Supreme Court: వలస కార్మికుల అంశం.. 15 రోజుల డెడ్‌లైన్ విధించిన సుప్రీంకోర్టు – supreme court mulls granting 15 days to centre, states for transporting migrant workers


లస కార్మికుల అంశంపై కేంద్ర, రాష్ట్ర ప్రభుత్వాలకు సుప్రీంకోర్టు కీలక ఆదేశాలు జారీ చేసింది. లాక్‌డౌన్‌ కారణంగా దేశంలోని వివిధ రాష్ట్రాల్లో చిక్కుకున్న వలసదారులను వారి స్వస్థలాలకు చేర్చేందుకు 15 రోజుల సమయం ఇచ్చింది. 15 రోజుల్లో ఈ ప్రక్రియను పూర్తి చేయాలని అన్ని రాష్ట్రాలకు సూచించింది. వలస కార్మికులు సొంత రాష్ట్రాలకు చేరుకున్న తర్వాత వారి పూర్తి వివరాలు గ్రామాల వారీగా నమోదు చేయాలని ఆదేశించింది. దీంతో పాటు వారికి ఉపాధి అవకాశాలు కల్పించడానికి తగిన చర్యలు తీసుకోవాలని రాష్ట్రాలకు సూచించింది. ఇందుకు సంబంధించిన ఆదేశాలను మంగళవారం (జూన్ 9) జారీ చేస్తామని సర్వోన్నత న్యాయస్థానం పేర్కొంది.

వలస కూలీల అంశాన్ని సుమోటోగా తీసుకొని సుప్రీంకోర్టు విచారణ చేపట్టింది. జస్టిస్‌ అశోక్‌ భూషణ్‌, జస్టిస్‌ ఎస్‌కే కౌల్‌, జస్టిస్‌ ఎంఆర్‌ షా నేతృత్వంలో ముగ్గురు సభ్యుల ధర్మాసనం ఈ అంశంపై శుక్రవారం విచారణ చేపట్టింది. ప్రభుత్వం తరపున సొలిసిటర్‌ జనరల్‌ తుషార్‌ మెహతా కోర్టుకు వాదనలు వినిపించారు. వలస కూలీలను స్వస్థలాలకు తరలించే ప్రక్రియ ఇప్పటికే 90 శాతం పూర్తయిందని ఆయన తెలిపారు.

జూన్ 3 నాటికి దేశవ్యాప్తంగా 4,228 వేల రైళ్ల ద్వారా సుమారు 57 లక్షల మంది వలస కార్మికులను వారి స్వస్థలాలకు తరలించామని సొలిసిటర్‌ జనరల్‌ తుషార్ మెహతా.. సుప్రీంకోర్టుకు తెలిపారు. మరో 41 లక్షల మంది సొంత వాహనాలతో స్వగ్రామాలకు వెళ్లారని వివరించారు. రాష్ట్రాలతో సమన్వయం చేసుకుంటూ వీరిని తరలించేందుకు అన్ని ఏర్పాట్లు చేస్తున్నామని వివరించారు. వలస కార్మికుల తరలింపు కోసం రాష్ట్రాల నుంచి వచ్చిన వినతుల ప్రకారమే ప్రత్యేక రైళ్లను ఏర్పాటు చేస్తున్నట్లు వెల్లడించారు.

మరో 171 శ్రామిక్ రైళ్ల కోసం రాష్ట్రాల నుంచి వినతులు వచ్చాయని సొలిసిటర్ జనరల్ న్యాయస్థానానికి తెలిపారు. మహారాష్ట్ర నుంచి ఒక్క రైలు కోసమే వినతి వచ్చిందని తెలిపారు. దీనిపై కోర్టు ఆశ్చర్యం వ్యక్తం చేసింది. అయితే.. మహారాష్ట్ర నుంచి ఇప్పటికే 802 శ్రామిక్ రైళ్లను నడిపినట్లు సొలిసిటర్ జనరల్ తుషార్ మెహతా వివరణ ఇచ్చారు.

విచారణ సందర్భంగా పలు రాష్ట్రాలు వలస కార్మికుల విషయంలో తీసుకుంటున్న చర్యలను సుప్రీంకోర్టు ముందుంచాయి. తాము ఇప్పటికే 11 లక్షల మందిని తరలించామని, మరో 38 వేల మందిని తరలించాల్సి ఉందని మహారాష్ట్ర ప్రభుత్వం తెలిపింది. గుజరాత్‌లో 22 లక్షల మంది వలస కార్మికులు ఉండగా.. ఇప్పటికే 20.5 లక్షల మందిని తరలించినట్లు ఆ రాష్ట్ర ప్రభుత్వం కోర్టుకు నివేదించింది. ఢిల్లీ నుంచి 3 లక్షల మందిని తరలించామని.. మరో 2 లక్షల మంది వలస కూలీలు ఉన్నారని ఏఎస్జీ తెలిపారు.

28 లక్షల మంది వలస కూలీలు వెనక్కి వచ్చినట్లు బిహార్ తెలిపింది. ఇప్పటివరకు 21.69 లక్షల మంది వలస కూలీలను వెనక్కి రప్పించినట్లు ఉత్తరప్రదేశ్ ప్రభుత్వం కోర్టుకు వివరించింది. తమ రాష్ట్రానికి మరో 6 లక్షల మంది వలస కూలీలు రావాల్సి ఉందని పశ్చిమ బెంగాల్ ప్రభుత్వం తెలిపింది.

Also Read:రైలు దొరకలేదని కారు కొని ఇంటికి చేరుకున్నాడు!



Source link

Leave a Reply

Your email address will not be published. Required fields are marked *