siddipet anganwadi worker death: మృత్యువుతో పోరాడి ఓడిన అంగన్వాడీ ఆయా.. కాళ్లు, చేతులు తీసేసినా దక్కని ప్రాణం.. – siddipet anganwadi ayah dies of electrocution after 20 days in icu


కరెంట్ షాక్‌తో తీవ్ర గాయాలపాలై.. ఇన్ఫెక్షన్ కారణంగా డాక్టర్లు కాళ్లు చేతులు తీసేయగా.. మూడు వారాలపాటు మృత్యువుతో పోరాడిన ఓ మహిళ ఓడింది. మంత్రి హరీశ్ రావు ప్రత్యేక శ్రద్ధ చూపినప్పటికీ.. విధిరాతకు ఆమె తలొగ్గింది. ఈ విషాద ఘటన వివరాల్లోకి వెళ్తే.. తెలంగాణ అవతరణ దినోత్సవం సందర్భంగా జూన్ 2న.. సిద్ధిపేట జిల్లా దౌల్తాబాద్‌ మండలం దొమ్మాటలో జాతీయ జెండా ఎగరేయడానికి ఏర్పాట్లు చేస్తుండగా.. కరెంట్ షాక్ తగలింది. ఈ ఘటనలో అంగన్వాడీ టీచర్ భర్త అశోక్ అక్కడిక్కడే ప్రాణాలు కోల్పోగా.. ఆయా కళావతి అలియాస్ కళవ్వకు తీవ్ర గాయాలయ్యాయి.

మంత్రి హరీశ్ రావు సూచనల మేరకు చికిత్స కోసం కళావతిని వెంటనే హైదరాబాద్ తరలించారు. కానీ పరిస్థితి విషమంగా ఉండటంతో చికిత్స అందించడానికి హాస్పిటళ్లు వెనకడుగు వేశాయి. దీంతో గజ్వేల్ జిల్లా హాస్పిట్‌కు తీసుకొచ్చి చికిత్స అందించారు. ఆమెను ఎలాగైనా బతికించాలనే తపనతో ఉన్న హరీశ్ రావు తక్షణ సాయంగా రూ.50 వేలు అందజేశారు. కళవ్వకు జీవితాంతం జీతం అందిస్తామని భరోసా ఇచ్చారు. బతకడానికి అవసరమైన సొమ్మును ఆమె ఖాతాలో జమ చేస్తామన్నారు. ఆమెను బతికించడానికి అవసరమైన సర్జరీలు చేయాలని హాస్పిటల్ సూపరింటెండెంట్‌కు సూచించారు.

కరెంట్ షాక్ కారణంగా కాళ్లు, చేతులకు బ్లడ్ సర్క్యులేషన్ ఆగిపోయి ఇన్ఫెక్షన్ సోకింది. దీంతో జూన్ 10న సర్జరీ చేసి ఇన్ఫెక్షన్ సోకిన రెండు కాళ్లు, రెండు చేతులను తొలగించారు. అయినప్పటికీ ఇన్ఫెక్షన్ పెరిగిపోవడంతో.. చికిత్స పొందుతూ బుధవారం (జూన్ 24న) ఆమె తుది శ్వాస విడిచారు. ఈ విషయం తెలుసుకున్న మంత్రి హరీశ్ రావు తీవ్ర దిగ్భ్రాంతి వ్యక్తం చేశారు. 20 రోజులపాటు ఐసీయూ ఉండి చికిత్స పొందినా ఆమె చనిపోవడం కలచి వేసిందన్నారు. ఆమె కుటుంబాన్ని ఆదుకుంటామన్నారు. సిద్ధిపేట జిల్లా మహిళా శిశు సంక్షేమశాఖ అధికారి రాంగోపాల్‌రెడ్డి మృతురాలి కుటుంబీకులను పరామర్శించారు. ప్రభుత్వం తరపున రూ. 50 వేల సాయాన్ని ఆయన వారి కుటుంబీకులకు అందజేశారు.



Source link

Leave a Reply

Your email address will not be published. Required fields are marked *