Team India Split Captaincy: టీమిండియాలో కెప్టెన్సీ విభజన కష్టం.. గొడవలైపోతాయ్: కపిల్‌దేవ్ – former india captain kapil dev explains why split captaincy won’t work in team india


భారత క్రికెట్‌లో కెప్టెన్సీ విభజన చాలా కష్టమని దిగ్గజ క్రికెటర్ కపిల్‌దేవ్ అభిప్రాయపడ్డాడు. ఐపీఎల్‌ 2020 సీజన్‌లో ముంబయి ఇండియన్స్‌ని విజేతగా నిలిపిన కెప్టెన్ రోహిత్ శర్మకి భారత జట్టు వన్డే, టీ20 పగ్గాలు ఇవ్వాలని ఇటీవల మాజీ క్రికెటర్లు డిమాండ్ చేస్తున్నారు. ఇప్పటికే ఇంగ్లాండ్, ఆస్ట్రేలియా జట్లు ఇలా కెప్టెన్సీ విభజనతో ఊహించని సక్సెస్‌ని అందుకోవడాన్ని కూడా వారు గుర్తు చేస్తున్నారు. కానీ.. భారత క్రికెట్‌లో ఉన్న సంప్రదాయం కారణంగా కెప్టెన్సీ విభజన సాధ్యంకాదని కపిల్‌దేవ్ చెప్పుకొచ్చాడు. ఇంగ్లాండ్ వన్డే, టీ20 జట్టుకి ఇయాన్ మోర్గాన్ కెప్టెన్‌కాగా.. టెస్టు జట్టుకి జో రూట్‌ కెప్టెన్‌గా ఉన్నాడు. 2019 వన్డే ప్రపంచకప్‌లో ఇంగ్లాండ్ విజేతగా నిలిచిన విషయం తెలిసిందే. క్రికెట్ పుట్టినిల్లుగా పేరొందిన ఇంగ్లాండ్ టీమ్ వరల్డ్‌కప్ గెలవడం కూడా ఇదే తొలిసారి.

టీమిండియాలో కెప్టెన్సీ విభజనపై చర్చ జరుగుతుండటంతో కపిల్‌దేవ్ స్పందించాడు. ‘‘మన క్రికెట్ సంస్కృతిలో కెప్టెన్సీ విభజన సాధ్యంకాదు. ఒక కంపెనీకి ఇద్దరు సీఈవోలు ఉండగలరా..? విరాట్ కోహ్లీ టీ20ల్లో ఆడుతుంటే కెప్టెన్‌గానూ అతడినే కొనసాగించాలి. టీమ్‌లో మరో కెప్టెన్‌ కూడా ఉండాలనే నిర్ణయాన్ని నేనూ స్వాగతిస్తా. కానీ.. అది చాలా కష్టం. ఎందుకంటే..? దాదాపుగా 70-80 శాతం సేమ్ టీమ్.. భారత వన్డే, టీ20, టెస్టు జట్టులో ఆడుతుంటుంది. కాబట్టి.. భిన్నమైన ఆలోచనలతో ఉండే ఇద్దరు కెప్టెన్లతో ఆటగాళ్లు తికమకని ఎదుర్కొంటారు. అది.. టీమ్‌లో గొడవలకి కూడా దారి తీయచ్చు’’ అని కపిల్‌దేవ్ వెల్లడించాడు.

ఐపీఎల్‌లో ముంబయి ఇండియన్స్‌కి కెప్టెన్‌గా ఐదో టైటిల్‌ని అందించిన రోహిత్ శర్మకి టీ20ల్లోనూ కెప్టెన్‌గా మెరుగైన రికార్డ్ ఉంది. దాంతో.. కనీసం టీ20ల్లోనైనా అతనికి కెప్టెన్సీ ఇవ్వాలనేది మాజీ క్రికెటర్ల డిమాండ్. కానీ.. ఇప్పటికే రోహిత్ శర్మ, విరాట్ కోహ్లీ మధ్య ప్రచ్ఛన్న యుద్ధం నడుస్తుండగా.. ముంబయి ఇండియన్స్ క్రికెటర్లు కోహ్లీపై సెటైర్లు వేస్తూ తమ కెప్టెన్‌కి మద్దతు తెలుపుతున్నారు. ఇదే తరహాలో టీమిండియాలోనూ ఆటగాళ్ల విభజన జరిగే అవకాశం ఉందని కపిల్‌దేవ్ పరోక్షంగా హెచ్చరించాడు.

Read More: కోహ్లీని గేలి చేసిన భారత క్రికెటర్.. రోజుల వ్యవధిలోనే పొగడ్తలు



Source link

Leave a Reply

Your email address will not be published. Required fields are marked *