spacex programme: స్పేస్ ఎక్స్ భారీ ప్రయోగం నాలుగోసారీ విఫలం.. నేలపై ఉండగానే పేలిపోయిన రాకెట్ – spacex loses another starship prototype in massive explosion in fourth time


భవిష్యత్తులో చంద్రుడు, అంగారకుడిపైకి మానవుల్ని పంపడమే లక్ష్యంగా అమెరికా అంతరిక్ష పరిశోధన సంస్థ స్పేస్‌ ఎక్స్‌ చేపట్టిన ప్రతిష్ఠాత్మక ప్రాజెక్టుకి మరో ఎదురుదెబ్బ తగిలింది. మానవ అంతరిక్ష యాత్రకు రూపొందిస్తున్న భారీ రాకెట్‌ స్టార్‌షిప్‌ (నమూనా) ప్రయోగం మరోసారి విఫలమైంది. ప్రయోగం విఫలం కావడం ఇది నాలుగోసారి. శుక్రవారం టెక్సాస్‌లోని ల్యాంచింగ్ ప్యాడ్ నుంచి రాకెట్‌ను ప్రయోగించేందుకు ఇంజిన్‌ను మండించగా.. అది నేలపై ఉండగానే పేలిపోయింది.

అమెరికా అంతరిక్ష పరిశోధన సంస్థ(నాసా) కోసం స్పేస్‌ ఎక్స్‌ చేపట్టిన ప్రయోగం ఇటీవలే వాయిదా పడిన విషయం తెలిసిందే. అమెరికా వ్యోమగాములను అంతర్జాతీయ అంతరిక్ష కేంద్రానికి (ఐఎస్‌ఎస్‌) తీసుకెళ్లడానికి ఉద్దేశించిన ఈ మిషన్‌ ప్రయోగానికి కొన్ని నిమిషాల ముందే ఆగిపోయింది. వాతావరణం అనుకూలించకపోవడం వల్ల ఈ నిర్ణయం తీసుకున్నట్టు నాసా వెల్లడించింది.

అయితే, తాజా స్టార్‌షిప్‌ ప్రయోగ వైఫల్యం నాసా మిషన్‌పై ఉండబోదని స్పేస్ ఎక్స్ సీఈఓ ఎలన్‌ మస్క్‌ స్పష్టం చేశారు. ప్రస్తుతానికి స్టార్‌షిప్‌ ప్రయోగాన్ని పక్కనబెట్టి అంతరిక్ష కేంద్రానికి వ్యోమగాముల్ని పంపే మిషన్‌పైనే దృష్టి సారిస్తామని ఆయన పేర్కొన్నారు.

స్టార్‌ షిప్‌ ద్వారా ఏక కాలంలో వంద మందిని తీసుకెళ్లాలన్న లక్ష్యంతో ప్రాజెక్టుని రూపొందించారు. మనుషులతో పాటు పదుల సంఖ్యలో ఉపగ్రహాలను కూడా మోసుకెళ్లేలా దీనిని డిజైన్‌ చేశారు. భవిష్యత్తులో ఇతర గ్రహాలమీద ఆవాసాల నిర్మాణానికి అవసరమైన పరికరాలను పెద్దమొత్తంలో తీసుకెళ్లాలన్నది కూడా ఈ ప్రాజెక్టు లక్ష్యాల్లో ఒకటి.

కాగా.. అంతర్జాతీయ అంతరిక్ష కేంద్రానికి స్పేస్‌ఎక్స్ ప్రతిష్ఠాత్మక మిషన్ ప్రయోగంపై తుది నిర్ణయం శనివారం మధ్యాహ్నం వాతావరణాన్ని అంచనా వేసిన తరువాత తీసుకుంటామని నాసా చీఫ్ జిమ్ బ్రైడెన్‌స్టైన్ తెలిపారు. నాసాతో ప్రయోగానికి స్పేస్‌ఎక్స్ సిద్ధమైన వేళ.. ఒక రోజు ముందే ఈ స్టార్ షిప్ ప్రయోగం విఫలమయ్యింది. ఇద్దరు వ్యోమగాములను అంతర్జాతీయ అంతరిక్ష కేంద్రానికి ఫ్లోరిడాలోని కేప్ కెనావెరల్ నుంచి పంపనున్నారు. ఫాల్కన్ 9 రాకెట్‌ సాయంతో ఈ ప్రయోగాన్ని నిర్వహిస్తున్నారు.



Source link

Leave a Reply

Your email address will not be published. Required fields are marked *