Rohit Sharma: రోహిత్ శర్మ 208*.. రితిక ఏడుపునకి కారణం చెప్పిన హిట్‌మ్యాన్ – team india opener rohit sharma reveals why wife ritika sajdeh cried during his 3rd double-century


టీమిండియా ఓపెనర్ రోహిత్ శర్మ క్రీజులో కుదురుకుంటే అవలీలగా పరుగులు రాబట్టేస్తుంటాడు. మ్యాచ్ గమానికి అనుగుణంగా గేర్చు మార్చుకుంటే వెళ్లే రోహిత్ శర్మ.. టాప్‌గేర్‌లోకి వెళ్లాడంటే భారీ స్కోర్లు నమోదవాల్సిందే. ఫార్మాట్‌కి అనుగుణంగా బ్యాటింగ్ స్టయిల్‌ని మార్చుకునే ఈ హిట్‌మ్యాన్.. వన్డేల్లో ఇప్పటికే మూడు డబుల్ సెంచరీలు బాదేశాడు. ఇప్పటి వరకూ క్రికెట్ ప్రపంచంలో ఎవరూ ఒకటికి మించి వన్డేల్లో డబుల్ సెంచరీలు నమోదు చేయలేదు.

వన్డేల్లో మూడో డబుల్ సెంచరీని రోహిత్ శర్మ అందుకున్న సమయంలో స్టేడియంలో కూర్చుని మ్యాచ్‌ని వీక్షిస్తున్న అతని భార్య రితిక కన్నీళ్లు పెట్టుకుంది. ఆరోజే రోహిత్ శర్మ పెళ్లి రోజు కూడా కావడంతో.. డబుల్ సెంచరీ సెలబ్రేషన్స్‌లో భాగంగా స్టేడియంలోని బాల్కనీ వైపు చూస్తూ రింగ్ పింగర్‌కి రోహిత్ ముద్దుపెట్టాడు. దాంతో రితిక భావోద్వేగానికి గురైందేమో..? అని అంతా ఊహించారు. కానీ.. ఆరోజు మ్యాచ్‌లో రితిక అందుకు ఏడ్వలేదట. ఈ విషయాన్ని తాజాగా రోహిత్ శర్మ ఓ ఇంటర్వ్యూలో వెల్లడించాడు.

2017, డిసెంబరు 13న మొహాలి వేదికగా శ్రీలంకతో జరిగిన ఆ వన్డే మ్యాచ్‌కి కెప్టెన్ విరాట్ కోహ్లీ దూరమవగా.. రోహిత్ శర్మ చేతికి పగ్గాలొచ్చాయి. దాంతో ఓపెనర్‌గా బరిలోకి దిగిన రోహిత్ శర్మ (208 నాటౌట్: 153 బంతుల్లో 13×4 ,12×6) ఆకాశమే హద్దుగా చెలరేగి డబుల్ సెంచరీతో నాటౌట్‌గా నిలిచాడు. దాంతో.. ఫస్ట్ బ్యాటింగ్ చేసిన భారత్ 4 వికెట్ల నష్టానికి 392 పరుగులు చేయగా.. ఛేదనలో శ్రీలంక 251/8కే పరిమితమైంది.

‘‘నేను డబుల్ సెంచరీ సాధించిన సమయంలో ఎందుకు కన్నీళ్లు పెట్టుకున్నావని ఆ మ్యాచ్ తర్వాత రితికని అడిగాను. దానికి ఆమె ఏం చెప్పిందంటే..? నువ్వు 196 రన్స్ వద్ద పరుగు కోసం డైవ్ చేశావ్.. దాంతో నీ చేయి మెలితిరిగిందేమో..? అని భయపడిపోయా అంది. ఆ కారణంగానే డబుల్ సెంచరీ వరకూ ఆమె ఎమోషనల్‌గానే కనిపించింది’’ అని రోహిత్ వెల్లడించాడు.



Source link

Leave a Reply

Your email address will not be published. Required fields are marked *