rythubandhu: కేసీఆర్.. నీకు దణ్ణం పెట్టి చెప్తున్నా.. రైతు ఆవేదన – a farmer from sircilla ask kcr to take their advices


ముఖ్యమంత్రి కేసీఆర్ విధానాల పట్ల ఓ రైతు ఆవేదన చెందుతూ ప్రశ్నిస్తున్న వీడియో వైరల్ అవుతోంది. సిరిసిల్ల అసెంబ్లీ నియోజకవర్గ పరిధిలోని దేశాయిపల్లి గ్రామానికి చెందిన ఓ రైతు క్షేత్రస్థాయిలో తమకు అన్యాయం జరుగుతోందని ఆరోపించారు. రైతులను గుర్తించి వారికి ప్రభుత్వ ఫలాలను నేరుగా అందించాలని కోరారు. సీఎం కేసీఆర్ కరీంనగర్ ఎంపీగా ఉన్న సమయంలో సిరిసిల్ల మండలంలోని దేశాయిపల్లి గ్రామాన్ని దత్తత తీసుకున్నారని, ఆ సమయంలో కేసీఆర్ తనతో మాట్లాడారని రైతు గుర్తు చేసుకున్నారు. ఓ లోకల్ ఛానెల్‌తో రైతు మాట్లాడిన విషయాలివీ..

‘‘మీరు ఆరేళ్ల క్రితం ముఖ్యమంత్రి కాకముందే రూ.లక్ష రుణమాఫీ అన్నారు. అప్పటి నుంచి విడతల వారీగా చేస్తున్నది వడ్డీకే సరిపోతోంది. తర్వాత రూ.25 వేలలోపు రుణాలు మాఫీ అన్నారు. అసలింతకీ అసలు రుణమాఫీ ఎప్పుడు చేస్తారు? రైతుల పాస్ పుస్తకాలు బ్యాంకుల నుంచి ఇంటికొచ్చేదెప్పుడు? మీరు లక్ష వరకూ మాఫీ చేసి, ఆపై ఉన్నది రైతును కట్టుకోమని అడుగండి. ఇలా చేస్తే రైతులు పెళ్లాం పుస్తెలమ్మైనా సరే, మాఫీ పోను మిగతాది కట్టుకొని పాస్ పుస్తకాలు విడిపించుకుంటారు. మేం ఇలా మాట్లాడుతున్నాం కాబట్టి మీకు వ్యతిరేకం అని దయచేసి అనుకోకండి. మనమందం తెలంగాణ మనుషులమే.’’

‘‘రైతు బంధు విషయంలోనూ.. వందల ఎకరాల భూమి ఉన్నోళ్లకి, బీడు భూముల వాళ్లకి డబ్బు ఎందుకిస్తున్నారు. నిజంగా పొలం దున్నే మనిషికి డబ్బు రావడం లేదు. ఐదెకరాలు లేదా పదెకరాల పొలం ఉన్నోళ్లకి రైతు బంధు వచ్చేలా ఎందుకు చేయడం లేదు. భారీగా పొలం ఉన్నవారికి రైతు బంధు ఎందుకు?’’

‘‘రాజశేఖర్ రెడ్డి ఉన్నప్పుడు నిఖార్సైన రైతులను క్యాంప్ ఆఫీస్‌కు పిలిపించుకొని మాట్లాడేవారు. ఇప్పుడు మీరు ఏ రైతులతో మాట్లాడుతున్నారు. ఎవరి సలహాలు తీసుకుంటున్నారు. అసలైన రైతు మీ దగ్గరికి రావట్లేదు. సీఎం గారూ మీరు ఎంపీగా ఉన్నప్పుడు దేశాయిపల్లిని దత్తత తీసుకున్నారు. మీరు అన్నసంతర్పణ పెట్టినప్పుడు నేను మీతో మాట్లాడాను. కరీంనగర్ ఎంపీగా ఉన్నప్పుడు కూడా నన్ను పిలిపించుకొని మాట్లాడావు. ఇప్పుడు మాలాంటి రైతులు గుర్తు రావడం లేదా?’’

‘‘ప్రస్తుతం రైతు కుమిలికుమిలి సచ్చిపోతున్నడు. అలా జరగకుండా వారి కళ్లలో సంతోషం నింపు. సబ్సిడీపై ట్రాక్టర్ల పంపిణీ చేపట్టారు. కానీ వాటిని ఎవరికిచ్చారు. నీ లీడర్లకు, కార్యకర్తలే ఇచ్చుకున్నావు. దాన్ని వారు మరుసటి రోజే రూ.లక్ష కమిషన్లకు అమ్ముకున్నరు. అసలు దున్నుకొనే రైతులకే ట్రాక్టర్లు దక్కలేదు. కావాలంటే దేశాయిపల్లికి వచ్చి పరిశీలించుకోవచ్చు. మీకు దండం పెట్టి చెప్తున్నా. అసలైన రైతులకు అన్యాయం చేయకు. రైతును గుర్తింపునివ్వాలంటే నీ వల్లే సాధ్యం.’’ అని రైతు ఆవేదన వ్యక్తం చేశాడు.



Source link

Leave a Reply

Your email address will not be published. Required fields are marked *