rythu bandhu in telangana: ఈ పంటలు వేస్తే గొప్ప లాభాలు.. రైతు బంధు కూడా వారికే..: కేసీఆర్ – agriculture is profitable in telangana says cm kcr


రాష్ట్రంలో నియంత్రిత విధానంలో వ్యవసాయం చేయాల్సిన అవసరం ఉందని ముఖ్యమంత్రి కేసీఆర్ వెల్లడించారు. ఏ ప్రాంతాల్లో ఏ పంట వేయాలనే విషయం ప్రభుత్వమే సూచిస్తుందని, రైతులు దాన్ని అనుసరించి లాభాలు గడించాలని ఆకాంక్షించారు. ఈ వర్షాకాలంలో 70 లక్షల ఎకరాల్లో పత్తి పంట వేయాలని సీఎం సూచించారు. పత్తి పంట వల్ల ఎక్కువ లాభాలు ఆర్జించవచ్చని చెప్పారు. అయితే, ఏ రకం పత్తి పంట వేయాలనేది ప్రభుత్వమే చెబుతుందని వివరించారు. 40 లక్షల ఎకరాల్లో ఈ వానాకాలంలో వరి పంట వేయాలని నిర్దేశించారు. వర్షాకాలంలో మక్కలు వేయొద్దని.. కందులు, పత్తి పంట వేస్తే మరిన్ని లాభాలు అర్జించవచ్చని సీఎం సూచించారు. యాసంగిలో మక్క పంట పెడితే మంచిదని సూచించారు. 15 లక్షల ఎకరాల్లో కంది పంట వేయాలని సూచించారు.

వరి పంట ఎవరి ఇష్టం వచ్చినట్లు వారు వేస్తే వారికి రైతు బంధు వర్తించబోదని తేల్చి చెప్పారు. నియంత్రిత విధానంలో వ్యవసాయం చేస్తేనే వర్తిస్తుందని వివరించారు. అద్భుతమైన వ్యవసాయ రాష్ట్రంగా తెలంగాణ అవతరిస్తోందని కేసీఆర్ అన్నారు. సోమవారం ప్రగతి భవన్‌లో కేసీఆర్ మీడియాతో మాట్లాడారు.

‘‘రెండు లక్షల ఎకరాల్లో కూరగాయలు పండించాలి. నిజామాబాద్, నిర్మల్, జగిత్యాల, కేసముద్రం ప్రాంతాల్లో 1.25 ఎకరాల్లో పసుపు పంట వేసుకోవచ్చు. సోయాబిన్, ఎండు మిర్చి, పండ్ల తోటలు యథాతథంగా వాడుకోవచ్చు.’’

‘‘అద్భుతమైన వ్యవసాయ రాష్ట్రం తెలంగాణ. ప్రపంచంలో ఎక్కడా లేని భూమి తెలంగాణలో ఉంది. తెలంగాణలో అన్ని పంటలు పండుతాయి. సగటున రాష్ట్రంలో 900 మి.మీ వర్షం పడుతుంది. పంటల ఉత్పత్తిలో తెలంగాణ చరిత్ర స్రుష్టిస్తోంది. రైతు బీమా అందిస్తున్న ఏకైక రాష్ట్రం తెలంగాణ సర్కార్. 24 గంటల ఉచిత విద్యుత్ పంట పొలాలకు అందిస్తున్నాం. మేక్రో ఇరిగేషన్‌పై 90 శాతం సబ్సిడీ అందిస్తున్నాం. పాడి రైతులను కూడా ఆదుకుంటున్నాం. అధునాత పద్ధతుల్లో పంటలు పండించేందుకు కొన్ని పద్ధతులను కూడా రాష్ట్రం శ్రీకారం చుడుతోంది. 2604 వ్యవసాయ క్లస్టర్లను ఏర్పాటు చేస్తున్నాం. ప్రతి క్లస్టర్‌కు ఏఈవోను నియమించాం. ఈ క్లస్టర్లలో రైతు వేదికల నిర్మాణం కోసం 350 కోట్లను కేటాయించాం.’’

‘‘ఎరువులు, విత్తనాలు కొరతను పూర్తిగా అధిగమించాం. కల్తీ విత్తన వ్యాపారులపై పీడీ యాక్టు అమలు చేస్తున్నాం. కేంద్రాన్ని ఒప్పించి ఇలాచేస్తున్నాం. కరోనా వచ్చిన సందర్భంలో రైతులు పండించిన మొత్తం ధాన్యాన్ని మొత్తం మనమే గ్రామాల్లో కొంటున్నాం. కనీస మద్దతు ధర ఇచ్చి కొంటున్నాం. యావత్ దేశంలో ఎవరూ ఇలా చేయడం లేదు. తెలంగాణలో పండుతున్న పత్తి దేశంలోనే నెం.1. దేశంలో మరెక్కడా ఇంత నాణ్యత లేదు.’’ అని కేసీఆర్ మాట్లాడారు.



Source link

Leave a Reply

Your email address will not be published. Required fields are marked *