Sabarimala Ayyappa temple: జూన్ 14 నుంచి అయ్యప్ప దర్శనం: టోకెన్ విధానం.. ప్రస్తుతం కేరళ భక్తులకే అనుమతి – sabarimala ayyappa temple set to reopen from june 14 for motnhly pooja, festival


శబరిమల అయ్యప్పస్వామి దర్శనానికి టోకెన్ విధానం అమలుచేయనున్నట్టు కేరళ ముఖ్యమంత్రి పినరయ్ విజయన్ శనివారం వెల్లడించారు. అయితే, ప్రస్తుతం కేరళ భక్తులకు మాత్రమే అనుమతిస్తామని ఆయన స్పష్టం చేశారు. లాక్‌డౌన్ తర్వాత కేంద్రం మార్గదర్శకాలకు అనుగుణంగా ఆలయంలోకి భక్తులను అనుమతిస్తామని విజయన్ పేర్కొన్నారు. దాదాపు మూడు నెలల అనంతరం నెలవారీ పూజల కోసం జూన్ 14 అయ్యప్ప ఆలయం తెరుచుకోనుండగా.. ఐదు రోజుల పాటు భక్తులను దర్శనానికి అనుమతిస్తారు. జూన్ 15న మళయాలం మాసం మిథునం ప్రారంభం కానుండగా.. శబరిమల ఆలయంలో 19 నుంచి 28 వరకు ఉత్సవాలను నిర్వహించనున్నారు.

గంటకు కేవలం 200 మంది భక్తులను మాత్రమే అనుమతిస్తామని, విర్చువల్ క్యూ విధానం పాటిస్తామని కేరళ దేవాదాయ మంత్రి కడకంపల్లి సురేంద్రన్ అన్నారు. రద్దీని నియంత్రించడానికి సన్నిధానం ముందు 50 మందినే అనుమతిస్తామని తెలిపారు. స్వామి దర్శనానికి ముందు పంబ, సన్నిధానంలో థర్మల్ స్కానింగ్ చేయనున్నారు. భక్తులు తప్పనిసరిగా మాస్క్‌లు ధరించి, శానిటైజేషన్ వెంట తెచ్చుకోవాలని మంత్రి సూచించారు. శబరిమలలో భక్తులకు ఎలాంటి వసతి కల్పించమని పేర్కొన్నారు.

ఉదయం 4 గంటల నుంచి మధ్యాహ్నం 1.00 గంట వరకు, మధ్యాహ్నం 4.00 నుంచి 11.00 గంటల వరకు రెండు స్లాట్స్‌లో దర్శనానికి అనుమతిస్తారు. పంప వరకే వాహనాలకు అనుమతిస్తామని అధికారులు తెలిపారు. బయట రాష్ట్రాల నుంచి వచ్చే భక్తులు కోవిడ్ జాగ్రత్త పాస్ రిజిస్ట్రేషన్ పోర్టల్‌లో ముందుగా నమోదుచేసుకోవాలి. స్వామివారి ప్రసాదాలు అప్పం, అరవణ పాయసం ఆన్‌లైన్‌లోనే బుక్ చేసుకోవాలి. అలాగే, తమకు కరోనా లేదని నిర్ధారించే సర్టిఫికెట్‌ను కూడా చూపించాల్సి ఉంటుంది.

గురవాయూర్ ఆలయంలోకి సోమవారం నుంచి భక్తులను అనుమతించనున్నారు. గంటలకు 150 మంది చొప్పున రోజుకు 600 మందిని మాత్రమే అనుమతించనున్నారు. ఇక్కడ కూడా టైమ్ స్లాట్ విధానం అమలుచేయనున్నారు. బ్యాచ్‌కు 50 మంది భక్తులు చొప్పున ఆలయంలోకి ప్రతి పావు గంటకు అనుమతిస్తారు. రోజుకూ 60 వివాహాలకు అధికారులు అనుమతులు జారీచేశారు. మార్చి 24న తర్వాత గురవాయూర్‌లో వివాహాలను నిలిపివేయగా.. శుక్రవారం తొలిసారి 9 జంటలకు అనుమతించారు.



Source link

Leave a Reply

Your email address will not be published. Required fields are marked *