Pakistan ODI captain: పాక్‌ కెప్టెన్‌కి ఇంగ్లీష్‌తో పనేంటి..? ఉర్దూ తెలుసుగా..!: ముస్తాక్ – babar azam knows urdu and needs nothing else feels saqlain mushtaq


మైదానంలో వికెట్ల మధ్య పరుగెత్తడంలో పాకిస్థాన్ క్రికెటర్లు ఎలా తడబడతారో.. ఇంగ్లీష్‌లో మాట్లాడాలంటే అంతకంటే ఎక్కువగా ఇబ్బందిపడుతుంటారు. ఇద్దరు బ్యాట్స్‌మెన్‌లు ఒకే ఎండ్‌వైపు పరుగెత్తి పాక్ క్రికెటర్లు రనౌటడం తరచూ జరుగుతూ ఉంటుంది. అలానే గ్రామర్‌ ఫాలో అవకుండా వారు మాట్లాడే ఇంగ్లీష్‌ కూడా మీడియా సమావేశాల్లో నవ్వులు పూయిస్తూ ఉంటుంది. పాకిస్థాన్ మాజీ కెప్టెన్ సర్ఫరాజ్ అహ్మద్ మాట్లాడే ఇంగ్లీష్‌ అర్థం చేసుకోవాలంటే.. అతని మాటల్ని మరోసారి వినాల్సిందే. అందుకే.. కనీసం ప్రస్తుత కెప్టెన్ బాబర్ అజామ్ అయినా మంచిగా ఇంగ్లీష్ నేర్చుకోవాలని ఆ దేశ మాజీ క్రికెటర్ తన్వీర్ అహ్మద్ సూచించాడు. కానీ.. తన్వీర్ సూచనని మరో మాజీ క్రికెటర్ సక్లైన్ ముస్తాక్ కొట్టిపారేస్తూ.. పాక్ కెప్టెన్‌కి ఉర్దూ వస్తే చాలు అని తేల్చేశాడు.

2019లో పాకిస్థాన్ పర్యటనకి వెళ్లిన శ్రీలంక ద్వితీయ శ్రేణి జట్టు అక్కడ మూడు టీ20 సిరీస్‌లో పాక్‌ని క్లీన్‌స్వీప్ చేసేసింది. దాంతో.. కెప్టెన్సీ బాధ్యతల నుంచి సర్ఫరాజ్ అహ్మద్‌ని తప్పించిన పాకిస్థాన్ క్రికెట్ బోర్డు (పీసీబీ).. టీ20 బాధ్యతలు బాబర్ అజామ్‌కి, టెస్టు కెప్టెన్సీని అజహర్ అలీకి ఇచ్చింది. కానీ.. వన్డే టీమ్ పగ్గాలు మాత్రం గత వారం వరకూ ఎవరికీ ఇవ్వని పీసీబీ.. ఆఖరికి బాబర్‌ అజామ్ చేతికే వన్డే కెప్టెన్సీని కూడా ఇచ్చింది. దాంతో.. వన్డే, టీ20 కెప్టెన్‌గా తరచూ మీడియా సమావేశాల్లో బాబర్ అజామ్ మాట్లాడాల్సి ఉంటుందని చెప్పుకొచ్చిన తన్వీర్ అహ్మద్.. ఇంగ్లీష్ నేర్చుకోవాలని సూచించాడు. కానీ.. అతనికి ఎవరూ మద్దతు తెలపడం లేదు.

‘‘కెప్టెన్‌గా బాధ్యతలు చేపట్టిన బాబర్ అజామ్‌ని ఇంగ్లీష్ నేర్చుకోమనడం పూర్తిగా సంబంధం లేని విషయం. బాబర్‌కి ఉర్దూ తెలుసు. తన భావాల్ని వ్యక్తపరచడానికి అది చాలు. ప్రపంచంలో చాలా మంది లీడర్స్.. తమ మాతృభాష‌లోనే మాట్లాడుతున్నారు. ఒకవేళ అవసరం అనుకుంటే మ్యాచ్ ప్రజెంటర్స్ బాబర్ మాటల్ని ఇంగ్లీష్‌లో చెప్తారు’’ అని ముస్తాక్ వెల్లడించాడు.



Source link

Leave a Reply

Your email address will not be published. Required fields are marked *