Sachin Tendulkar 100th century: సచిన్ 100వ సెంచరీ చేజారడం.. బౌలర్, అంపైర్ చావుకొచ్చింది – england pacer tim bresnan received death threats after denying sachin tendulkar his 100th ton


అంతర్జాతీయ క్రికెట్‌లో 100 సెంచరీలు నమోదు చేసిన ఏకైక క్రికెటర్‌గా భారత దిగ్గజ బ్యాట్స్‌మెన్ సచిన్ టెండూల్కర్ అరుదైన రికార్డులో కొనసాగుతున్నాడు. కానీ.. 99 నుంచి 100వ శతకానికి చేరుకోవడానికి సచిన్‌కి దాదాపు ఏడాది సమయం పట్టింది. 2011 వన్డే ప్రపంచకప్‌లో దక్షిణాఫ్రికాపై 99వ సెంచరీని నమోదు చేసిన టెండూల్కర్.. 2012 ఆసియా కప్‌లో బంగ్లాదేశ్‌పై 100 సెంచరీల మైలురాయిని అందుకున్నాడు. మధ్యలో కొన్ని సార్లు శతకానికి చేరువలో అతను ఔటవగా.. 2011 ఇంగ్లాండ్ పర్యటనలో 91 పరుగుల వద్ద అంపైర్ రోడ్ టక్కర్ తొందరపాటు నిర్ణయం కారణంగా సచిన్ ఆ మైలురాయిని మిస్ అయ్యాడు.

ఓవల్ వేదికగా ఇంగ్లాండ్‌తో జరిగిన ఆ మ్యాచ్‌లో సచిన్ 100 సెంచరీల రికార్డ్‌ని అందుకునేలా కనిపించాడు. కానీ.. ఫాస్ట్ బౌలర్ టిమ్ బ్రెస్నన్ బౌలింగ్‌లో అతను ఎల్బీడబ్ల్యూగా ఔటైపోయాడు. కానీ.. రిప్లైలో బంతి ఔట్‌సైడ్ ఆఫ్ స్టంప్‌‌లో పడి లెగ్ స్టంప్‌ని వెలుపలగా తాకేలా కనిపించింది. దాంతో.. అంపైర్ రోడ్ టక్కర్‌తో పాటు అప్పీల్ చేసిన బౌలర్ బ్రెస్నన్‌పై సచిన్ అభిమానులు విరుచుకుపడ్డారు. ఎంతలా అంటే..? సచిన్ అభిమానుల బెదిరింపులకి భయపడి రోడ్ టక్కర్ కొన్ని రోజుల పాటు సెక్యూరిటీని నియమించుకున్నాడట. ఈ విషయాన్ని తాజాగా బ్రెస్నన్ వెల్లడించాడు.

‘‘నిజమే ఆ బంతి లెగ్‌ స్టంప్‌ వెలుపల కొద్దిగా మాత్రమే తాకేలా వెళ్తున్నట్లు రిప్లైలో కనిపించింది. అయినప్పటికీ ఆస్ట్రేలియాకి చెందిన అంపైర్ రోడ్ టక్కర్ ఔటిచ్చేశాడు. ఒకవేళ సచిన్‌‌ని అప్పుడు టక్కర్ ఔటివ్వకుండా ఉండింటే.. కచ్చితంగా 100వ సెంచరీని అందుకునేవాడు. ఆ మ్యాచ్ తర్వాత నేను, టక్కర్.. తీవ్రస్థాయిలో బెదిరింపులని ఎదుర్కొన్నాం. సచిన్‌ని ఔటివ్వడానికి నీకు ఎంత ధైర్యం..? నిన్ను చంపేస్తామంటూ టక్కర్‌కి బెదిరింపులకి వెళ్లాయట. నేను కూడా చాలా రోజుల పాటు అలాంటి బెదిరింపులనే ఎదుర్కొన్నాను. కొన్ని నెలల తర్వాత టక్కర్ ఓసారి నన్ను కలిసినప్పుడు.. తాను సెక్యూరిటీని పెట్టుకున్నట్లు వెల్లడించాడు’’ అని బ్రెస్నన్ వివరించాడు.



Source link

Leave a Reply

Your email address will not be published. Required fields are marked *