Supreme Court: వలస కూలీల కన్నీటి వెతలు.. సుప్రీంకోర్టు కీలక ఆదేశాలు – no fare to be charged from migrants returning home, orders supreme court


లాక్‌డౌన్‌ వేళ తీవ్ర ఇబ్బందులు ఎదుర్కొంటున్న వలస కూలీల కన్నీటి కష్టాలపై సుప్రీంకోర్టు స్పందించింది. కేంద్ర, రాష్ట్ర ప్రభుత్వాలకు కీలక ఆదేశాలు ఇచ్చింది. వలస కూలీల ప్రయాణానికి సంబంధించి ఎలాంటి రవాణా ఛార్జీలూ వసూలు చేయకూడదని ఆదేశించింది. వలస కూలీలను గుర్తించి, సదుపాయాలు కల్పించాలని రాష్ట్రాలకు సూచించింది. వలస కూలీలకు సంబంధించిన అంశంపై అఫిడవిట్ దాఖలు చేయాలని కేంద్ర ప్రభుత్వంతో పాటు అన్ని రాష్ట్రాలను సర్వోన్నత న్యాయస్థానం ఆదేశించింది. వలస కూలీల కష్టాలు చూసి కొన్ని మధ్యంతర ఆదేశాలు ఇస్తున్నామని తెలిపింది. తదుపరి విచారణను జూన్‌ 5కు వాయిదా వేసింది.

వలస కూలీలపై వార్తా పత్రికల్లో వస్తున్న కథనాలను చూసి చలించిన సుప్రీంకోర్టు ధర్మాసనం ఈ అంశాన్ని సుమోటోగా తీసుకొని గురువారం (మే 28) విచారణ ప్రారంభించింది. వలస కూలీలకు సంబంధించి రాష్ట్రాలు, కేంద్ర పాలిత ప్రాంతాలు చర్యలు తీసుకుంటున్నప్పటికీ అనేక లోపాలు తమ దృష్టికి వచ్చాయని ధర్మాసనం పేర్కొంది. ఈ అంశంపై కేంద్రం తరఫున సొలిసిటర్‌ జనరల్‌ తుషార్‌ మెహతా ప్రాథమిక నివేదికను సుప్రీం కోర్టుకు సమర్పించారు.

బస్సు, రైలు ప్రయాణాలకు సంబంధించి వలస కూలీల నుంచి ఎలాంటి ఛార్జీలు వసూలు చేయకూడదని సుప్రీంకోర్టు ఆదేశించింది. రైలు ఎక్కే వరకు అక్కడి రాష్ట్రం, ఎక్కిన తర్వాత రైల్వే శాఖ, చేరుకున్న తర్వాత అక్కడి రాష్ట్ర ప్రభుత్వం వలస కూలీలకు భోజన సదుపాయం కల్పించాలని సుప్రీం ధర్మాసనం ఆదేశించింది. రవాణా కోసం రిజిస్ట్రేషన్‌, రైళ్ల కోసం ఎదురుచూపులు చూడటంతో పాటు భోజన సదుపాయం లేక వసల కూలీలు సమస్యలను ఎదుర్కొంటున్నట్లు గుర్తించామని పేర్కొంది.

ఆహారం ఎక్కడ అందుబాటులో ఉందనే వివరాలను బహిరంగంగా వెల్లడించాలని సుప్రీంకోర్టు సూచించింది. కూలీలు రైళ్లు, బస్సులు దిగిన తర్వాత సొంతూర్లకు వెళ్లేందుకు ఆయా రాష్ట్ర ప్రభుత్వాలు రవాణా సదుపాయం, ఆహారాన్ని సమకూర్చాలని కోర్టు పేర్కొంది. వలస కూలీల నమోదును వేగవంతం చేయాలని, మరిన్ని డెస్క్‌లను ఏర్పాటు చేయాలని ఆదేశించింది.

రోడ్లపై నడుస్తూ వెళుతున్న వలస కూలీలను సమీపంలోని క్యాంపులకు తీసుకువెళ్లి వారికి అన్ని సౌకర్యాలనూ కల్పించాలని సుప్రీం కోర్టు ఆదేశించింది. రాష్ట్ర ప్రభుత్వాలు రైళ్ల ఏర్పాటు కోసం వినతి పెడితే రైల్వే శాఖ ఏర్పాటు చేయాలని పేర్కొంది. ఈ విషయాలన్నీ వలస కూలీలకు చేరేలా ప్రచారం కూడా చేయాలని సూచించింది. జస్టిస్‌ అశోక్‌ భూషణ్, జస్టిస్‌ ఎస్‌కే కౌల్‌, జస్టిస్‌ ఎంఆర్‌ షాతో కూడిన సుప్రీం త్రిసభ్య ధర్మాసనం ఈ అంశంపై విచారణ చేపట్టింది.

కరోనా మహమ్మారితో అసాధారణ సంక్షోభం తలెత్తిన క్రమంలో ప్రభుత్వం పలు చర్యలు చేపడుతోందని, వలస కూలీలను స్వస్థలాలకు చేర్చేందుకు సమన్వయంతో ముందుకెళ్తోందని సొలిసిటర్‌ జనరల్‌ తుషార్‌ మెహతా కోర్టుకు వివరించారు. ఎంత మంది కూలీలు స్వస్థలాలకు వెళ్లేందుకు ఎదురు చూస్తున్నారు? వారి రవాణా ప్రణాళిక, రిజిస్ట్రేషన్‌ విధానాలతో అన్ని రాష్ట్ర ప్రభుత్వాలు శుక్రవారం నాటికి అఫిడవిట్‌ దాఖలు చేయాలని సుప్రీం కోర్టు ఆదేశించింది.

Also Read:ఆ పసిబిడ్డ ఆత్మకు శాంతి కలగాలి: పవన్ కళ్యాణ్

Don’t Miss:లాక్‌డౌన్ 5.0 తప్పదా? పొడిగిస్తే ఎలా ఉండబోతుంది?



Source link

Leave a Reply

Your email address will not be published. Required fields are marked *