Palghar lynching : హిందువులకు కాదు.. మానవత్వానికి న్యాయం జరగాలి: హరీష్ శంకర్ – don’t campaign justice for hindus, we need justice for humanity; harish shankar on palghar incident


మహారాష్ట్రలోని పాలఘర్ పరిధిలో ఈనెల 16న జరిగిన సాధువుల హత్యోదంతం దేశ వ్యాప్తంగా కలకలం సృష్టించిన విషయం తెలిసిందే. పాల్‌ఘర్‌ జిల్లాలో ఇద్దరు సాధువులతో సహా వారి డ్రైవర్‌పై కొంతమంది మూకుమ్మడిగా కర్రలతో దాడి చేసి వారిని హతమార్చారు. పోలీసుల సమక్షంలోనే సాధువులను అత్యంత దారుణంగా హతమార్చడాన్ని హిందువులు సహించలేకపోతున్నారు. అయితే, ఈ హత్యలకు మతం రంగు పూయవద్దని మహారాష్ట్ర ముఖ్యమంత్రి ఉద్ధవ్ థాక్రే అన్నారు. ఒకవేళ ఎవరైనా మతం రంగు పూయడానికి ప్రయత్నిస్తే సహించేది లేదని, కఠిన చర్యలు తప్పవని హెచ్చరించారు.


అయితే, ఈ ఘటనపై టాలీవుడ్ దర్శకుడు హరీష్ శంకర్ ట్విట్టర్ ద్వారా స్పందించారు. సాధువులను అత్యంత దారుణంగా కొట్టి చంపడంపై ఆయన తీవ్ర ఆవేదన వ్యక్తం చేశారు. ‘‘మహారాష్ట్రలోని పాల్‌ఘర్‌లో జరిగిన క్రూరమైన హత్యోదంతాన్ని చూసి చాలా బాధపడ్డాను. ఓ మతానికి సంబంధించి ఇలా జరిగిందని నేను బాధపడటంలేదు. ఎందుకంటే, మతం కన్నా మానవత్వం గొప్పదని నేను భావిస్తాను. కానీ, లౌకికవాదుల నుంచి ఇలాంటి ట్వీట్లు చూడలేకపోవడం బాధగా ఉంది’’ అని హరీష్ శంకర్ ట్వీట్ చేశారు.

అయితే, ఈ ఘటన విషయంలో న్యాయం కోసం మత ప్రస్తావన తీసుకురావద్దని హరీష్ శంకర్ కూడా ప్రజల్ని కోరారు. ‘‘దయచేసి హిందువులకు న్యాయం జరగాలి అనే నినాదాన్ని తీసుకురాకండి. మానవత్వానికి న్యాయం జరగాలని మనం పోరాడాలి. మతాన్ని అడ్డుపెట్టుకుని ఈ మరణాలపై రాజకీయాలు చేస్తున్నవారిని చూసి నాకు జాలేస్తోంది. హింసను తీవ్రంగా ఖండిస్తున్నాను. ఎట్టిపరిస్థితుల్లోనూ ఇది అంగీకారయోగ్యం కాదు’’ అని తన ట్వీట్‌లో హరీష్ పేర్కొన్నారు.

కాగా, పాల్‌ఘర్ ఘటనలో ముంబయిలోని కందివలికి చెందిన చిక్నె మహారాజ్‌ కల్పవృక్షగిరి (70), సుశీల్‌గిరి మహరాజ్‌ (35), డ్రైవర్‌ నీలేశ్‌ తెగడె (30)లు ప్రాణాలు కోల్పోయారు. వారి గురువు మహంత్ శ్రీరాం గిరి అంత్యక్రియల్లో పాల్గొనేందుకు ఈనెల 16న కారులో గుజరాత్ బయలుదేరారు. లాక్‌డౌన్ నడుస్తుండటంతో హైవే మీదుగా కాకుండా అంతర్గత రోడ్డుమార్గం ద్వారా వెళ్లారు. ఈ క్రమంలో దాద్రా నగర్ హవేలి బోర్డర్ వద్ద వారి కారును కేంద్ర బలగాలు ఆపాయి. వెనక్కి వెళ్లిపోవాలని సూచించాయి. అక్కడి నుంచి వారు వెనుదిరగగా.. గడ్చంచ్లే గ్రామస్థులు వారిని దొంగలుగా భావించి పోలీసుల ఎదుటే వారిపై దాడి చేసి చంపేశారు.

Also Read:
‘టామ్ అండ్ జెర్రీ’ దర్శకుడు, దిగ్గజ యానిమేటర్ మృతి

ఈ కేసులో ఇప్పటికే ఐదుగురు కీలక నిందితులతో పాటు 100 మంది అనుమానితులను పోలీసులు అదుపులోకి తీసుకున్నట్టు మహారాష్ట్ర సీఎం ఉద్ధవ్ థాక్రే వెల్లడించారు. ఈ సంఘటతో సంబంధం ఉన్నట్లు ఆరోపణలున్న ఇద్దరు పోలీసు అధికారులను కూడా సస్పెండ్ చేసినట్టు చెప్పారు. ఈ ఘటనపై పూర్తి విచారణకు సీఐడీ క్రైమ్ బ్రాంచ్ ఏడీజీ అతుల్‌చంద్ర కులకర్ణి ఆధ్వర్యంలో ప్రత్యేక బృందాన్ని నియమించినట్టు థాక్రే తెలిపారు. ఈ ఘటనలో మతానికి సంబంధ లేదని, ఆ ప్రాంతంలో ఇప్పటి వరకు మతపరమైన ఘర్షణలు జరగలేదని థాక్రే స్పష్టం చేశారు.





Source link

Leave a Reply

Your email address will not be published. Required fields are marked *