salary cuttings in telangana: జీతాల్లో కోతలు తప్పవు, ఆ 1500 ఇక రావు.. కేసీఆర్ కీలక నిర్ణయాలు – telangana govt continuous salary cuttings to govt employees due to lockdown


లాక్ డౌన్ కారణంగా తలెత్తిన తెలంగాణ రాష్ట్ర ఆర్థిక పరిస్థితిపై ముఖ్యమంత్రి కేసీఆర్ బుధవారం ప్రగతి భవన్‌లో ఉన్నత స్థాయి సమీక్ష నిర్వహించిన సంగతి తెలిసిందే. లాక్ డౌన్‌లో ఆదాయం బాగా తగ్గిపోయిన వేళ, మళ్లీ పుంజుకొనేందుకు అనుసరించాల్సిన వ్యూహంపై చర్చించారు. సీఎస్ సోమేశ్ కుమార్, ఆర్థిక శాఖ ముఖ్య కార్యదర్శి రామకృష్ణా రావు, సీఎంఓ ముఖ్య కార్యదర్శి నర్సింగ్ రావు, ఇతర సీనియర్ అధికారులు ఈ సమీక్షలో పాల్గొన్నారు.

ఈ సందర్భంగా సీఎం మాట్లాడుతూ.. ‘‘తెలంగాణకు నెల నెలా రూ.12 వేల కోట్ల ఆదాయం రావాల్సి ఉంది. కానీ లాక్ డౌన్ వల్ల మొత్తం పోయింది. మే నెలలో కేంద్రానికి వెళ్లే పన్నుల్లో రాష్ట్ర వాటాగా రావాల్సిన రూ.982 కోట్లతో కలిపి కేవలం రూ.3,100 కోట్లు మాత్రమే వచ్చాయి. ఇటీవల ప్రభుత్వం లాక్ డౌన్ నిబంధనల సడలింపులు ఇచ్చినా ఆదాయం పెద్దగా ఏం పెరగలేదు. ఈ డబ్బులతోనే అన్ని అవసరాలు తీరాలి. రాష్ట్రం ఏడాదికి రూ.37,400 కోట్లను అప్పులకు నెలనెలా కిస్తీల రూపంలో చెల్లించాల్సి ఉంది.’’ అని కేసీఆర్ గుర్తు చేశారు.

‘‘ప్రస్తుత పరిస్థితుల నేపథ్యంలో అప్పులను రీ షెడ్యూల్ చేయాలని రాష్ట్ర ప్రభుత్వం కేంద్ర ప్రభుత్వాన్ని కోరింది. కానీ కేంద్రం పట్టించుకోలేదు. దీంతో కిస్తీలు తప్పకుండా కట్టాల్సిన పరిస్థితి వచ్చింది. ఉద్యోగుల జీతాలు, పెన్షన్లు పూర్తిగా చెల్లించాలంటే రూ.3 వేల కోట్లకు పైగా వ్యయం అవుతోంది. రాష్ట్ర ఖజానా కూడా ఖాళీ అవుతుంది. కాబట్టి తగిన వ్యూహం అనుసరించాలి’’ అని సీఎం కేసీఆర్ అధికారులకు సూచించారు.

రాష్ట్ర ఆర్థిక పరిస్థితి గడ్డు పరిస్థితులు ఎదుర్కొంటున్న వేళ కొన్ని కీలక నిర్ణయాలు తీసుకున్నారు. అప్పుల కిస్తీలను విధిగా చెల్లించాలని, దానికి మరో మార్గం లేదని నిర్ణయించారు. ఆసరా పెన్షన్లను ఆపకూడదని నిర్ణయించారు. ‘‘లాక్ డౌన్ నేపథ్యంలో పేదలకు ఒక్కొక్కరికి 12 కిలోల బియ్యాన్ని మే నెలలో కూడా కొనసాగించాలి. లాక్ డౌన్ సడలింపుల కారణంగా కార్మికులు, కూలీలకు పని దొరుకుతోంది. కాబట్టి ప్రతీ కుటుంబానికి నెలకు రూ.1,500 నగదు కార్యక్రమం మే నెల నుంచి ఆపేయాలి. ప్రజాప్రతినిధుల వేతనాల్లో 75 శాతం, అఖిల భారత సర్వీసుల వేతనాల్లో 60 శాతం, ప్రభుత్వ ఉద్యోగుల వేతనాల్లో 50 శాతం, పెన్షన్లలో 25 శాతం కోతలను మే నెలలో కూడా యథాతథంగా కొనసాగించాలి.’’ అని సమీక్షలో నిర్ణయించారు.

Must Read:

బావిలో 9 శవాలు: సంజయ్ మొబైల్ హిస్టరీ మొత్తం అదే, అతని తెలివికి పోలీసులు షాక్



Source link

Leave a Reply

Your email address will not be published. Required fields are marked *