply

Your email address will not be published. Required fields are marked *