Pawan Kalyan: ఆ ఇసుకంతా ఎటు పోయింది? నిధుల సంగతేంటి.. జగన్ సర్కారుకు పవన్ ప్రశ్నలు – janasena chief pawan kalyan criticise ysrcp government over construction workers problems


వైఎస్సార్ కాంగ్రెస్ పార్టీ ప్రభుత్వంపై జనసేన అధ్యక్షుడు పవన్ కళ్యాణ్ మరోసారి విమర్శలు గుప్పించారు. భవన నిర్మాణ కార్మికుల సంక్షేమ మండలికి స్వయం ప్రతిపత్తి కల్పించాలని పవన్ డిమాండ్ చేశారు. భవన నిర్మాణ కార్మికులతో జనసేన చీఫ్ పవన్ కళ్యాణ్ ఆదివారం టెలీ కాన్ఫరెన్స్ నిర్వహించారు. ఈ సమావేశానికి 13 జిల్లాల నుంచి 150 మంది భవన నిర్మాణ కార్మికులు హాజరయ్యారు. ఈ సందర్భంగా పవన్ మాట్లాడుతూ.. ఇసుక సరఫరాను సులభతరం చేసి భవన నిర్మాణ కార్మికులకు ఉపాధి కల్పించాలని డిమాండ్ చేశారు.

ఇసుక విధానంలో గత ప్రభుత్వం చేసిన తప్పిదాలనే ప్రస్తుత వైసీపీ ప్రభుత్వమూ చేస్తోందని పవన్ మండిపడ్డారు. ఇసుక మాఫియాను అదుపు చేయకపోతే నిర్మాణ రంగం కుదేలవుతుందని, ఇసుక ధరలతో మధ్యతరగతి ప్రజలు గృహ నిర్మాణం అంటే భయపడి వెనక్కి తగ్గుతున్నారని వ్యాఖ్యానించారు. లాక్ డౌన్ సమయంలోనూ ఇసుక లారీలు వేలాదిగా తిరిగాయని, ఇసుక మాత్రం డంపింగ్ ప్రదేశాలకు చేరలేదన్నారు. వేలాది లారీల ఇసుకంతా ఎటు వెళ్లిపోయిందని పవన్ ప్రశ్నించారు.

ఇసుక కొరత, కరోనా వైరస్ వల్ల పనులు దొరక్క కార్మికులు అల్లాడిపోతున్నారని పవన్ ఆవేదన వ్యక్తం చేశారు. భవన నిర్మాణ కార్మికుల సంక్షేమ మండలి నిధులను ఇతర ప్రయోజనాల కోసం దారిమళ్లిస్తున్నారని ఆగ్రహం వ్యక్తం చేశారు. భవన నిర్మాణ కార్మికులకు జనసేన పార్టీ అండగా నిలుస్తుందని స్పష్టం చేశారు. ఇళ్లు నిర్మించుకొంటున్న వారు, నిర్మాణాలు చేపట్టినవారు భవన నిర్మాణ కార్మికుల సంక్షేమానికి సెస్ చెల్లిస్తారని, ఆ నిధులు ఉన్న భవన నిర్మాణ కార్మికుల సంక్షేమ మండలికి స్వయం ప్రతిపత్తి కల్పించాలని పవన్ డిమాండ్ చేశారు.



Source link

Leave a Reply

Your email address will not be published. Required fields are marked *