TDP MLA Joins YSRCP: వైసీపీలో చేరింది టీడీపీ ఎమ్మెల్యే కుమారులే, గణేష్ మాత్రం.. ట్విస్ట్ ఇచ్చిన సీఎం జగన్! – tdp visakhapatnam south mla vasupalli ganesh kumar meets cm ys jagan and extended his support to ysrcp but his sons join party


విశాఖపట్నం సౌత్ తెలుగు దేశం పార్టీ ఎమ్మెల్యే వాసుపల్లి గణేష్ రాష్ట్ర సీఎం వైఎస్ జగన్మోహన్ రెడ్డితో భేటీ అయ్యారు. గత కొన్ని రోజులుగా టీడీపీ కార్యక్రమాలకు దూరంగా ఉంటున్న ఎమ్మెల్యే గణేష్.. శనివారం తన కుమారులతో కలిసి సీఎం క్యాంప్ ఆఫీసుకు వెళ్లి జగన్‌తో భేటీ అయ్యారు. ఈ సందర్భంగా వాసుపల్లి కుమారులకు కండువా కప్పిన సీఎం జగన్ సాదరంగా పార్టీలోకి ఆహ్వానించారు. అయితే ఎమ్మెల్యే గణేష్‌కు మాత్రం పార్టీ కండువా కప్పలేదు. అనంతరం మీడియాతో మాట్లాడిన గణేష్.. తన కుమారులు వాసుపల్లి సాకేత్, వాసుపల్లి సూర్య వైసీపీలో చేరడం చాలా ఆనందంగా ఉందన్నారు. తాను కూడా వైసీపీకి మద్దతు ఇస్తున్నట్లు చెప్పారు. వైసీపీ ప్రధాన కార్యదర్శి, ఎంపీ విజయసాయిరెడ్డి సైతం పార్టీలోకి ఎమ్మెల్యే గణేష్ కుమారులు మాత్రమే చేరినట్లు వ్యాఖ్యానించారు.

అయితే గతంలో టీడీపీ ఎమ్మెల్యే వల్లభనేని వంశీకి పార్టీ కండువా కప్పిన సీఎం జగన్.. ఎమ్మెల్యే గణేష్‌కు మాత్రం కప్పలేదు. గతంలో జగన్ ప్రతిపక్షంలో ఉన్నప్పుడు టీడీపీ నుంచి గెలిచిన వారు పార్టీ చేరాలంటే పదవులకు రాజీనామా చేయాల్సి ఉంటుందని చెప్పేవారు. తాజాగా, వైసీపీలో చేరుతున్న టీడీపీ ఎమ్మెల్యేలను మాత్రం నేరుగా వైసీపీలో చేర్చుకోకుండా, అనుబంధ సభ్యులుగా గుర్తిస్తున్నారు. ఇదే కోవలో ఎమ్మెల్యే గణేష్‌కు పార్టీ కండువా కప్పలేదని విశేషకులు భావిస్తున్నారు.

అలాగే ఎమ్మెల్యే గణేష్ మాట్లాడుతూ.. ముఖ్యమంత్రి వైఎస్‌ జగన్మోహన్‌రెడ్డి ప్రజా పాలనతో అన్ని వర్గాల ప్రజలు వైసీపీ వైపు ఆకర్షితులతున్నారని చెప్పారు. ముఖ్యంగా యువత పెద్ద ఎత్తున పార్టీలో చేరుతున్నారని తెలిపారు. తన కుమారులు కూడా వైఎస్సార్‌సీపీలో చేరడం ఆనందంగా ఉందన్నారు. సీఎం జగన్ గట్స్ ఉన్న నాయకుడని, ఆయన ధైర్యమే రాష్ట్రాన్ని ముందుకు తీసుకెళ్తోందని వ్యాఖ్యానించారు. రాష్ట్రంలో సంక్షేమ పథకాలన్నీ క్షేత్రస్థాయిలో అందరికీ చేరుతున్నాయన్నాయని చెప్పారు. విశాఖ ఎగ్జిక్యూటివ్‌ క్యాపిటల్‌గా మార్చిన ఘనత సీఎం జగన్‌కే దక్కుతుందన్నారు. టీడీపీ ఇక ముందుకు వస్తుందని తనకు అనిపించడం లేదని వ్యాఖ్యానించారు.

వైసీపీ ఎంపీ విజయసాయిరెడ్డి మాట్లాడుతూ.. వాసుపల్లి గణేష్ కుటుంబం విశాఖ ప్రజల కోసం చేస్తున్న సేవలు హర్షణీయమన్నారు. వాసుపల్లి గణేష్ కుమారులు పార్టీలోకి రావడం బలాన్ని ఇస్తుందని వ్యాఖ్యానించారు. ముఖ్యమంత్రి వైఎస్‌ జగన్‌ చేస్తున్న అభివృద్ధిని చూసి టీడీపీలోని విద్యావంతులు పార్టీలోకి వస్తున్నారని తెలిపారు. భవిష్యత్తులో వైసీపీలోకి చాలా మంది వస్తారని జోస్యం చెప్పారు. విశాఖలో టీడీపీ తుడుచుపెట్టుకు పోతుందని జోస్యం చెప్పారు.



Source link

Leave a Reply

Your email address will not be published. Required fields are marked *