Sania Mirza: ఇజాన్ మళ్లీ ఎప్పుడు తన తండ్రిని చూస్తాడో..?: సానియా మీర్జా – don’t know when izhaan will be able to see his father again: sania mirza


కరోనా వైరస్ కారణంగా భారత్‌లో లాక్‌డౌన్ విధించడంతో స్టార్ టెన్నిస్ ప్లేయర్ సానియా మీర్జా గత మూడు నెలలుగా తన భర్త, పాకిస్థాన్ సీనియర్ క్రికెటర్ షోయబ్ మాలిక్‌కి దూరంగా ఉంటోంది. మార్చి నెలలో తొలిసారి లాక్‌డౌన్ విధించిన కొద్దిరోజుల ముందే యుఎస్ఏ నుంచి హైదరాబాద్‌కి వచ్చిన సానియా మీర్జా.. కొడుకు ఇజాన్‌తో కలిసి ఇక్కడే ఉంది. మరోవైపు అదే సమయంలో పాకిస్థాన్ సూపర్ లీగ్ (పీఎస్‌ఎల్)‌లో ఆడుతున్న షోయబ్ మాలిక్.. పాక్‌‌లో ఉండిపోయాడు. దీంతో.. ఇజాన్ మళ్లీ ఎప్పుడు తన తండ్రిని చూస్తాడో..? అని ఫేస్‌బుక్ లైవ్‌లో సానియా మీర్జా ఆవేదన వ్యక్తం చేసింది.

‘‘షోయబ్ మాలిక్ పాకిస్థాన్‌లో చిక్కుకుపోయాడు.. నేను ఇక్కడే (హైదరాబాద్)‌ ఉండిపోయాను. మా ఇద్దరికీ ఈ ఎడబాటు చాలా కష్టంగా ఉంది. ఎందుకంటే.. చిన్న పిల్లాడు ఇజాన్ ఉన్నాడు కదా..? మళ్లీ ఎప్పుడు ఇజాన్ తన తండ్రిని చూస్తాడో..? అయితే.. మేము ఇద్దరం ప్రాక్టికల్‌గా ఆలోచిస్తాం. మాలిక్‌కి 65 ఏళ్ల వయసు ఉన్న తల్లి ఇంటి వద్ద ఉంది. కాబట్టి.. అతను అక్కడే ఉండి ఆమెని చూసుకోవాలి. ప్రస్తుతానికి మేము పూర్తి ఆరోగ్యంగా ఉన్నాము.. త్వరలోనే ఈ క్లిష్ట పరిస్థితుల్ని (కరోనా వైరస్) నుంచి బయటపడతామని ఆశిస్తున్నా’’ అని సానియా మీర్జా వెల్లడించింది.

2018, అక్టోబరులో ఇజాన్ జన్మించగా.. గత ఏడాది మళ్లీ టెన్నిస్‌లోకి రీఎంట్రీ ఇచ్చిన సానియా మీర్జా మునుపటి తరహాలో నిలకడగా రాణిస్తోంది. మరోవైపు పాకిస్థాన్ టీ20 జట్టులో మాత్రమే ఆడుతున్న షోయబ్ మాలిక్.. ఈ ఏడాది అక్టోబరులో ఆస్ట్రేలియా వేదికగా జరగనున్న టీ20 ప్రపంచకప్‌లో ఆడి రిటైర్మెంట్ ప్రకటించాలని యోచిస్తున్నాడు.



Source link

Leave a Reply

Your email address will not be published. Required fields are marked *