ngt verdict vizag gas leak: రూ. 50 కోట్లు ఇవ్వాల్సిందే.. విశాఖ గ్యాస్ లీక్ దుర్ఘటన‌పై ఎన్‌జీటీ సంచలన తీర్పు – national green tribunal verdict on vizag gas leak tragedy


ఎల్‌జీ పాలిమర్స్‌ సంస్థ డిపాజిట్‌ చేసిన రూ. 50 కోట్లను పర్యావరణ పునరుద్ధరణ, పరిహారానికి వాడాలని జాతీయ హరిత ట్రైబ్యునల్‌ (ఎన్‌జీటీ) ఆదేశించింది. విశాఖలో విషాదం నింపిన ఎల్‌జీ పాలిమర్స్ గ్యాస్ లీక్ ఘటనపై ఎన్‌జీటీ బుధవారం తీర్పు వెలువరించింది. ఎల్‌జీ పాలిమర్స్‌ కేసుకు సంబంధించి ఎన్‌జీటీ లిఖితపూర్వక ఆదేశాలు జారీ చేసింది. ఈ మేరకు పర్యావరణ పునరుద్ధరణ కమిటీ ఏర్పాటు చేయాలని ఆదేశాల్లో పేర్కొంది. కేంద్ర పర్యావరణ శాఖ, పీసీబీ నుంచి ఒక్కొక్కరు, విశాఖ కలెక్టర్‌తో కమిటీ ఏర్పాటు చేయాలని.. రెండు నెలల్లోగా కమిటీ పునరుద్ధరణ ప్రణాళిక ఇవ్వాలని ఆదేశాలు జారీ చేసింది.

కమిటీకి కేంద్ర పర్యావరణ శాఖ నోడల్‌ ఏజెన్సీగా వ్యవహరించాలని ఎన్‌జీటీ సూచించింది. బాధితులకు పరిహారం ఎంత ఇవ్వాలన్నది నిర్ణయించేందుకు గాను మరో కమిటీని కూడా ఏర్పాటు చేయాలని ఆదేశాల్లో పేర్కొంది. రెండు వారాల్లో కమిటీని ఏర్పాటు చేసి రెండు నెలల్లోగా నివేదిక సమర్పించాలని కేంద్ర పర్యావరణ శాఖ కార్యదర్శిని ఆదేశించింది.

లాక్‌డౌన్ తర్వాత అనుమతి లేకుండా పునరుద్ధరణ పనులు చేపట్టేందుకు బాధ్యులైన వారిని గుర్తించి ఏపీ ప్రభుత్వ ప్రధాన కార్యదర్శి (సీఎస్‌) చర్యలు తీసుకోవాలని ఎన్‌జీటీ సూచించింది. తీసుకున్న చర్యలకు సంబంధించిన నివేదికను రెండు నెలల్లోగా ఇవ్వాలని ఆదేశించింది. చట్టబద్ధ అనుమతి లేకుండా ఎల్‌జీ పాలిమర్స్‌ మళ్లీ ప్రారంభం కాకూడదని స్పష్టం చేసింది. చట్టబద్ధ అనుమతి వచ్చాక ప్రారంభించేందుకు మేమే అనుమతి ఇస్తామని తెలిపింది. ఇలాంటి ప్లాంట్లలో పర్యావరణ నిబంధనల తనిఖీకి నిపుణుల కమిటీ వేయాలని.. ఆ కమిటీ తనిఖీలు చేసి 3 నెలల్లో నివేదిక ఇవ్వాలని పేర్కొంది. సుమోటోగా కేసు స్వీకరించే అధికారం ఎన్‌జీటీకి ఉందని పేర్కొంది. పర్యావరణానికి హాని కలిగినప్పుడు మౌనంగా కూర్చోలేమని స్పష్టం చేసింది.



Source link

Leave a Reply

Your email address will not be published. Required fields are marked *