southwest monsoon 2020: Monsoon Rains అరేబియాలో అనుకూల వాతావరణం.. జూన్ 1కే కేరళకు రుతుపవనాలు: ఐఎండీ – imd says southwest monsoon onset likely to hit kerala coast by june 1


జూన్ 1 నాటికే దేశంలోకి నైరుతి రుతుపవనాలు ప్రవేశించే అనుకూల వాతావరణం ఉందని భారత వాతావరణ శాఖ గురువారం మధ్యాహ్నం వెల్లడించింది. మే 31 న ఆగ్నేయ, పక్కనే ఉన్న తూర్పు మధ్య అరేబియా సముద్రంలో అల్పపీడనం ఏర్పడే అవకాశం ఉందని, దీని వల్ల రుతుపవనాలు సకాలంలో ప్రవేశించే అవకాశం ఉందన్నారు. ప్రస్తుతం బంగాళాఖాతంలోని అండమాన్ నికోబార్ దీవుల్లోని కొన్ని ప్రాంతాలకు నైరుతి రుతుపవనాలు విస్తరించాయని తెలిపింది. అలాగే, గురువారం నాటికి మాల్దీవులు-కమోరిన్ ప్రాంతం, సహా మిగతా అండమాన్ దీవుల్లోకి విస్తరించినట్టు పేర్కొంది. వచ్చే 48 గంటల్లో మాల్దీవులు-కమోరిన్ ప్రాంతంలోని మిగతా చోట్లలో ముందుకు వెళ్తాయని అంచనా వేస్తున్నారు.

మే 31 నుంచి జూన్ 4 మధ్య.. పశ్చిమ మధ్య, పక్కనే ఉన్న నైరుతి అరేబియా సముద్రంపై తుఫాను ఆవర్తన ప్రభావంతో, పశ్చిమ మధ్య అరేబియా సముద్రంపై అల్పపీడన ప్రాంతం ఏర్పడింది.. దీనికి అనుబంధంగా తుఫాను ఆవర్తనం ట్రోపోస్పియర్ స్థాయి వరకు విస్తరించింది. రాబోయే 48 గంటల్లో అదే ప్రాంతంలో అల్పపీడనం బలపడే అవకాశం ఉంది. వచ్చే 72 గంటల్లో ఇది వాయువ్య దిశగా దక్షిణ ఒమన్, తూర్పు యెమెన్ తీరం వైపు కదిలే అవకాశం ఉందని ఐఎండీ తెలిపింది.

ఆరేబియా సముద్రంలో రెండు అల్పపీడనాలు ఏర్పడుతున్నట్టు ఐఎండీ చేసిన ప్రకటనతో కేరళ ప్రభుత్వం అప్రమత్తమయ్యింది. ఈ సమయంలో మత్స్యకారులు చేపల వేటకు వెళ్లొద్దని, ఒకవేళ ఎవరైనా వెళితే గురువారం రాత్రిలోగా వెనక్కు వచ్చేయాలని పేర్కొంది. కేరళ తీరానికి చేరుకోలేకపోయిన వారు దగ్గరలోని తీర ప్రాంతాలకు వీలైనంత తొందరగా చేరాలని తెలిపింది.

దేశంలో నైరుతి రుతుపవనాల ప్రవేశంతో ఖరీఫ్ సీజన్ మొదలవుతుంది. భారత్‌లో వ్యవసాయానికి నైరుతి రుతుపవనాలే కీలకం. దాదాపు 80 శాతం భూభాగం దీనిపైనే ఆధారపడింది. దేశంలోకి ఈ ఏడాది రుతుపవనాలు కొంత ఆలస్యంగా ప్రవేశించనున్నాయని మే 15న భారత వాతావరణ శాఖ వెల్లడించింది. సాధారణంగా జూన్ 1 నాటికి కేరళ తీరాన్ని నైరుతి రుతుపవనాలు తాకనుండగా.. ఈ ఏడాది మాత్రం జూన్ 5కి నాలుగు రోజుల ముందు లేదా వెనుక తాకుతాయని పేర్కొంది.

కాగా, దేశంలో నైరుతి రుతుపవనాలు కేరళ తీరాన్ని తొలుత తాకి.. తర్వాత దేశమంతటా విస్తరిస్తాయి. కేరళ నుంచి కర్ణాటక మీదుగా ఏపీ, తెలంగాణలోకి రుతుపవనాలు ప్రవేశిస్తాయి. సాధారణంగా మే 22 నాటికి అండమాన్ దీవులలోకి రుతుపవనాలు ప్రవేశిస్తాయి.



Source link

Leave a Reply

Your email address will not be published. Required fields are marked *