parikshit raju: మామ Vs కోడలు: డిప్యూటీ సీఎంకు అండగా భర్త పరిక్షిత్.. తండ్రికి కౌంటర్ – deputy cm pushpa srivani husband parikshit raju counters to his father satrucharla chandrasekhar raju


ప్రభుత్వ సంక్షేమ పథకాలను అర్హులైన ప్రతి ఒక్కరికి అందిస్తున్నట్లు డిప్యూటీ సీఎం పాముల పుష్ప శ్రీవాణి భర్త, అరకు పార్లమెంట్ నియోజకవర్గ ఇన్‌చార్జి శత్రుచర్ల పరిక్షిత్‌ రాజు స్పష్టం చేశారు. శుక్రవారం జీయమ్మవలస మండలం చిన్నమేరంగి డిప్యూటీ సీఎం క్యాంపు కార్యాలయంలో పరిక్షిత్ రాజు విలేకరులతో మాట్లాడుతూ.. ఉప ముఖ్యమంత్రి పాముల పుష్ప శ్రీవాణి నియోజకవర్గ అభివృద్ధికి అహర్నిశలు కృషి చేస్తుంటే సొంతవారే విమర్శించడం సరికాదని తన తండ్రి శత్రుచర్ల చంద్రశేఖర రాజుకు కౌంటర్ ఇచ్చారు. అర్హులైన వారికి పార్టీలకు సంబంధం లేకుండా సంక్షేమ పథకాలు అందించాలని ముఖ్యమంత్రి జగన్‌మోహన్‌రెడ్డి ఆదేశించారని గుర్తు చేశారు. ఉప ముఖ్యమంత్రి పుష్ప శ్రీవాణి నెలలో 25 రోజులు నియోజకవర్గంలోనే ఉంటున్నారని వివరించారు.

కరోనా సమయంలో సైతం ప్రజలకు అందుబాటులో ఉంటూ నియోజకవర్గంలోని పలు గ్రామాలకు రహదారులు, సాగు, తాగునీటి సదుపాయాలను కల్పిస్తుంటే విమర్శించడం తగదన్నారు. గతంలో ఎన్నడూ లేని విధంగా అభివృద్ధి పనులు చేపడుతున్నందుకు అన్నివర్గాల ప్రజలు హర్షం వ్యక్తం చేస్తున్నారని ఆయన తెలిపారు. ప్రతిపక్షం కూడా ప్రశ్నించలేని వాతావరణంలో సొంత వాళ్లే ఇలా వేలి ఎత్తి చూపటం సమంజసం కాదన్నారు. వైసీపీ వారికే పెన్షన్లు ఇస్తున్నామని తన తండ్రి ఆరోపించినట్టు మేం వ్యవహరించటం లేదని పరిక్షిత్ రాజు స్పష్టం చేశారు.

ఏపీ డిప్యూటీ సీఎం పాముల పుష్ప శ్రీవాణిపై ఇటీవలే ఆమె మామ, వైసీపీ నేత శత్రుచర్ల చంద్రశేఖర రాజు సంచలన వ్యాఖ్యలు చేసిన విషయం తెలిసిందే. ఇటీవల ఆయన మీడియా ముందుకొచ్చి పుష్ప శ్రీవాణి సొంత నియోజకవర్గమైన కురుపాంలో ఎలాంటి అభివృద్ధి జరగలేదని ఆరోపించారు. రోడ్ల సదుపాయం, తాగునీటి కల్పన, అర్హులైన వారికి పెన్షన్లు కల్పించడంలో స్థానిక నాయకులు విఫలమయ్యారంటూ తన కోడలు డిప్యూటీ సీఎం పుష్పశ్రీవాణిని ఉద్దేశించి సంచలన కామెంట్స్ చేశారు. సొంత పార్టీ నేత అది కూడా కోడలిపై ఇలాంటి వ్యాఖ్యలు చేయడంతో అటు వైసీపీలో.. ఇటు జిల్లా వ్యాప్తంగా చర్చనీయాంశమైంది.



Source link

Leave a Reply

Your email address will not be published. Required fields are marked *