pulwama attack 2019: పుల్వామా దాడి వ్యూహకర్త హతం.. అతని అనుచరులు కూడా.. – fauji bhai top jem commander and planner of 2019 pulwama attack, shot dead


2019లో జమ్ము కశ్మీర్‌లోని పుల్వామాలో 40 మంది సీఆర్పీఎఫ్ జవాన్లపై జరిగిన ఆత్మాహుతి దాడి ఘటనకు వ్యూహం రచించిన ఉగ్రవాది ఫౌజీ భాయ్‌ను భద్రతా దళాలు బుధవారం హతమార్చాయి. దక్షిణ కశ్మీర్‌లోని పుల్వామాలో కంగన్ గ్రామం వద్ద ఓ ఇంట్లో తలదాచుకుంటోన్న ఫౌజీ భాయ్, అతని అనుచరులను తుద ముట్టించినట్లు ప్రభుత్వ వర్గాలు ప్రకటించాయి. క‌శ్మీర్ ఐజీ విజ‌య్ కుమార్ నేతృత్వంలో సాగిన ఇంటెలిజెన్స్ ఆప‌రేష‌న్ ద్వారా ఫౌజీ భాయ్ స‌మాచారం బహిర్గతమైంది. ఇటీవ‌ల క‌శ్మీర్‌లో జ‌రుగుతున్న ఉగ్ర దాడుల‌కు ఇత‌నే కీల‌క వ్యూహాక‌ర్త అని అధికారులు చెప్పారు. నియంత్రణ రేఖ వెంట జ‌రుగుతున్న అల్లర్లకూ మూల కారణం ఇతనే అని వెల్లడించారు. ఎన్‌కౌంట‌ర్‌లో ఇద్రిస్‌తో పాటు జాహిద్ మ‌న్జూర్ వాణి, మ‌న్జూర్ అహ్మద్ కార్‌లు కూడా హ‌త‌మ‌య్యారు. 2017లో ఈ ఇద్దరూ జైషేలో చేరారు.

పాకిస్థాన్‌కు చెందిన జైష్-ఎ-మహ్మద్ ఉగ్ర సంస్థకు టాప్ క‌మాండ‌ర్‌గా ఫౌజీ భాయ్ కొనసాగుతున్నాడు. క‌శ్మీర్‌లో ఇప్పటికే అనేక ఉగ్ర ఆపరేషన్లకు వ్యూహాలు పన్నాడు. జైష్-ఎ మిలిట‌రీ చీఫ్ అబ్దుల్ రౌఫ్ అస్గర్ ఇత‌ణ్ని రిక్రూట్ చేసుకొని, 2018లో భార‌త్‌లోకి పంపించిన‌ట్లుగా సమాచారం. అంతేకాక, ఇతను భారత్‌లో పలు పేర్లతో చెలామణి అయ్యాడు. క‌శ్మీర్ ఇంటెలిజెన్స్ పోలీసుల రికార్డులో ఫౌజీ భాయ్‌కు అబ్దుల్ రెమ్మాన్‌, ఇద్రిస్, హైద‌ర్, లంబూ అనే పేర్లు ఉన్నాయి. ఈ పేర్లతో ఎక్కువగా చెలామణి అయ్యేవాడు.

త‌న ఆప‌రేష‌న్స్ కోసం ఫౌజీభాయ్ ఎప్పుడూ మొబైల్ ఫోన్ ఆప‌రేట్ చేయ‌లేదు. ఇత‌ర క‌మ‌ర్షియ‌ల్ నెట్‌వ‌ర్క్స్‌ను కూడా అత‌ను వినియోగించ‌లేదు. కేవ‌లం న‌మ్మక‌మైన కొరియ‌ర్ల ద్వారానే అత‌ను స‌మాచారం చేర‌వేసేవాడు. ఎన్‌క్రిప్ట్ చేసిన శాటిలైట్ ఫోన్‌సెట్‌తోనే ఫౌజీభాయ్ ఉగ్ర సంస్థ జైష్-ఎ అధినాయకత్వంతో సంప్రదించేవాడని తేలింది. స్థానిక తెగ‌ల‌ను ఆత్మాహుతి దాడుల‌కు ప్రోత్సహించడంలోనూ ఫౌజీ భాయ్ కీల‌కంగా వ్యవహరించినట్లుగా ఇంటెలిజెన్స్ వ‌ర్గాలు పేర్కొన్నాయి.



Source link

Leave a Reply

Your email address will not be published. Required fields are marked *