prakasam car accident: రెండు లారీల మధ్య నుజ్జైన పెళ్లి బృందం కారు.. ఒంగోలు ప్రమాదంలో షాకింగ్ – car crashed between two lorries in prakasam district


ప్రకాశం జిల్లా కేంద్రం ఒంగోలు బైపాస్‌లో ఈ రోజు తెల్లవారుజామున ఘోర ప్రమాదం జరిగింది. పెళ్లి బృందం వెళ్తున్న టెంపో ముందు వెళ్తున్న లారీని ఢీకొట్టి ఇరుక్కుపోగా.. రివర్స్ వచ్చేలోపు వెనక నుంచి మరో లారీ ఢీకొట్టింది. రెండు లారీల మధ్య వాహనం నుజ్జునుజ్జైంది. ఈ ఘటనలో ఇద్దరు అక్కడికక్కడే మృతి చెందగా మరో ఎనిమిది మందికి గాయాలయ్యాయి. వారిలో నలుగురి పరిస్థితి విషమంగా ఉంది. అయితే వధూవరులు మరో కారులో ఉండడంతో సేఫ్‌గా బయటపడ్డారు.

గుంటూరు జిల్లా తెనాలికి చెందిన జంటకు తిరుమలలో పెద్దల సమక్షంలో వివాహం జరిగింది. అనంతరం వధూవరుల బంధువులు టెంపో వాహనంలో.. వధూవరులు మరో కారులో తెనాలికి బయలుదేరారు. తెల్లవారుజామున 5.30 గంటల సమయంలో ఒంగోలు బైపాస్‌ వద్ద బంధువులు ప్రయాణిస్తున్న టెంపో ప్రమాదానికి గురైంది. ముందు వెళ్తున్న లారీ డ్రైవర్ నిద్రమత్తులో వరుస మారి వచ్చి సడెన్ బ్రేక్ వేయడంతో వెనుక వేగంగా వస్తున్న టెంపో బలంగా ఢీకొట్టింది.

టెంపో ముందు భాగం లారీ వెనక భాగంలో ఇరుక్కుపోయింది. టెంపో డ్రైవర్ వాహనాన్ని వెనక్కి తీసుకొచ్చేందుకు రివర్స్ చేసే క్రమంలో వెనక నుంచి మరో లారీ టెంపోని ఢీకొట్టింది. రెండు లారీల మధ్య టెంపో వాహనం నుజ్జునుజ్జు అయింది. ఈ ప్రమాదంలో వరుడి మేనమామ సత్యనారాయణ, పెద్దమ్మ అన్నపూర్ణ అక్కడికక్కడే మృతి చెందారు. మరో నలుగురికి తీవ్రగాయాలయ్యాయి. మిగిలిన వారు స్వల్ప గాయాలతో బయటపడ్డారు.

రెండు లారీల మధ్య వాహనం నుజ్జవడంతో కొందరు వాహనంలోనే ఇరుక్కుపోయారు. పోలీసులు, రోడ్డు భద్రతా సిబ్బంది స్పాట్‌కి చేరుకుని సహాయక చర్యలు చేపట్టారు. అతికష్టమ్మీద వాహనంలో ఇరుక్కుపోయిన వారిని క్షేమంగా బయటికి తీసుకొచ్చారు. అయితే ప్రమాదానికి కారణమైన రెండు లారీలు అక్కడి నుంచి పరారైనట్లు తెలుస్తోంది. పోలీసులు లారీలను గుర్తించే పనిలో పడ్డారు.

Also Read: మహిళను కాపాడబోతూ యువకుడి సెల్ఫీ, నీటమునిగి మృతి.. ఆమె ప్రియుడి ట్విస్ట్



Source link

Leave a Reply

Your email address will not be published. Required fields are marked *