snake bite in quarantine centre: క్వారంటైన్ సెంటర్‌లో పాము కాటు.. ఆరేళ్ల బాలిక మృతి – 6-year-old girl dies of snake bite at nainital’s quarantine centre in uttarakhand


క్వారంటైన్ కేంద్రంలో విషాదం చోటు చేసుకుంది. పాము కాటుకు గురై ఆరేళ్ల బాలిక ప్రాణాలు విడిచింది. కరోనా సోకినా ఆ బాలిక బతికేదేమో గానీ.. అధికారుల నిర్లక్ష్యానికి బలైంది. సరైన వసతులు లేని మారుమూల గ్రామంలోని ప్రభుత్వ పాఠశాలలో క్వారంటైన్ కేంద్రం ఏర్పాటు చేయడం వల్లే ఈ విషాదం చోటు చేసుకుంది. ఉత్తరాఖండ్‌లోని నైనిటాల్ జిల్లాలో సోమవారం (మే 25) ఈ ఘటన జరిగింది.

నైనిటాల్ జిల్లాలోని మారుమూల ప్రాంతంలోని తల్లిసేథి గ్రామంలోని ప్రభుత్వ ప్రాథమిక పాఠశాలలో క్వారంటైన్‌ సెంటర్‌ ఏర్పాటు చేశారు. వివిధ ప్రాంతాల నుంచి స్వస్థలాలకు వచ్చిన వలస కార్మికులను ఈ క్వారంటైన్ కేంద్రంలో ఉంచారు. వీరిలో ఓ వలస కుటుంబానికి చెందిన ఆరేళ్ల బాలిక కూడా ఉంది.

సోమవారం ఉదయం సదరు బాలిక నోటి నుంచి నురగలు కక్కుతుండటాన్ని గుర్తించిన తల్లిదండ్రులు ఆందోళనకు గురయ్యారు. బాలికను మధ్యాహ్నం ఒంటి గంట ప్రాంతంలో బెతల్‌ఘాట్‌ కమ్యూనిటీ హెల్త్‌ సెంటర్‌‌కు తీసుకొచ్చారు. సోమవారం వేకువజామున బాలిక గాడ నిద్రలో ఉన్న సమయంలో విష సర్పం కాటేసినట్లు అనుమానిస్తున్నారు. బాలిక శరీరంపై గాట్లను గుర్తించిన వైద్య సిబ్బంది ఆమెకు రెండు విషపు విరుగుడు ఇంజెక్షన్లు ఇచ్చారు. కానీ, పది నిమిషాల తర్వాత చిన్నారి ప్రాణాలు విడిచింది.

ఈ ఘటనను నైనిటాల్‌ జిల్లా మేజిస్ట్రేట్‌ (కలెక్టర్) సవిన్‌ బన్సాల్‌ తీవ్రంగా పరిగణించారు. బాలిక బంధువు ఇచ్చిన ఫిర్యాదు మేరకు ఘటనపై విచారణకు ఆదేశించారు. ముగ్గురు అధికారులు నిర్లక్ష్యం కారణంగానే ఈ ఘటన చోటుచేసుకుందని ప్రాథమిక విచారణలో తేలింది. జిల్లా మేజిస్ట్రేట్ ఆదేశాలతో పాఠశాల ఉపాధ్యాయుడు కరణ్‌ సింగ్‌, రెవెన్యూ అధికారి (పట్వారీ) రాజ్‌పాల్‌ సింగ్‌, గ్రామాభివృద్ధి అధికారి ఉమేశ్‌ జోషిపై పోలీసులు కేసు నమోదు చేశారు.

బాలిక కుటుంబానికి ప్రభుత్వం తరఫఉన రూ.3 లక్షలు పరిహారం ఇవ్వనున్నట్టు డివిజినల్‌ అటవీ శాఖ అధికారి (డీఎఫ్‌ఓ) బిజులాల్‌ ప్రకటించారు. ఘటనపై విమర్శలు వెల్లువెత్తుతున్నాయి. కరోనా వైరస్‌ కట్టడి కోసం రాష్ట్రవ్యాప్తంగా ఏర్పాటు చేసిన క్వారంటైన్‌ కేంద్రాల్లో సరైన వసతులు లేవని ఉత్తరాఖండ్‌ ప్రతిపక్ష నాయకుడు ఇందిరా హృదయేశ్‌ ఆగ్రహం వ్యక్తం చేశారు.

Photo Credit: Hindustan Times

Also Read:ఒకే కాన్పులో ఆడ, మగ బిడ్డ.. కానీ, కవలలిద్దరికీ కరోనా
Must Read:నిప్పుల కొలిమిలా తెలంగాణ.. పిట్టల్లా రాలుతున్న జనం



Source link

Leave a Reply

Your email address will not be published. Required fields are marked *